Antecedentes:
Mediante a Resolución do 26 de setembro de 2017, da Presidencia de Portos de Galicia, e logo da audiencia e consulta coa Federación Galega de Municipios e Provincias, aprobáronse os criterios e o procedemento para autorizar a ocupación de dominio público portuario con destino á celebración de espectáculos públicos ou actividades recreativas nos portos autonómicos da competencia deste organismo (Diario Oficial de Galicia do 5 de outubro de 2017).
O 14 de xuño de 2018 entrou en vigor a Lei 6/2017, do 12 de decembro, de Portos de Galicia (Diario Oficial de Galicia do 14 de decembro de 2017), que derroga a Lei 5/1994, do 29 de novembro, de creación de Portos de Galicia.
O 2 de xullo de 2018 entrou en vigor a Lei 10/2017, do 27 de decembro, de espectáculos públicos e actividades recreativas de Galicia, publicada no Diario Oficial de Galicia do martes, 2 de xaneiro de 2018, conforme a vacatio legis fixada na súa disposición derradeira sexta. Nesta lei introdúcense modificacións na Lei 9/2013 do emprendemento e da competitividade económica de Galicia.
O artigo 2.3 desta Lei 10/2017 establece que esta é de aplicación supletoria a aqueles espectáculos públicos e actividades recreativas que conten con regulación sectorial propia; precepto que, en materia de portos, debe poñerse en relación con que a normativa de patrimonio público e a portuaria, tanto estatal como autonómica, exixen a obrigatoriedade de obtención de autorización ou concesión para a ocupación de dominio portuario.
Por outra parte, a disposición derrogatoria única da citada Lei 10/2017 derroga os artigos 4 e 7 do Decreto 292/2004, do 18 de novembro, que aproba o Catálogo de espectáculos públicos e actividades recreativas da Comunidade Autónoma de Galicia, e, integramente, o Decreto 390/2009, do 24 de setembro, que determina o procedemento aplicable para o exercicio da potestade sancionadora na materia de establecementos e espectáculos públicos.
A confluencia destes cambios normativos motivou unha modificación nos criterios e procedementos mediante Resolución do 22 de xuño de 2018, publicada no Diario Oficial de Galicia número 125, do 2 de xullo de 2018.
Posteriormente, foi publicado o Decreto 124/2019, do 5 de setembro, polo que se aproba o Catálogo de espectáculos públicos, actividades recreativas e establecementos abertos ao público da Comunidade Autónoma e se establecen determinadas disposicións xerais de aplicación na materia.
De acordo cos artigos 148.1.6 e 149.1.20 da Constitución española, o Estatuto de autonomía para Galicia, aprobado pola Lei orgánica 1/1981, do 6 de abril, establece no seu artigo 27.9 que corresponde á Comunidade Autónoma galega, dentro do seu ámbito territorial, a competencia exclusiva en materia de portos non cualificados de interese xeral polo Estado, portos de refuxio e portos deportivos, ao mesmo tempo que no seu artigo 28.6 atribúe á propia Comunidade Autónoma competencia para o desenvolvemento lexislativo e a execución da lexislación do Estado, nos termos que esta estableza, en canto aos portos pesqueiros.
Consonte estas previsións constitucionais e estatutarias, o Real decreto 3214/1982, do 24 de xullo, e o Decreto do Consello da Xunta de Galicia 167/1982, do 1 de decembro, tramitaron a transferencia á Comunidade Autónoma de Galicia, dentro do marco de competencias do Ministerio de Obras Públicas e Urbanismo, das funcións e servizos relativos a todos os portos e instalacións portuarias, suxeitos ou non a réxime de concesión, non cualificados de interese xeral polo Estado no Real decreto 989/1982, de 14 de maio, e aos de refuxio e deportivos existentes no seu ámbito territorial.
Os portos, que comezaron como puntos de descarga de mercadorías e pesca, evolucionaron ata converterse nuns complexos industriais e mercantís onde se desenvolven numerosas actividades produtivas e administrativas e que, así mesmo, realizan unha función de desenvolvemento rexional ao permitiren a localización e promoción doutras industrias, e social, en beneficio da comunidade concentrada na súa zona de influencia.
No artigo 55.3 da Lei 6/2017, do 12 de decembro, de portos de Galicia, disponse que nos terreos da zona de servizo portuaria que non reúnan as características naturais de bens de dominio público marítimo-terrestre definidos no artigo 3 da Lei 22/1988, do 28 de xullo, de costas, poderanse admitir outros usos non estritamente portuarios, tales como equipamentos culturais, recreativos, certames feirais, exposicións e outras actividades comerciais e industriais non portuarias, sempre que resulten compatibles cos usos antes definidos, que non se prexudique globalmente o desenvolvemento futuro do porto e das operacións de tráfico portuario e mais que se axusten ao establecido no planeamento urbanístico en vigor, así como ao previsto na normativa de costas en materia de protección do dominio público marítimo-terrestre adscrito.
Por outra banda, a lexislación vixente prohibe expresamente, entre outras, a publicidade comercial a través de carteis ou valos, medios acústicos ou audiovisuais situados no exterior das edificacións. Para estes efectos, non se considera publicidade os carteis informativos e rótulos indicadores dos propios establecementos ou empresas titulares dunha autorización ou concesión administrativa da Autoridade Portuaria.
A Autoridade Portuaria poderá autorizar a publicidade para actividades deportivas, sociais e culturais que ocasionalmente se desenvolvan no dominio público portuario nos termos da normativa de costas. É dicir, permitirase a publicidade nos termos establecidos na lexislación reguladora de costas.
Por outra banda, a prestación dos servizos nos portos relativos á ocupación do dominio publico portuario e ás súas infraestruturas regularase polo Regulamento de servizo e policía e pola Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia e demais normativa complementaria, supletoria e de desenvolvemento en materia tributaria, servizos entre os que se encontran as ocupacións a título precario do dominio público, fornecementos e uso de infraestruturas de atracada.
As taxas serán obxecto de liquidación por parte de Portos de Galicia aos respectivos suxeitos pasivos e entenderase que se ten producido falta de pagamento das taxas cando non se efectúe o ingreso da débeda tributaria no período voluntario.
A falta de pagamento de calquera das taxas portuarias poderá motivar, logo do apercibimento ao interesado e en canto non regularice a súa débeda tributaria, a prohibición ou perda do dereito á utilización ou aproveitamento especial das instalacións portuarias e a suspensión da actividade e, de ser o caso, a extinción do título administrativo correspondente, de acordo co previsto da Lei 6/2017, do 12 de decembro, de portos de Galicia.
A xestión e recadación das taxas efectuaraa Portos de Galicia, utilizando para a efectividade do cobramento destas as garantías constituídas para o efecto e, se é o caso, a vía de constrinximento.
