O Concello de Oroso comunícalle á Dirección Xeral de Administración Local a creación dun posto de tesouraría e solicita a súa clasificación como posto reservado a persoal funcionario de Administración local con habilitación de carácter nacional.

De acordo co disposto no Real decreto 128/2018, do 16 de marzo, polo que se regula o réxime xurídico dos funcionarios de Administración local con habilitación de carácter nacional, nas corporacións locais cuxa secretaría estea clasificada en primeira ou segunda clase, existirá un posto de traballo denominado de tesouraría, reservado a persoal funcionario de Administración local con habilitación de carácter nacional pertencente á subescala de intervención-tesouraría, calquera que sexa a súa categoría, ao cal corresponderá o desempeño das funcións de tesouraría e recadación. A Secretaría do Concello de Oroso está clasificada como de clase segunda, polo que resulta necesaria a creación do posto de tesouraría e a súa clasificación como posto reservado a persoal funcionario de Administración local con habilitación de carácter nacional, da subescala de intervención-tesouraría.

O expediente tramitado polo concello axústase ao disposto no citado Real decreto 128/2018, do 16 de marzo, e ao establecido no artigo 10 do Decreto 49/2009, do 26 de febreiro, sobre o exercicio das competencias da Comunidade Autónoma de Galicia respecto dos/das funcionarios/as con habilitación de carácter estatal, polo que, de acordo co informe da Subdirección Xeral de Réxime Xurídico Local, procede a súa clasificación.

Polo exposto, e tendo en conta as competencias conferidas polo artigo 15.e) da Lei 2/2015, do 29 de abril, de emprego público de Galicia, e polo artigo 22 do Decreto 74/2018, do 5 de xullo, polo que se establece a estrutura orgánica da Vicepresidencia e da Consellería de Presidencia, Administracións Públicas e Xustiza, que resulta de aplicación de conformidade co disposto na disposición transitoria segunda do Decreto 130/2020, do 17 de setembro, polo que se fixa a estrutura orgánica das vicepresidencias e das consellerías da Xunta de Galicia,

RESOLVO:

Clasificar o seguinte posto de traballo como reservado a persoal funcionario de Administración local con habilitación de carácter nacional:

Entidade local: Concello de Oroso.

Posto: tesouraría.

Subescala: intervención-tesouraría.

Categoría: sen distinción de categoría.

Forma de provisión: concurso.

Nivel de complemento de destino: 28.

Complemento específico: 15.927,37 €.

Contra esta resolución, que pon fin á vía administrativa, poderase interpor recurso contencioso-administrativo no prazo de dous meses, contados a partir do día seguinte ao da súa publicación, ante o xulgado do contencioso-administrativo competente, de conformidade co establecido nos artigos 8, 14 e 46 da Lei 29/1998, do 13 de xullo, reguladora da xurisdición contencioso-administrativa. Potestativamente, e con carácter previo, os interesados poderán interpor recurso administrativo de reposición, ante este órgano directivo, no prazo dun mes a partir do día seguinte ao da súa publicación, segundo o disposto nos artigos 123 e 124 da Lei 39/2015. Así mesmo, a entidade local poderá presentar previamente requirimento no prazo de dous meses conforme o disposto no artigo 44 da devandita Lei 29/1998.

Santiago de Compostela, 2 de decembro de 2020

Natalia Prieto Viso
Directora xeral de Administración Local