De acordo co Convenio de colaboración subscrito entre a Escola Galega de Administración Pública (en diante, EGAP) e a Vicepresidencia segunda e Consellería de Economía, Empresa e Innovación para o desenvolvemento de actividades de formación, divulgación e investigación,
RESOLVO:
Convocar o curso que figura no anexo II, que deberá desenvolverse segundo as bases detalladas no anexo I.
Santiago de Compostela, 30 de outubro de 2020
Sonia Rodríguez-Campos González
Directora da Escola Galega de Administración Pública
ANEXO I
Primeira. Requisitos das persoas participantes
Poderá participar na acción formativa convocada nesta resolución o persoal técnico no ámbito de minas da Dirección Xeral de Planificación Enerxética e Recursos Naturais e dos servizos de Enerxía e Minas das xefaturas territoriais da Vicepresidencia segunda e Consellería de Economía, Empresa e Innovación, que terán preferencia na asignación das prazas, así como outro persoal desta Vicepresidencia segunda e, en xeral, o persoal ao servizo da Administración xeral da Comunidade Autónoma de Galicia, das entidades públicas instrumentais e da Administración institucional, que se encontre en situación de servizo activo (incluído permiso por maternidade ou paternidade, adopción ou acollemento ou excedencia polo coidado dun/dunha fillo/a ou familiar) e que reúna os requisitos establecidos nesta convocatoria e para cada un dos casos no anexo II.
Segunda. Desenvolvemento das actividades de formación
A actividade formativa realizarase cos requirimentos, a duración e as condicións que se indiquen na convocatoria. A información relativa ao desenvolvemento da actividade, así como as súas posibles modificacións, será actualizada e ampliada na páxina web <https://egap.xunta.gal>.
Terceira. Solicitudes e prazos
1. O prazo de presentación de solicitudes comezará o día seguinte ao da publicación desta resolución no Diario Oficial de Galicia e rematará o día 12 de novembro de 2020.
2. As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo <https://egap.xunta.gal/matricula> desde as 9.00 horas da data de inicio do prazo de presentación de solicitudes e ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.
3. Serán excluídas automaticamente aquelas solicitudes que non se axusten ao formulario de solicitude, non teñan cubertos correctamente os datos precisos para a realización do proceso de selección ou sexan presentadas fóra de prazo.
4. As persoas que oculten ou falseen datos esenciais para a selección serán automaticamente excluídas das actividades solicitadas e pasarán ao final das listas de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.
5. As persoas interesadas en recibir mensaxes sobre o proceso de selección deberán facilitar un enderezo de correo electrónico e/ou un número de teléfono móbil, e ao tratarse de actividades impartidas nunha modalidade que inclúe inclúe telepresenza, deberán dispor dun equipo informático que deberá contar cos seguintes compoñentes:
1. Ordenador de sobremesa, portátil ou smartphone.
2. Conexión estable á internet.
3. Navegador Web Google Chrome ou Mozilla Firefox nas últimas versións.
4. Webcam (integrada no caso de portátil, externa no caso de sobremesa, xeralmente USB).
5. Altofalantes (se o monitor ou equipo non dispón deles).
6. As persoas que necesiten acreditar circunstancias específicas (discapacidade, permiso de maternidade, etc.) de acordo cos criterios de selección poderán remitirlle á EGAP a correspondente documentación complementaria, xunto cunha copia do formulario da matrícula, ou ao enderezo de correo electrónico <xestion.egap@xunta.gal>, sen prexuízo do previsto no artigo 16.4 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro). A devandita documentación deberá enviarse por unha única das vías indicadas; no caso contrario só serán considerados os datos achegados por correo electrónico. A documentación deberá presentarse dentro do prazo sinalado no punto 1 desta base.
7. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través do enderezo de correo electrónico <xestion.egap@xunta.gal>.
Cuarta. Comprobación de datos
1. Para a tramitación do procedemento consultaranse automaticamente os datos das persoas interesadas necesarios para realizar o proceso de selección das actividades formativas.
