Mediante a Resolución do 19 de decembro de 2019 establecéronse as bases reguladoras e a convocatoria de subvencións ás entidades locais da Comunidade Autónoma de Galicia para a promoción da igualdade, cofinanciadas polo Fondo Social Europeo, con cargo ao programa operativo FSE Galicia 2014-2020, e polo Pacto de Estado contra a violencia de xénero, para o ano 2020:

a) Programa de fomento da conciliación da vida persoal, laboral e familiar (procedemento SI435B).

b) Programa de promoción da igualdade entre mulleres e homes e de prevención e tratamento da violencia de xénero (procedemento SI435A).

c) Programa de apoio aos centros de información ás mulleres (procedemento SI427B).

d) Programa de sensibilización, información e difusión sobre igualdade e prevención da violencia contra as mulleres (procedemento SI435C), financiado con fondos procedentes do Pacto de Estado contra a violencia de xénero.

No DOG núm. 137, do 10 de xullo de 2020, publicouse Resolución do 1 de xullo de 2020, da Secretaría Xeral da Igualdade, pola que se resolven as subvencións previstas na Resolución do 19 de decembro de 2019, da Secretaría Xeral da Igualdade, pola que se establecen as bases reguladoras das subvencións ás entidades locais da Comunidade Autónoma de Galicia para a promoción da igualdade, de forma individual e mediante o sistema de xestión compartida, cofinanciadas polo Fondo Social Europeo, con cargo ao programa operativo FSE Galicia 2014-2020, e polo Pacto de Estado contra a violencia de xénero, e se procede á súa convocatoria no ano 2020. No anexo II da Resolución do 1 de xullo de 2020 figuraban as 47 solicitudes do programa de fomento da conciliación que, cumprindo os requisitos para seren beneficiarias das axudas, non se incluíron na proposta de concesión por terse esgotado o crédito dispoñible, para seren atendidas, de ser o caso, a través do crédito que quede sen comprometer por producirse algunha renuncia, por modificación nos proxectos inicialmente presentados ou por un incremento do crédito orzamentario dispoñible destinado a estas subvencións.

Mediante a Resolución do 6 de xullo de 2020, da Secretaría Xeral da Igualdade (DOG núm. 138, do 13 de xullo), ampliouse a dotación orzamentaria da Resolución do 19 de decembro de 2019, da Secretaría Xeral da Igualdade, pola que se establecen as bases reguladoras das subvencións ás entidades locais da Comunidade Autónoma de Galicia para a promoción da igualdade, de forma individual e mediante o sistema de xestión compartida, cofinanciadas polo Fondo Social Europeo con cargo ao programa operativo FSE Galicia 2014-2020, e polo Pacto de Estado contra a violencia de xénero, e se procede á súa convocatoria no ano 2020. O incremento da dotación será de 215.051,77 € na anualidade 2020, con cargo á aplicación orzamentaria 05.11.312G.460.1 (código de proxecto 2016.00018) consignada no estado de gastos dos orzamentos xerais da Comunidade Autónoma de Galicia para o ano 2020.

Segundo o artigo 17.3 das bases reguladoras, e de conformidade co establecido no artigo 45 da Lei 39/2015, do 1 de outubro, do procedemento administrativo común das administracións públicas, as resolucións destas subvencións serán obxecto de publicación no Diario Oficial de Galicia, a cal producirá os mesmos efectos da notificación.

Unha vez rematada a fase de instrución das solicitudes recibidas na Secretaría Xeral da Igualdade, avaliadas as solicitudes pola Comisión de Valoración prevista no artigo 15 das bases reguladoras, vista a proposta de resolución formulada polo órgano instrutor e tendo en conta as dispoñibilidades orzamentarias,

RESOLVO:

Primeiro. Conceder, logo da ampliación do crédito destinado a estas axudas, as subvencións para o financiamento do programa de fomento da conciliación das entidades locais que se indican no anexo, como consecuencia da aplicación dos criterios e pautas de valoración establecidas no artigo 16 das bases reguladoras, pola contía e para o desenvolvemento da actuación que figuran no anexo, por un importe total de 222.030,14 euros, na aplicación orzamentaria 05.11.312G.460.1, código do proxecto 2016 00018.