Por outra banda, o artigo 3 da 10/2017, do 27 de decembro, de espectáculos públicos e actividades recreativas de Galicia, establece que, para os efectos desta lei, entenderase por:
a) Espectáculos públicos: as representacións, exhibicións, actuacións, proxeccións, competicións ou audicións de concorrencia pública de carácter artístico, cultural, deportivo ou análogo.
b) Actividades recreativas: aquelas que ofrecen ao público, persoas espectadoras ou participantes actividades, produtos ou servizos con fins de recreo, entretemento ou lecer.
c) Espectáculos públicos e actividades recreativas de carácter extraordinario: aqueles que se desenvolven esporadicamente en establecementos abertos ao público legalmente habilitados para celebrar un espectáculo público ou actividade recreativa distinta da actividade propia do establecemento.
d) Establecementos abertos ao público: locais, instalacións ou recintos dedicados a levar a cabo neles espectáculos públicos ou actividades recreativas. Poden ser dos seguintes tipos:
1º. Locais cerrados, permanentes non desmontables, cubertos total ou parcialmente.
2º. Locais non permanentes desmontables, cubertos total ou parcialmente, ou instalacións fixas portátiles ou desmontables pechadas.
3º. Recintos que unen varios locais ou instalacións, constituídos en complexos ou infraestruturas de ocio.
e) Espazos abertos ao público: lugares de titularidade pública, incluída a vía pública, ou de propiedade privada, onde ocasionalmente se levan a cabo espectáculos públicos ou actividades recreativas e que non dispoñen de infraestruturas nin instalacións fixas para facelo.
f) Instalacións portátiles ou desmontables: aquelas estruturas móbiles provisionais e eventuais ou aqueles recintos aptos para o desenvolvemento de espectáculos públicos ou actividades recreativas cuxo conxunto se encontre conformado por elementos desmontables ou portátiles constituídos por módulos ou compoñentes metálicos, de madeira ou de calquera outro material que permita operacións de montaxe ou desmontaxe sen necesidade de construír ou demoler algunha obra de fábrica.
A disposición derradeira primeira da devandita Lei 10/2017, modifica varios artigos da Lei 9/2013, do 19 de decembro, do emprendemento e da competitividade económica de Galicia, relativos ao réxime de declaración responsable, exixencia de licenza municipal ou autorización autonómica e de actividades exentas destes declaracións, licenzas ou autorizacións.
Polo exposto ademais da preceptiva autorización para a ocupación do dominio publico portuario de competencia autonómica, que outorgará Portos de Galicia, a celebración de espectáculos públicos ou actividades recreativas deberán contar coa correspondente licenza municipal, segundo o disposto no procedemento establecido no artigo 41 e seguintes da Lei 9/2013, de emprendemento e de competitividade económica de Galicia, así como no disposto nas normas regulamentarias de desenvolvemento e execución desta lei, coas excepcións introducidas na Lei 10/2017, de espectáculos públicos e actividades recreativas de Galicia.
Unido ao exposto, é unha realidade que os portos como zonas de actividade portuaria pesqueira, náutico deportiva e de lecer, comercial, industrial ou de servizos, en principio non resultan ser lugares aptos para todo tipo de festas populares e eventos de afluencia masiva de público, por canto as zonas portuarias acostuman implicar riscos específicos de danos a persoas e bens e, conseguintemente, debe limitarse a ocupación para realizar este tipo de eventos, e, en especial, nas zonas de maior actividade portuaria.
Agora ben, dada as características da forma de asentamento dos núcleos de poboación no litoral, prodúcese una forte implicación das actividades das vilas coa zona portuaria, de xeito que resulta tradicional nestas vilas e portos autonómicos a celebración dalgunhas actividades de lecer e espectáculos públicos de carácter ocasional en zona portuaria (festas patronais, probas deportivas, eventos culturais, educativos e festivos), realidade que sempre xerou numerosas solicitudes de autorización para a súa realización, polo que é preciso ditar unha resolución para a regulación das autorizacións deste tipo de actividades.
Polo exposto, toda pretensión de calquera persoa física ou xurídica, pública ou privada, de realizar espectáculos públicos ou actividades recreativas de calquera índole en zona portuaria, debe implicar unha solicitude formal e oficial na cal o organizador asuma a responsabilidade legal ante terceiros, e documente e xustifique a aplicación dun protocolo de seguridade rigoroso en canto a medios persoais e materiais, o que implicará a coordinación coa policía, servizos sanitarios, emerxencias e protección, así como prever o cerramento do recinto, accesos e evacuación, cobertura de responsabilidades mediante formalización de pólizas de responsabilidades legais e, así como as fianzas que garantan a reposición das infraestruturas no suposto de producirse danos.
Dado que a celebración do evento implica obter autorización de ocupación de superficie, á marxe do cumprimento do disposto na Lei 10/2017, considerase oportuno ditar o procedemento que regule a tipoloxía de espectáculos públicos e actividades recreativas autorizables nos portos e que tente homoxeneizar con outros organismos competentes a tramitación pertinente en consonancia coa lexislación vixente, polo que, de acordo con todo o indicado e en virtude das atribucións conferidas na Lei 6/2017, do 12 de decembro, de portos de Galicia,
RESOLVO:
• Aprobar o procedemento de autorización de ocupación de dominio público portuario competencia da Comunidade Autónoma de Galicia con destino á realización de espectáculos públicos e actividades recreativas, establecendo os criterios que regularán a tipoloxía de espectáculos públicos e actividades recreativas autorizables nos portos, tentando homoxeneizar con outros organismos competentes a tramitación pertinente en consonancia coa lexislación vixente, así como o procedemento de solicitude e autorización.
O procedemento de solicitude e autorización regúlase segundo as cláusulas incorporadas á presente resolución.
Este procedemento substitúe o aprobado mediante Resolución do 22 de outubro de 2018, publicada no Diario Oficial de Galicia número 125, do 2 de xullo de 2018.
• Abrir o prazo de presentación de solicitudes a partir o día seguinte á publicación no Diario Oficial de Galicia da presente resolución, o cal quedará aberto.
As solicitudes terán que ser presentadas coa antelación mínima indicada na cláusula oitava da presente resolución para que poidan ser admitidas a trámite.
Conta esta resolución, que pon fin á vía administrativa, poderase interpor recurso contencioso-administrativo ante o Xulgado do Contencioso-Administrativo de Santiago de Compostela no prazo de dous (2) meses contados desde o día seguinte ao da notificación desta resolución.
Non obstante, os interesados poderán interpor contra esta resolución recurso potestativo de reposición, no prazo dun (1) mes contado a partir do día seguinte ao desta publicación, ante o mesmo órgano que a ditou, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas.
Mediante este documento notifícase esta resolución segundo o exixido no artigo 40 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 8 de maio de 2020
Susana Lenguas Gil
Presidenta de Portos de Galicia
Claúsulas que regulan o procedemento
Primeira. Obxecto e ámbito de aplicación
O obxecto é establecer o procedemento de autorización de ocupación de dominio público portuario competencia da Comunidade Autónoma de Galicia con destino á realización de espectáculos públicos e actividades recreativas (código do procedemento administrativo: IF500A). Defínense no presente procedemento a tipoloxía de eventos autorizables e os criterios xerais que regularán a autorización da celebración de espectáculos públicos ou actividades recreativas que se van desenvolver nos portos suxeitos á xestión da entidade pública empresarial Portos de Galicia.