2. No caso de que as persoas interesadas se opoñan a esta consulta deberán indicalo expresamente e achegar os documentos que indiquen a súa situación administrativa, tipo de persoal e antigüidade na Administración.
3. Excepcionalmente, no caso de que algunha circunstancia imposibilitase a obtención dos citados datos, poderase solicitar ás persoas interesadas a presentación dos documentos correspondentes.
4. A presentación da solicitude comportará a autorización da persoa solicitante ao órgano xestor para pedir as certificacións necesarias para realizar a selección de acordo cos criterios da EGAP.
Quinta. Criterios de selección
1. Con carácter xeral, darase prioridade no proceso de selección dos/das participantes aos/ás solicitantes que reúnan a condición de persoal técnico no ámbito de minas da Dirección Xeral de Planificación Enerxética e Recursos Naturais e dos servizos de Enerxía e Minas das xefaturas territoriais da Vicepresidencia segunda e Consellería de Economía, Empresa e Innovación.
2. Para o caso de que non se cubran as prazas co antedito persoal poderá ser seleccionado outro persoal da Vicepresidencia segunda e Consellería de Economía, Empresa e Innovación.
3. Finalmente e para o caso de que non se cubran as prazas co persoal dos anteriores apartados, poderá acceder ao curso outro persoal da Vicepresidencia segunda e, en xeral, o persoal ao servizo da Administración xeral da Comunidade Autónoma de Galicia, das entidades públicas instrumentais e da administración institucional
As persoas indicadas nos parágrafos anteriores serán ordenadas de acordo cos criterios selectivos que son os sinalados con carácter xeral na Resolución do 4 de xaneiro de 2008 pola que se actualizan os criterios de participación nas actividades formativas da Escola Galega de Administración Pública (DOG núm. 7, do 10 xaneiro).
Sexta. Publicación das relacións do alumnado seleccionado
A EGAP publicará no enderezo <https://egap.xunta.gal> unha relación das persoas seleccionadas para participar no curso, así como un número adecuado de reservas de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
O prazo de presentación de alegacións será de dez (10) días desde a súa publicación de acordo co artigo 68.1 da Lei 39/2015, do 1 de outubro, do procedemento administrativo común das administracións públicas.
Entenderase que as persoas que non figuren na relación foron excluídas por algunha das razóns expresadas nas bases da convocatoria ou ocupan un posto máis afastado na listaxe de agarda.
Transcorrido o prazo de alegacións, a EGAP publicará no enderezo <https://egap.xunta.gal> a listaxe definitiva de persoas admitidas no curso. Contra esta listaxe poderase interpoñer recurso de alzada no prazo dun mes desde a dita publicación, de acordo co disposto polos artigos 112.1, 121 e 122 da Lei 39/2015, do 1 de outubro, do procedemento administrativo común das administracións públicas.
Sétima. Cambios ou substitucións na selección, renuncia e asistencia
1. Os cambios ou as substitucións na selección:
En ningún caso serán admitidos cambios ou substitucións entre as persoas seleccionadas.
2. A renuncia:
a) As persoas seleccionadas só poderán renunciar á actividade formativa:
– Por causa de forza maior suficientemente acreditada.
– Por necesidades do servizo debidamente motivadas por parte das persoas responsables dos centros directivos.
– Por outras causas xustificadas documentalmente.
b) A renuncia debe ser comunicada por escrito á EGAP cunha antelación de tres días ao inicio da actividade formativa. Na páxina web da escola está dispoñible un modelo de renuncia.
Para isto poderase utilizar, alén do previsto no artigo 16.4 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro) o enderezo de correo electrónico <xestion.egap@xunta.gal>.
c) As persoas que incumpran o previsto nas liñas a) e b) pasarán ao final das listaxes de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.
3. Seguimento das actividades de telepresenza:
As faltas de asistencia das sesións de telepresenza:
1. Non poden superar en ningún caso o 10 % das horas lectivas de telepresenza. En todo caso, as faltas de asistencia deberán xustificarse documentalmente ante as persoas responsables da actividade formativa nun prazo máximo de dez (10) días contados a partir do día da finalización desta actividade. As persoas que incumpran o antedito perderán o dereito ao certificado de participación na actividade formativa.