Lémbrase ás entidades beneficiarias que, de acordo co establecido no artigo 21.2 das bases reguladoras, se realizará un primeiro pagamento do 75 % da contía da subvención concedida, en concepto de pagamento anticipado, que se fará efectivo unha vez que se realice a notificación da resolución.

O 25 % restante, ou a parte que corresponda, librarase logo da xustificación polas entidades beneficiarias do cumprimento da finalidade para a cal se concedeu a subvención e demais condicións exixidas nesta resolución.

Así mesmo, de acordo co establecido no artigo 20.1 da convocatoria, a data límite para a presentación da documentación xustificativa da actuación subvencionada necesaria para proceder ao pagamento da subvención é a seguinte:

a) Programa de fomento da conciliación (SI435B): o prazo para presentar a xustificación das medidas subvencionadas ao abeiro destes programas finaliza o 9 de outubro de 2020.

Dentro do dito prazo, as entidades beneficiarias deberán presentar a documentación común e a específica correspondente á actuación subvencionada relacionada no artigo 20.3 da convocatoria. De acordo co establecido no artigo 12.6 das bases reguladoras, a presentación da documentación deberá realizarse electronicamente accedendo á Carpeta cidadá da persoa interesada dispoñible na sede electrónica da Xunta de Galicia. Os datos do perfil, dos indicadores de produtividade e de resultado das persoas participantes achegaranse a través da aplicación informática Participa 1420.

Segundo. Informar as entidades beneficiarias que figuran no anexo desta resolución do seguinte:

a) As subvencións concedidas ao abeiro dos programas recollidos nas letras a), b) e c) do artigo 1.1 das bases reguladoras están cofinanciadas polo FSE nunha porcentaxe do 80 % no marco do programa operativo FSE Galicia 2014-2020. No caso do programa de fomento da conciliación, no obxectivo temático 8 «Promover a sustentabilidade e a calidade no emprego e favorecer a mobilidade laboral», prioridade de investimento 8.4 «A igualdade entre homes e mulleres en todos os ámbitos, incluídos o acceso ao emprego, a progresión na carreira profesional, a conciliación da vida laboral e a vida privada e a promoción de igual remuneración por igual traballo», obxectivo específico 8.4.2 «(Re) integrar e manter no mercado laboral as persoas con dependentes ao seu cargo, a través de medidas de conciliación da vida persoal e laboral, e fomentar a igualdade de xénero no ámbito formativo, educativo e laboral»; e no caso do Programa de apoio aos CIM, no obxectivo temático 9 «Promover a inclusión social, loitar contra a pobreza e calquera forma de discriminación», prioridade de investimento 9.3 «A loita contra toda forma de discriminación e o fomento da igualdade de oportunidades», obxectivo específico 9.3.1 «Aumentar a integración sociolaboral das persoas pertencentes a colectivos máis vulnerables, a través de actuacións que fomenten a igualdade de xénero e a conciliación da vida persoal e laboral, e evitar, pola súa vez, a discriminación múltiple».

b) A aceptación da subvención comunitaria implicará a súa aparición na lista pública de operacións cos nomes dos ou das beneficiarias, no suposto de seren entidades xurídicas, así como a outra información recollida no anexo XII do Regulamento (UE) núm. 1303/2013, modificado polo Regulamento (UE, Euratom) núm. 2018/1046, en relación co artigo 115.2 da mesma norma xurídica.

c) Estas axudas son incompatibles con outras axudas públicas para a mesma actuación ou actividade nos termos establecidos no artigo 3 da convocatoria.

d) As entidades beneficiarias deberán cumprir, en todo caso, os requisitos e obrigas exixidos nos artigos 10 e 11 da Lei 9/2007, do 13 de xuño, de subvencións de Galicia, e na demais normativa europea de aplicación, así como as condicións e obrigas establecidas no artigo 22 das bases reguladoras e demais que resulten exixibles segundo a normativa de aplicación.

e) Nos artigos 6.7, 8.7 e 24 das bases reguladoras establécense os criterios de gradación dos posibles incumprimentos que determinan, de ser o caso, a perda do dereito ao cobramento da subvención, a minoración da subvención inicialmente concedida ou, de ser o caso, o reintegro total ou parcial da axuda percibida.