Enténdese por espectáculos públicos as representacións, exhibicións, actuacións, proxeccións, competicións ou audicións de concorrencia pública, de carácter artístico, cultural, deportivo ou análogo.
Enténdese por actividades recreativas aquelas que ofrecen ao público, espectadores ou participantes, actividades, produtos ou servizos con fins de ocio, recreo ou entretemento.
Segunda. Normativa
A normativa de aplicación para ocupación de dominio publico para desenvolvemento de espectáculos públicos e actividades recreativas é, entre outra:
– Lei 6/2017, do 12 de decembro, de portos de Galicia.
– Regulamento de servizo, policía e réxime dos portos adscritos á Comunidade Autónoma.
– Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia.
– Decreto 227/1995, do 20 de xullo, que recolle o Regulamento do ente público Portos de Galicia.
– Lei 10/2017, do 27 de decembro, de espectáculos públicos e actividades recreativas de Galicia.
– Lei 9/2013, do 19 de decembro, do emprendemento e da competitividade económica de Galicia.
– Decreto 124/2019, do 5 de setembro, polo que se aproba o Catálogo de espectáculos públicos, actividades recreativas e establecementos abertos ao público da Comunidade Autónoma de Galicia e se establecen determinadas disposicións xerais de aplicación na materia.
Ademais, de ser o caso, será de aplicación a seguinte normativa:
– Lei 22/1988, de 28 de xullo, de costas.
– Decreto 876/2014, do 10 de outubro, polo que se aproba o Regulamento de costas.
– Decreto 130/2013, do 1 de agosto, que regula a explotación dos portos deportivos e das zonas portuarias de uso náutico-deportivo de competencia da Comunidade Autónoma de Galicia.
– Decreto 144/2016, do 22 de setembro, que aproba o Regulamento único de regulación integrada de actividades económicas e apertura de establecementos.
– Lei de tráfico de 2015, aprobada polo Real decreto lexislativo 6/2015, do 30 de outubro.
– Regulamento xeral de circulación de 2003, aprobado polo Real decreto 1428/2003, do 21 de novembro.
– Real decreto 2816/1982, do 27 de agosto, polo que se aproba o Regulamento xeral de policía de espectáculos públicos e actividades recreativas.
– Decreto 8/2010, do 21 de xaneiro, que regula a actividade de control de acceso a espectáculos públicos e actividades recreativas.
– Lei 10/1990, do 15 de outubro, do deporte.
– Lei 3/2012, do 2 de abril, do deporte de Galicia 2012.
– Demais normativa de pertinente aplicación.
Terceira. Órgano competente
A autorización de ocupación de superficies portuarias necesarias para a celebración de espectáculos públicos ou actividades recreativas, outorgados a título precario e con carácter ocasional e esporádico, será competencia da Presidencia de Portos de Galicia.
No obstante, segundo a Resolución do 25 de febreiro de 2019 de delegación de competencias do presidente ás xefaturas de zona, publicada no Diario Oficial de Galicia número 51, do 13 de febreiro de 2019, a resolución de autorizacións para utilización de instalación portuarias para celebración de espectáculos públicos ou actividades recreativas queda delegada no xefe de zona de Portos de Galicia correspondente a onde se produza este tipo de eventos.
Cuarta. Tipos de eventos
Segundo as definicións establecidas no artigo 4 do Decreto 124/2019, do 14 de outubro, que aproba o Catálogo de espectáculos públicos e actividades recreativas da Comunidade Autónoma de Galicia, a presente resolución regulará os eventos e actividades recreativas en espazos abertos. De acordo co artigo 3.e) da Lei 10/2017, do 27 de decembro, enténdese por espazos abertos ao público os lugares de titularidade pública, incluída a vía pública, ou de propiedade privada, onde ocasionalmente se leven a cabo espectáculos públicos ou actividades recreativas e que non dispoñen de infraestruturas nin instalacións fixas para facelo.
Segundo o citado artigo 4, mediante as presentes bases regularanse exclusivamente a tipoloxía de espectáculo publico e as actividades recreativas ocasionais, e dicir, aquelas que se celebren en establecementos abertos ao público ou espazos abertos ao público, a que se refire o artigo 3.d) e e) da Lei 10/2017, do 27 de decembro, durante períodos de tempo iguais ou inferiores a 3 meses, en cómputo global anual.
E en canto a súa catalogación, segundo as definicións incluídas Decreto 124/2019, mediante a presente resolución poderán autorizarse nos portos e instalación portuarias dependentes da Comunidade Autónoma os espectáculos públicos e actividades recreativas indicados no anexo do citado decreto (I. Espectáculos públicos; II. Actividades recreativas), agás as seguintes:
• Espectáculos taurinos (I.3).
• Espectáculos circenses (I.4).
• Espectáculos pirotécnicos (I.7), quedan excluídos desta prohibición os fogos de artificio incluídos na definición da actividade recreativa II.5. Festas e verbenas populares.
• Xogos de sorte, envite ou azar (II.6).
• Actividades de restauración (II.7), quedan excluídas desta prohibición as actividades de hostalaría e restauración incluídas na definición da actividade recreativa II.5. Festas e verbenas populares ou as inherentes aos espectáculos públicos I.6. Espectáculos feirais e de exhibición.
• Actividades zoolóxicas, botánicas e xeolóxicas (II.8).
Inclúese como anexo V o catálogo de actividades e as súas definicións.
Quinta. Zonas dos portos en que se admitirán as actividades recollidas nesta resolución
Cada un dos portos dependentes de Portos de Galicia divídese en áreas funcionais definidas segundo o seu grao de actividade portuaria. En función da zona poderán limitarase as tipoloxías de espectáculos públicos ou actividades recreativas ou limitarse a súa capacidade, se se considera necesario nas condicións particulares da autorización.
A cartografía de cada porto coas zonas funcionais definidas nesta resolución está á disposición dos solicitantes na páxina web de Portos de Galicia, no seguinte enlace:
http://www.portosdegalicia.gal/solicitude_espectaculos
Zona de actividade portuaria alta (vermella): zona con alta actividade portuaria en que a realización de espectáculos públicos e actividades recreativas intensivas poderían causar importantes interferencias á actividade portuaria ordinaria. Nestas áreas unicamente poderán autorizarse espectáculos e actividades tipificados como espectáculos deportivos (I.5) relacionados coa náutica, espectáculos feirais e de exhibición (I.6) ou actividades deportivas (II.2) relacionados coa náutica, que se xustifique que non poidan ser desenvoltas noutras zonas e que non supoñan unha ocupación estable, senón unicamente unha ocupación puntual inferior a 24 horas continuadas. Só se permitirán as instalacións portátiles ou desmontables por períodos de ata 48 horas continuadas se estas están vinculadas á realización dun evento na lámina de auga e se necesitan para prestar os servizos en terra, e non cause interferencias á actividade portuaria. En ningún caso se permitirá nesta zona a instalación de atraccións de feira.