2. Aquelas persoas cuxas faltas de asistencia superen o 50 % das horas lectivas de telepresenza, pasarán ao final das listaxes de agarda de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.
Oitava. Superación da actividade formativa
Para poder superar a actividade é necesario cumprir unha serie de requisitos obrigatorios na súa totalidade:
– A asistencia ás sesións presenciais ou de telepresenza.
– A adecuada realización de todas as actividades que o/a titor/a propoña. Estas deben constar debidamente presentadas nos prazos estipulados na programación didáctica do curso. A non superación das actividades obrigatorias suporá a perda automática do dereito a participar no exame final.
– Superar unha proba de avaliación que se realizará ao final dela.
Novena. Certificados
Para a obtención do certificado de aproveitamento o alumnado deberá obter a avaliación positiva do seu profesorado, o cal emitirá un informe en que declare apto/a ou non apto/a cada alumno/a en función do resultado da proba de avaliación.
Décima. Facultades da EGAP
1. A EGAP e a Vicepresidencia segunda e Consellería de Economía, Empresa e Innovación poderán modificar o desenvolvemento, as datas e os lugares da actividade formativa, así como resolver todas as continxencias que poidan xurdir.
2. No suposto de que o número de admitidos/as sexa inferior ao 50 % das prazas convocadas, a EGAP e a Vicepresidencia segunda e Consellería de Economía, Empresa e Innovación resérvanse o dereito a suspender ou cancelar a actividade, caso no que empregará os medios de notificación ás persoas interesadas previstos na normativa vixente.
3. A EGAP e a Vicepresidencia segunda e Consellería de Economía, Empresa e Innovación garantirán na actividade derivada desta convocatoria a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.
ANEXO II
Código: CV20037.
Área de coñecemento: réxime xurídico e actividade financeira das administracións públicas.
Nome do curso: transparencia administrativa e acceso á información pública.
1. Obxectivos.
Proporcionar ao alumnado unha visión xeral sobre os aspectos distintivos do dereito de acceso á información publica e a importancia da nova cultura da transparencia no conxunto das administracións públicas, con especial enfoque na información xerada no ámbito da xestión mineira, así como nas especificidades propias da Administración galega.
2. Destinatarios/as.
Persoal técnico no ámbito de minas da Dirección Xeral de Planificación Enerxética e Recursos Naturais e dos servizos de Enerxía e Minas das xefaturas territoriais da Vicepresidencia segunda e Consellería de Economía, Empresa e Innovación, que terán preferencia na asignación das prazas, así como outro persoal desta Vicepresidencia segunda e, en xeral, o persoal ao servizo da Administración xeral da Comunidade Autónoma de Galicia, das entidades públicas instrumentais e da Administración institucional.
3. Desenvolvemento.
Modalidade: telepresenza.
Duración: 24 horas.
Edicións: unha.
Datas: do 19 de novembro de 2020 ao 4 de marzo de 2021.
O día 19 de novembro das 9.00 ás 11.00 horas; o 3, 10, 17 de decembro das 9.00 ás 11.00 horas; o 21 e 28 de xaneiro das 9.00 ás 11.00 horas; o 4,11,18 e 25 de febreiro das 9.00 ás 11.00 horas, e o día 4 de marzo das 9.00 ás 11.00 horas.
Proba final: o día 4 de marzo de 2021 ás 11.00 horas.
Prazas: 25.
4. Contido.
1. Introdución.
2. Evolución e marco normativo xeral.
3. Análise e comparativa das vixentes Lei 19/2013, do 9 de decembro, de transparencia, acceso á información pública e bo goberno, Lei 1/2016, do 18 de xaneiro, de transparencia e bo goberno de Galicia e Lei 27/2006, do 18 de xullo, pola que se regulan os dereitos de acceso á información, de participación pública e de acceso á xustiza en materia de ambiente.
4. Práctica administrativa, xurisprudencia e doutrina destacada.