Terceiro. Esta resolución esgota a vía administrativa e contra ela poderá interporse recurso potestativo de reposición ante a Secretaría Xeral da Igualdade, no prazo dun mes, contado desde o día seguinte ao desta publicación, ou ben directamente recurso contencioso-administrativo ante o Tribunal Superior de Xustiza de Galicia, no prazo de dous meses contados a partir do día seguinte ao desta publicación.

Disposición derradeira

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 14 de xullo de 2020

A secretaria xeral da Igualdade
P.D. (Resolución do 8.6.2020; DOG núm. 111, do 9.6.2020)
Natalia Prieto Viso
Directora xeral de Avaliación e Reforma Administrativa

ANEXo

Concesións

a) Programa de fomento da conciliación da vida persoal, laboral e familiar (SI435B)

Núm. Expediente	Entidade	NIF	Nome da medida	Gasto elixible*	Puntos	Importe concesión segundo puntuación
SI435B 2020/37	Concello de Ponteceso	P1506900H	Programa respira	20.460,82	40,00	12.000,00
SI435B 2020/72	Concello de Ourol	P2703800I	Ludoteca de verán	4.200,00	39,00	3.360,00
SI435B 2020/41	Concello de Vilarmaior	P1509200J	Actividades de conciliación	5.040,00	39,00	4.032,00
SI435B 2020/57	Concello de Monfero	P1505100F	Concilia Monfero	14.229,60	39,00	11.383,68
SI435B 2020/97	Concello de Maceda	P3204400J	Programa mañanceiros	33.778,35	39,00	12.000,00
SI435B 2020/05	Concello de Moeche	P1505000H	Campamentos de conciliación familiar	5.100,00	39,00	4.080,00
SI435B 2020/83	Concello de Catoira	P3601000G	Programa de fomento da conciliación do Concello de Catoira	13.400,00	39,00	10.720,00
SI435B 2020/89	Concello das Neves	P3603400G	Campamentos de verán	16.800,00	39,00	12.000,00
SI435B 2020/131	Concello do Saviñao	P2705800G	Aula de verán	16.800,00	39,00	12.000,00
SI435B 2020/14	Concello de Toén	P3208200J	Madrugadores e campamento de verán	3.389,00	38,00	2.711,20
SI435B 2020/46	Concello de Vilar de Santos	P3209100A	Concilia Vilar de Santos	11.200,00	38,00	8.960,00
SI435B 2020/82	Concello de Baralla	P2703600C	Campamentos urbanos para conciliación da vida laboral e familiar	12.752,60	38,00	10.202,08
SI435B 2020/127	Concello de Esgos	P3203200E	Aprende sorrindo en Esgos	9.013,20	38,00	7.210,56
SI435B 2020/124	Concello de Valdoviño	P1508800H	Programa concilia tempos	15.061,60	38,00	12.000,00
SI435B 2020/100	Concello de Meis	P3602800I	Programa de conciliación no centro social municipal Casa de Escudeiro de Meis	4.484,48	37,00	3.587,58
SI435B 2020/34	Concello de Vigo	P3605700H	Servizo de atención domiciliaria á infancia	56.000,00	37,00	12.000,00
SI435B 2020/114	Concello de Mesía	P1504800B	Programa respira Mesía	9.254,00	36,00	7.403,20
SI435B 2020/102	Concello de Cee	P1502300E	Respira	11.227,82	36,00	8.982,26
SI435B 2020/105	Concello de Soutomaior	P3605300G	Campamento urbano concilia en igualdade	11.480,00	36,00	9.184,00
SI435B 2020/32	Concello de Forcarei	P3601800J	Concilia Forcarei	16.800,00	35,00	12.000,00
SI435B 2020/134	Concello de Ramirás	P3206900G	Programa concilia infancias Ramirás	16.226,00	35,00	12.000,00
SI435B 2020/111	Concello da Cañiza	P3600900I	Programa educativo de verán Eu quero ser	5.066,00	35,00	4.052,80
SI435B 2020/125	Concello de Miño	P1504900J	Respira	53.306,75	35,00	12.000,00
SI435B 2020/144	Concello de Malpica de Bergantiños	P1504400A	Campamento en igualdade	11.979,58	35,00	9.583,66
SI435B 2020/31	Concello de Taboada	P2706000C	Actividades de verán	10.721,40	34,00	8.577,12

(*) Custos directos de persoal máis un 40 % e menos os ingresos, de ser o caso.