Inclúense neste bloque as instalacións portuarias menores que, polas súas características físicas, dimensións e capacidade, non son compatibles con este tipo de eventos, agás actividades ocasionais con ocupacións inferiores a 24 horas continuadas e que non precisen de instalacións portátiles ou desmontables. Será de aplicación a excepcionalidade indicada no parágrafo anterior, relativa á instalacións portátiles ou desmontables por períodos de ata 48 horas continuadas, sempre que se cumpran os requisitos indicados.
Zona de actividade portuaria media (amarela): zona con actividade portuaria media en que a realización de espectáculos públicos e actividades recreativas intensivas poderían causar interferencias á actividade portuaria ordinaria. Nestas áreas poderán autorizarse, en xeral, os espectáculos e actividades indicados na condición 4 agás os espectáculos cinematográficos (I.1), Espectáculos teatrais e musicais (I.2) e atraccións recreativas (II.4), De xeito xeral, unicamente se autorizarán nestas zonas eventos que non supoñan unha ocupación estable, senón unicamente unha ocupación puntual inferior a 24 horas continuadas, que non inclúan instalacións portátiles ou desmontables.
Nestas zonas podería autorizarse ocupación de ata 48 horas continuadas para instalacións de carpas ou espazos a cubertos con superficie inferior a 100 m2, que sexan necesarios para o desenvolvemento do espectáculo público ou actividade recreativa sempre que non cause interferencias á actividade portuaria. En ningún caso se permitirá nesta zona a instalación de atraccións de feira.
Zonas con limitación de sobrecargas (azul): estas zonas son as que, pola súa tipoloxía estrutural e deseño construtivo, non admiten estar expostas a sobrecargas. Polo tanto, prohibirase a realización de calquera tipo de espectáculos públicos e actividades recreativas, ou calquera tipo de aglomeración que comprometa a súa estabilidade. Para evitar a concentración de persoas nestes espazos, o titular da autorización incluirá no seu plan de seguridade a limitación de accesos a estas zonas, e a difusión das medidas de seguridade aos posibles transeúntes que accedan con motivo do desenvolvemento do evento autorizado.
Zona de actividade portuaria baixa (verde): zona con actividade portuaria baixa en que a realización de espectáculos públicos e actividades recreativas intensivas non se considera que poidan causar interferencias á actividade portuaria ordinaria. Estas zonas corresponderanse coas áreas definidas como non estritamente portuarias no correspondente documento de Delimitación de Espazos e Usos Portuarios (DEUP) aprobado ou en trámite, ou aquelas indicadas nos planos anexos ás presentes bases no suposto de que o porto non conte con DEUP ou non recolla este tipo de superficies, e que estean dotadas dun tratamento urbano. Tamén se inclúen nestas zona aquelas que, malia ter actividade portuaria, pola súa configuración permiten a realización deste tipo de eventos puntais e esporádicos sen causar interferencias á actividade portuaria ordinaria.
Nestas areas poderán autorizarse, en xeral, os espectáculos e actividades indicados na condición 4, incluso aqueles que recollan unha ocupacións con instalacións portátiles ou desmontables.
Non obstante, a ocupación destas zonas estará condicionada á súa compatibilidade coas actividades portuarias sobrevidas, así como ao cumprimento das medidas de seguridade en condicións ordinarias e extraordinarias, de ser o caso.
A zonificación enténdese como áreas globais con límites aproximados en que deberán respectarse as ocupacións autorizadas mediante concesión, autorización ou outro título administrativo, e os seus accesos, que non poderán ser bloqueados ou dificultados. Así mesmo, tamén deberán deixarse libres de ocupacións as vías de circulación, as cales non poderán ser cortadas sen a autorización previa de Portos de Galicia e un plan viario alternativo.
A autorización limitarase exclusivamente á ocupación do espazo incluído na zona de servizo do porto necesario para a realización do espectáculo público ou actividade recreativa, no tempo exclusivamente necesario para a celebración do evento e montaxe e desmontaxe de instalacións, de ser o caso, prohibíndose expresamente a instalación de elementos portátiles ou desmontables destinados a residencia o habitación ocasional dos participantes no espectáculo público ou actividade recreativa. Para garantir este aspecto, na memoria de actividade que se presente xunto coa solicitude, o responsable da organización describirá con que medios conta para aloxar estes traballadores. O incumprimento desta condición constituirá causa de extinción da autorización, incoación do correspondente expediente sancionador e penalizacións para o outorgamento de posteriores autorizacións. Portos de Galicia aplicará, nese caso, as regras e contías establecidas na Lei 6/2003 para as ocupación realizadas sen autorización.
Ben que non se admiten os espectáculos pirotécnicos (I.7), si se permitirá a realización de lanzamento de fogos de artificio vinculados a festas e verbenas populares (actividade recreativa II.5). O lanzamento dos ditos fogos de artificio realizarase preferentemente desde os puntos indicados nos planos do anexo, de ser o caso.
Sexta. Entidades solicitantes
Poderán formalizar a solicitude persoas xurídicas e as entidades sen personalidade xurídica públicas ou privadas, e non será posible a súa presentación por parte de persoas físicas.
Sétima. Forma, lugar e prazo de presentación de solicitudes
As solicitudes presentaranse obrigatoriamente por medios electrónicos a través do formulario normalizado (anexo I), dispoñible na sede electrónica da Xunta de Galicia, https://sede.xunta.gal.
Se algunha das persoas interesadas presenta a súa solicitude presencialmente, requirirase para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.
Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).
O prazo de presentación é a partir do día seguinte ao da publicación no DOG da presente resolución, o cal quedará aberto desde a mencionada data.
A solicitudes terán que ser presentadas coa antelación mínima á realización do espectáculo público ou actividade recreativa, indicada na condición oitava.
Oitava. Tramitación da solicitude
1. Para que a solicitude poida ser tida en conta, en xeral, deberá ser presentada cunha anterioridade mínima de dous (2) meses ao inicio do evento, contado desde o primeiro día en que se solicite a ocupación do espazo portuario.
No caso concreto de espectáculos deportivos vinculados a náutica (Espectáculo público I.5), as solicitudes deberán presentarse a lo menos quince (15) días hábiles antes da celebración do evento ou do inicio da montaxe das instalacións que fosen necesarias, de ser o caso.
2. No suposto de que a data de celebración do evento estea prevista nun prazo inferior ao prazo mínimo de formalización de solicitudes establecido na presente resolución, a solicitude e a documentación requirida deberá presentarse nun prazo máximo de 10 días naturais desde o día seguinte ao da súa publicación do anuncio no Diario Oficial de Galicia, e, en todo caso, cinco días hábiles antes da data prevista para a celebración do evento, do contrario non será admitida a trámite a solicitude.
Unicamente poderán ser admitidas a trámite as solicitudes presentadas fóra do prazo establecido na convocatoria pública cando se trate de eventos promovidos e patrocinados por administracións publicas ou corporacións que participen desta natureza, e entidades privadas, sempre que se xustifique que teñan un carácter sobrevido dificilmente previsible. Neste caso, o solicitante deberá achegar, na memoria de actividade anexa á solicitude, xustificación da excepcionalidade da causa que xustifique a presentación fóra de prazo. Portos de Galicia valorará en cada caso a admisión a trámite da solicitude.
En todo caso, as solicitudes deberán presentarse como mínimo 5 días hábiles antes do inicio da ocupación, xa que, do contrario, non serán admitidas a trámite.
3. Recibida a solicitude de autorización e a documentación anexa, Portos de Galicia analizará o cumprimento da normativa aplicable para os efectos da ocupación do dominio público portuario, e requirirá, cando proceda, os solicitantes para a súa emenda. Entenderase que se desiste da solicitude cando o solicitante non atenda o requirimento de documentación realizado por Portos de Galicia para a emenda da documentación no prazo establecido para iso.
Novena. Documentación complementaria
1. As persoas interesadas deberán achegar coa solicitude a seguinte documentación
a) Modelo de presentación, anexo I, debidamente cuberto. O dito modelo está á disposición dos solicitantes na sede electrónica da Xunta de Galicia procedemento IF500A.
b) O proxecto e a documentación técnica que resulte exixible segundo a natureza da actividade. Para estes efectos, enténdese por proxecto o conxunto de documentos que definen as actuacións para desenvolverse, co contido e detalle que permita á Administración coñecer o seu obxecto e determinar o seu axuste á normativa urbanística e sectorial de aplicación. O proxecto e a documentación técnica redactaraos e asinaraos a persoa técnica competente. Incluirá plan de tráfico alternativo, no suposto de solicitar o corte de vías portuarias.
c) Plano do porto en que se indique a localización concreta do espectáculo público ou actividade para a que se solicita a autorización, no cal se especifique a extensión da zona de dominio público portuario que se vai ocupar e as datas e prazo en que se pretende desenvolver. Deberá achegarse soporte gráfico en que se identifique con claridade o ámbito e a superficie solicitada.
Poderá descargarse a cartografía de cada porto, con indicación de cada unha das zonas definidas nestas bases no enlace:
http://www.portosdegalicia.gal/solicitude_espectaculos
d) O documento acreditativo asinado polo/a interesado/a de a designación da persoa física ou xurídica que debe asumir a responsabilidade técnica da execución do proxecto e que debe expedir a certificación que acredite a adecuación do espectáculo público ou actividade recreativa aos requisitos exixibles, achegando o anexo II debidamente cuberto.
e) Para a celebración de espectáculos públicos e actividades recreativas que requiran a montaxe de estruturas non permanentes desmontables, será preciso acompañar o documento acreditativo da designación, por quen presente a declaración, da persoa física ou xurídica que debe asumir a responsabilidade técnica da montaxe da instalación, para o que se achegará o anexo II debidamente cuberto.
f) Para a realización de espectáculos deportivos ou actividades recreativas náuticas que impliquen a ocupación da lámina de auga, deberase achegar informe favorable da Capitanía Marítima, ou do distrito marítimo correspondente, ou xustificante de telo solicitado.
g) Para a realización de lanzamento de fogos de artificio vinculados a festas e verbenas populares deberase achegar informe favorable da subdelegación de Goberno correspondente, ou xustificante de telo solicitado.
h) Taxas administrativas devindicadas pola tramitación da solicitude. Taxa 30.40.01 da Lei 6/2003 de taxas, prezos e exaccións reguladoras da Comunidade Autónoma.
Esta taxa responde á tramitación da solicitude, será ademais de aplicación as que correspondan pola ocupación de terreo portuario, taxa E-2, contida na subepígrafe 01 da epígrafe 99 do anexo 3 da Lei 6/2003, e, se é o caso, as restantes taxas portuarias que sexa de aplicación, segundo o indicado na cláusula décimo quinta. Estas taxas por ocupación de superficie, e, se é o caso, polo uso doutras instalación portuarias, será fixada na autorización que proceda, segundo o modelo do anexo IV, e será liquidada, posteriormente, por Portos de Galicia.
i) Portos de Galicia poderá requirir outros documentos complementarios se o considera necesario e a súa exixencia estea xustificada por razón imperiosa de interese xeral.
Se a entidade solicitante ten previsto organizar máis dun espectáculo público ou actividade recreativa nun porto dependente de Portos de Galicia, poderá realizar de xeito conxunto a solicitude de varios eventos para realizar ao longo do ano. Neste caso, a fianza e seguros exixibles poderanse formalizar de forma única para todos eles sempre e cando as coberturas mínimas exixibles queden garantidas e o importe da fianza sexa o mínimo exixible para cada un dos eventos. Neste caso, ademais de indicar no modelo normalizado a totalidade dos eventos programados, con indicación das datas previstas, deberase achegar por cada evento a documentación indicada nos puntos anteriores.
2. A documentación complementaria deberá presentarse electronicamente. As persoas interesadas responsabilizaranse da veracidade dos documentos que presenten. Excepcionalmente, a Administración poderá requirir a exhibición do documento orixinal para o cotexo da copia electrónica presentada.
Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica.
Para estes efectos, considerarase como data de presentación aquela en que fose realizada a emenda.
3. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
4. No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
Décima. Comprobación de datos
1. Para a tramitación deste procedemento consultaranse automaticamente os datos incluídos nos seguintes documentos elaborados polas administracións públicas:
a) DNI/NIE da persoa representante.
b) NIF da entidade solicitante.
c) Certificado de inscrición de asociacións.
d) Certificado acreditativo da xunta directiva de asociacións.
e) Certificado de estar ao día do pagamento de obrigas tributarias coa AEAT.
f) Certificado de estar ao día do pagamento coa Seguridade Social.
g) Certificado de estar ao día no pagamento das débedas coa Administración pública da Comunidade Autónoma.
2. No caso de que as persoas interesadas se opoñan a esta consulta, deberán indicalo no recadro correspondente habilitado no formulario de inicio e achegar os documentos.
3. Excepcionalmente, no caso de que algunha circunstancia imposibilite a obtención dos citados datos poderase solicitar ás persoas interesadas a presentación dos documentos correspondentes.
Décimo primeira. Resolución da solicitude
1. Recibidas as solicitudes, e unha vez analizada a documentación achegada, a adaptación do evento á presente resolución e a dispoñibilidade de terreos portuarios e calquera outro condicionante, resolverase a solicitude autorizándoa ou denegándoa, segundo proceda.
Segundo o disposto no artigo 62.4 da Lei 6/2017, de portos de Galicia, o prazo máximo para resolver o expediente será de tres (3) meses, transcorrido este sen que se dite resolución expresa, a correspondente solicitude entenderase desestimada.
2. Considerando as características deste tipo de autorización, por razóns de eficacia, a resolución para autorizar ou denegar a solicitude está delegada nas xefaturas de zona, segundo resolución de delegación indicada na condición terceira do presente documento, e baixo as condicións xerais reflectidas no anexo IV.
3. Na autorización fixarase a contía mínima da garantía económica que hai que depositar e o prazo establecido para iso. Esta contía fixarase en función da superficie portuaria que se vai ocupar e da natureza xurídica do solicitante, e cubrirá as responsabilidades polos danos que se poidan ocasionar na zona, así como pola deficiencia na limpeza posterior á finalización do evento, así como o pagamento das taxas correspondentes. Esta garantía será depositada na Caixa Xeral de Depósitos da Comunidade Autónoma de Galicia a favor de Portos de Galicia no prazo fixado para iso na autorización e, en todo caso, con anterioridade ao comezo da montaxe do evento. As contías da garantías son as establecidas no anexo III.
4. Na autorización fixarase a contía da póliza de seguro que se vai constituír de xeito específico para o evento, a súa contía fixarase en función do disposto na disposición transitoria terceira da Lei 10/2017, en canto non exista desenvolvemento regulamentario, e cubrirá a responsabilidade civil que sexa imputable, directa, solidaria ou subsidiariamente, as persoas titulares dos establecementos abertos ao público ou as persoas organizadoras dos eventos públicos ou das actividades recreativas, de tal maneira que poida responder dos danos persoais e materiais e dos prexuízos ocasionados ás persoas usuarias ou asistentes e a terceiras persoas e os seus bens, ou a propia instalación portuaria.
No suposto de que se inclúan instalacións ou estruturas eventuais portátiles ou desmontables, deberase achegar, ademais, xustificante de ter formalizado o seguro por parte da persoa propietaria ou arrendataria da instalación cun capital mínimo de 150.000 € por cada instalación.
5. No caso de precisar fornecemento eléctrico a rede municipal, exixirase a presentación do boletín de industria validado pola conselleira competente.
6. Para acreditar a formalización do seguro de responsabilidade civil específico para o evento, deberá presentarse no prazo establecido na autorización certificación da compañía aseguradora ou do axente de seguros cuxo contido mínimo sexa o seguinte:
• Identificación da compañía aseguradora ou do axente de seguros e da persoa que actúa en representación.
• Número da póliza de seguro.
• Mención expresa da cobertura de responsabilidade civil e a vixencia temporal do seguro.
• Identificación do espectáculo ou actividade que se vai celebrar, que se corresponderá co evento solicitado.
• Porto e municipio onde esta previsto o evento asegurado.
• Contía do capital asegurado e da franquía, de ser o caso.
• Data de pagamento da póliza que acredite a súa formalización.
• Data de expedición do certificado, asinado polo titular ou representante legal.
7. Toda a documentación requirida na autorización de ocupación de dominio público deberá estar presentada en Portos de Galicia no prazo establecido na autorización, e, en todo caso, antes da celebración do evento, xa que, do contrario, a autorización quedará extinguida por desistencia do solicitante.
8. En cumprimento do artigo 41 e seguintes da Lei 9/2013, do emprendemento e da competitividade económica de Galicia, deberá o solicitante acadar de xeito coordinado a oportuna licenza municipal, a cal será exixida por Portos de Galicia no condicionado da autorización outorgada para os efectos exclusivos da ocupación de dominio público portuario de titularidade autonómica. A falta de presentación será causa de revogación automática da autorización, agás nos seguintes supostos:
a) Festas e verbenas populares organizadas por agrupacións ou asociacións de veciños ou comisión de festas. Neste caso solicitarase declaración responsable ou licenza, segundo proceda.
Segundo o disposto na disposición adicional cuarta da Lei 10/2017, para as festas e verbenas populares organizadas por agrupacións ou asociacións de veciños/as ou comisións de festas, será requirida a presentación dunha declaración responsable dirixida ao concello e formulada polos veciños o veciñas representantes da agrupación, asociación ou comisión en que se relate o programa de actividades que se van realizar e as súas características. Esta debe ir acompañada do compromiso de formalizar o seguro previsto na Lei 10/2017, ou documentación acreditativa de dispoñibilidade.
Se as citadas actividades recollen a montaxe de instalacións suxeitas a declaración responsable ou a licenza, esta será solicitada pola persoa titular da instalación.
b) Festas e verbenas populares organizadas polo concellos.
En aplicación do disposto no artigo 41 da Lei 9/2013, en relación a necesaria protección da seguridade e saúde pública, dos dereitos das persoas consumidoras e usuarias, do mantemento da orde pública, así como da adecuada conservación do ambiente e o patrimonio histórico artístico, en ausencia de obriga de obter licenza incluirase esta obriga como condición da autorización.
9. Entenderase que o solicitante acepta as condicións da autorización se no prazo máximo de 10 días desde a súa recepción, e en todo caso antes da celebración do evento, non presenta manifestación en contra.
Décimo segunda. Control e organización do espectáculo público ou actividade recreativa
O organizador asume en exclusiva a responsabilidade na disposición e na aplicación de medidas preventivas respecto á circulación pola zona portuaria de persoas non relacionadas coas actividades portuarias e en adoptar as condicións de seguridade pertinentes en previsión da afluencia de persoas aos actos programados.
Durante o período de celebración e actos preparatorios será responsabilidade do organizador o imposibilitar, con medidas de peche e control suficientes, que vehículos alleos ás actividades obxecto desta autorización accedan á zona portuaria.
Non obstante, a realización das actividades autorizadas non poderá obstaculizar as operacións e actividades portuarias ordinarias.
Ademais, está prohibido verter residuos ou outros obxectos nas augas do porto, quedando o infractor suxeito ao disposto na lexislación vixente sobre a materia.
Dada a previsible afluencia de persoas que acudan ás actividades programadas, o organizador deberá ter en conta que será responsable da seguridade das persoas que participen nelas, para o que deberá adoptar as medidas preventivas oportunas segundo o proxectado na fase de obtención de permisos e licenzas, segundo o previsto na Lei 9/2013. Así mesmo, deberá informar ao público en xeral de que se atopa en ámbito portuario.
A seguridade dos espectadores e dos participantes será responsabilidade exclusiva do organizador do evento en cuestión en canto a caídas ou a calquera outro accidente que puidese ocorrer con motivo da celebración dos actos programados. As vías e aparcadoiros deberán quedar libres para os vehículos relacionados cos eventos e, particularmente, para os de urxencia sanitaria, de seguridade e protección das persoas. Os espazos autorizados que se van ocupar xunto ao cantil do peirao limitaranse con cerramento ou con cinta de forma clara, e non deberá superar a superficie autorizada.
Os organizadores, ademais de manter a limpeza das zonas ocupadas, deberán facerse cargo da recollida do exceso de residuos que se forme, ademais de ser os responsables da retirada de todas as pancartas e carteis sobre paredes e mobiliario urbano que puidesen xerarse debido á celebración.
O organizador, finalizada a utilización, deixará as superficies, útiles, locais e elementos en perfectas condicións de limpeza e funcionamento.
No caso de que se producise calquera tipo de estragos nas instalacións portuarias, ou non se deixase en perfecto estado de limpeza, estes deberán ser emendados polo organizador no prazo que se estableza para iso ou, como máximo, no prazo de 24 horas para a limpeza e dun mes para as reparación. Se non se realizan estes, Portos de Galicia procederá, por execución subsidiaria, á súa reparación, remitirá as facturas correspondentes para o seu aboamento ao organizador do evento e incautará a fianza depositada, de ser o caso.
Décimo terceira. Fornecementos
A instalación eléctrica necesaria para o desenvolvemento do evento deberá cumprir coas disposicións do Regulamento electrotécnico de baixa tensión, aprobado polo Real decreto 842/2002, do 2 de agosto, e da Orde do 23 de xullo de 2003 que regula o Regulamento electrotécnico de baixa tensión, que regula as condicións básicas dos contratos de adquisición de enerxía e de acceso ás redes de baixa tensión e demais normativa complementaria.
O fornecemento de enerxía poderá realizarse a través da acometida á rede xeral mediante a oportuna tramitación coa compañía subministradora de enerxía, solicitando o correspondente enganche, para o cal deberá presentar, de ser o caso, un proxecto técnico na Consellería de Industria e obter o boletín da instalación eléctrica.
Unha vez realizada a instalación de B.T. por un instalador autorizado que se axuste ao proxecto e atenda á demanda solicitada de fornecemento, e dentro do prazo establecido para iso e en todo caso antes de que se produza o evento, a entidade solicitante deberá remitir a Portos de Galicia o boletín de enganche validado pola consellería con competencias na materia.
Tamén se poderá acadar o fornecemento mediante instalación dun/duns xerador/es eléctrico/s insonorizado/s, capaz/ces de fornecer a potencia total da instalación e equipamentos de urxencia.
En ningún caso se permitirá a conexión directa a liñas portuarias. O incumprimento desta condición será causa de extinción da autorización, incoación do correspondente expediente sancionador e penalización para o outorgamento de autorizacións en sucesivas edicións.
No suposto de precisar acometida de auga para a celebración do evento, deberase solicitar a acometida á rede municipal, non será posible acometer a redes portuarias agás que fose solicitado expresamente, e esta acometida sexa debidamente autorizada por Portos de Galicia. Neste caso será preceptivo a inclusión da indicación concreta do punto de enganche autorizado na propia autorización, con indicación do número de contador ou boca de rego autorizada.
Décimo cuarta. Normas de contaminación acústica
O organizador deberá cumprir coas normas de ruído e de contaminación acústica aplicables, o seu incumprimento será causa de revogación da autorización.
Décimo quinta. Aboamento das taxas portuarias
A ocupación do dominio público está sometida ao aboamento das taxas que corresponda en función do tipo de evento e ocupación, segundo o disposto na Lei 6/2003 de prezos, taxas e exacción reguladoras da Comunidade Autónoma de Galicia.
Na autorización fixaranse as taxas xerais e específicas que correspondan e a súa contía para o evento solicitado.
No caso concreto da ocupación de superficie a tarifa que se vai aplicar e a E-2 almacenaxe, locais e edificios para ocupacións de superficie destinada a usos non relacionados directamente coas actividades portuarias, cuxas contías se fixan en función do grupo a que pertence o porto e os días de ocupación segundo a seguinte táboa (valores referidos a 2020, susceptible de actualización anual):
|
Zona terrestre |
Grupo A |
Grupo B |
Grupo C |
|
Días 1 ao 10 |
0,105314 |
0,070840 |
0,053134 |
|
Días 11 e seguintes |
0,212540 |
0,141680 |
0,106268 |
|
Zona de lámina de auga |
Grupo A |
Grupo B |
Grupo C |
|
A menos de 20 m do cantil |
0,743721 |
0,495316 |
0,371856 |
|
A máis de 20 m do cantil |
0,339935 |
0,226427 |
0,170246 |
En todo caso, a taxa E-2 aplicable será a vixente para o exercicio en que se produza a ocupación.
Non se liquidará a taxa E-2 cando a ocupación do espectáculo público ou actividade recreativa se produza en superficies concesión outorgadas a favor do solicitante do evento, naquelas superficies que formen parte do ámbito concesional. A autorización da celebración do evento nestas superficies concesionadas quedará supeditada a compatibilidade co uso para o cal foi outorgada a concesión ademais dos restantes condicionantes indicados na presente resolución.
No suposto de que fose precisa a utilización de infraestruturas portuarias de atracada, serán de aplicación, ademais, as tarifas X-1, X-2 ou X-5 segundo a tipoloxía da embarcación.
A autorización suporá a reserva do espazo para as datas solicitadas, polo que devindicará a taxa aínda que non se produza a ocupación efectiva, agás que sexa notificada con carácter previo á data do evento autorizado a súa renuncia. A superficie que se vai solicitar deberá incluír non só os espazos estritamente ocupados polos elementos, equipamentos ou estruturas que se van instalar, senón as explanadas, vías ou zonas urbanizadas nas que se prevexa o desenvolvemento do espectáculo ou da actividade, incluíndo todo aquel o espazo onde se prevexa aloxar a capacidade prevista de asistentes.
O período de tempo que se tomará para o cálculo da taxa incluirá o tempo necesario para realizar a montaxe e posterior desmantelamento da instalación, prolongando o período de devindicación ata que se complete o desaloxo total da instalación portuaria.
No suposto de que o solicitante desista da ocupación, deberá comunicalo con anterioridade á data autorizada á xefatura de zona correspondente, quedará, deste xeito, anulada a autorización e, polo tanto, o feito impoñible que motivaba a devindicación das taxas.
No suposto de que a superficie realmente ocupada polo evento sexa maior da autorizada, ou por máis tempo do autorizado, unha vez realizadas as comprobacións oportunas pola xefatura de zona correspondente, liquidarase a ocupación real producida. A superficie computada para os efectos do aboamento das taxas incluirá as explanadas, vías ou zonas urbanizadas en que se desenvolveu o espectáculo ou a actividade, incluíndo todo aquel o espazo destinado a aloxar o número de asistentes.
A realización do espectáculo público ou actividade recreativa sen a oportuna autorización, ou contando con ela pero non tendo cumprido o seu condicionado, non exime do aboamento da taxa portuaria, á marxe da incoación do expediente sancionador correspondente. Portos de Galicia aplicará, nese caso, as regras e contías establecidas na Lei 6/2003 para as ocupación realizadas sen autorización.
Décimo sexta. Contido da autorización precarial de ocupación de dominio público portuario
As autorización de ocupación de dominio público portuario outorgaranse segundo o modelo de autorización incluído no anexo IV, en que se reflicten as condicións xerais que rexerán a autorización, e poderanse incorporar, ademais, as condicións particulares que en función da actividade se consideren necesarias. A autorización conterá, polo menos, o seguinte:
a) O nome, razón social, número ou código de identificación fiscal de quen teña a titularidade.
b) A denominación da actividade.
c) O porto e localización do evento.
d) A data de outorgamento da autorización e o período polo cal se autoriza.
e) O tipo de actividade recreativa ou espectáculo público autorizado.
f) Descrición e número das instalacións portátiles ou desmontables.
g) A capacidade máxima estimada, os efectos do cálculo do seguro de responsabilidade civil.
h) Superficie de dominio público cuxa ocupación se autoriza.
i) Condicións de protección do ambiente que, se é o caso, procedan.
j) A taxa E-2 contida na subepígrafe 01 da epígrafe 99 do anexo 3 da Lei 6/2003 (incluída no bloque 32.99.02), e as demais taxas portuarias que, se é caso, sexan de aplicación.
k) Importe da garantía que se vai constituír.
l) Importe do seguro de responsabilidade civil que se vai formalizar.
m) Outra documentación con carácter previo a celebración do evento.
n) Causas de revogación.
o) Calquera outro dato que se considere oportuno en función da normativa de aplicación e/ou das condicións singulares en función da tipoloxía da actividade ou espectáculo.
Décimo sétima. Notificación
1. As notificacións de resolucións e actos administrativos practicaranse só por medios electrónicos, nos termos previstos na normativa reguladora do procedemento administrativo común.
2. As notificacións electrónicas realizaranse mediante o Sistema de notificación electrónica de Galicia-Notifica.gal dispoñible a través da sede electrónica da Xunta de Galicia (https://sede.xunta.gal). Este sistema remitirá ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.
3. Neste caso, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e do sector público autonómico. En todo caso, a Administración xeral poderá, de oficio, crear o indicado enderezo, para os efectos de asegurar o cumprimento polas persoas interesadas da súa obriga de relacionárense por medios electrónicos.
4. As notificacións entenderanse practicadas no momento en que se produza o acceso ao seu contido, entendéndose rexeitada cando transcorresen dez días naturais desde a posta á disposición da notificación sen que se acceda ao seu contido.
5. Se o envío da notificación electrónica non é posible por problemas técnicos, a Administración xeral e do sector público autonómico practicará a notificación polos medios previstos na normativa reguladora do procedemento administrativo común.
Décimo oitava. Extinción das autorizacións de ocupación de dominio público
As autorizacións extínguense polos seguintes motivos:
a) Por ter finalizado o espectáculo público ou a actividade recreativa.
b) Por cumprimento do prazo a que está sometida a actividade ou espectáculo público para o que se solicitou a autorización, nos casos en que proceda.
c) Por revogación da autorización.
d) Por renuncia de quen teña a súa titularidade. Neste caso, se se produce con carácter previo á data de autorización, non devindicará taxas.
Décimo novena. Revogación da autorización
As autorizacións poden revogarse nos seguintes supostos:
a) Por terse modificado substancialmente o ter desaparecido as circunstancias que determinaron a autorización, ou ter sobrevido outras novas que, en caso de ter existido, comportarían a súa denegación.
b) Por incumprimento por parte de quen teña a titularidade das autorizacións dos requisitos ou condicións en virtude dos cales lles foron outorgadas, e, en especial, as seguintes:
– Non acreditar antes da celebración do evento ter formalizado o depósito da fianza exixida. No suposto de que a entidade autorizada sexa un concello ou outra administración pública, se for o caso, poderá acreditarse a exención de formalización da garantía con base na normativa vixente.
– Non acreditar antes da celebración do evento ter formalizado o seguro de responsabilidade civil.
– Non acreditar antes da celebración do evento a obtención da licenza municipal ou, cando proceda, a declaración responsable, agás cando se trate de festas populares e verbenas organizadas polo concello, que está exenta.
– Incumprir as condicións da autorización que expresamente constitúan causa de revogación.
c) Polas causas indicadas na Lei 9/2013, do 19 de decembro, de emprendemento e da competitividade económica de Galicia.
d) Por necesidade sobrevida de utilización dos terreos para a actividade portuaria ou por causas climatolóxicas extremas.
e) Polas causas establecidas na normativa de portos e de costas.
A revogación da autorización non xera dereito a indemnización, agás que sexa causa imputable a Portos de Galicia.
Vixésima. Trámites administrativos posteriores á presentación de solicitudes
Todos os trámites administrativos que as persoas interesadas deban realizar durante a tramitación deste procedemento deberán ser realizados electronicamente accedendo á Carpeta cidadá da persoa interesada dispoñible na sede electrónica da Xunta de Galicia.
Disposición adicional primeira. Información básica sobre protección de datos persoais
Os datos persoais recadados neste procedemento serán tratados na súa condición de responsable pola Xunta de Galicia –entidade pública empresarial Portos de Galicia– coas finalidades de levar a cabo a tramitación administrativa que derive da xestión deste procedemento e a actualización da información e contidos da Carpeta cidadá. O tratamento dos datos baséase no cumprimento dunha misión de interese público ou no exercicio de poderes públicos, conforme a normativa recollida na ficha do procedemento incluída na Guía de procedementos e servizos, no propio formulario anexo e nas referencias recollidas en https://www.xunta.gal/informacion-xeral-proteccion-datos. Con todo, determinados tratamentos poderán fundamentarse no consentimento das persoas interesadas, reflectíndose esta circunstancia no devandito formulario.
Os datos serán comunicados ás administracións públicas no exercicio das súas competencias, cando sexa necesario para a tramitación e resolución dos seus procedementos ou para que os cidadáns poidan acceder de forma integral á información relativa a unha materia.
As persoas interesadas poderán acceder, rectificar e suprimir os seus datos, así como exercer outros dereitos ou retirar o seu consentimento, a través da sede electrónica da Xunta de Galicia ou, presencialmente, nos lugares e rexistros establecidos na normativa reguladora do procedemento administrativo común, segundo se explicita na información adicional recollida en https://www. xunta.gal/proteccion-datos-persoais.
Disposición adicional segunda. Actualización de modelos normalizados
Os modelos normalizados aplicables na tramitación do procedemento regulado na presente disposición poderán ser modificados co obxecto de mantelos actualizados e adaptados á normativa vixente. Para estes efectos, será suficiente a publicación destes modelos adaptados ou actualizados na sede electrónica da Xunta de Galicia, onde estarán permanentemente accesibles para todas as persoas interesadas.
Disposición derradeira. Entrada en vigor
A presente resolución entrará en vigor o día seguinte ao da súa publicación no Diario Oficial de Galicia.
