O artigo 28.2 da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG núm. 116, do 20 de xuño), entre os cales se encontra a sanidade.
O exercicio público da prestación da asistencia sanitaria non se pode ver afectado gravemente polo lexítimo exercicio do dereito de folga, xa que aquel é considerado e recoñecido prioritariamente en relación con este.
O artigo 3 do citado decreto faculta os conselleiros ou conselleiras competentes por razón dos servizos esenciais afectados para que, mediante orde e ante cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.
As organizacións Confederación Intersindical, Co.bas, Solidaridad Obrera e SAS convocaron unha folga, que se fará efectiva durante a xornada do 18 de xuño de 2021 desde as 0.00 horas ata as 24.00 horas do citado día, que afectará o persoal temporal e interino funcionario, estatutario e laboral de, entre outras, as administracións das comunidades autónomas e os organismos públicos, axencias e demais entidades de dereito público con personalidade xurídica propia, vinculadas ou dependentes de calquera das administracións públicas.
A Xunta de Galicia determinou a procedencia de fixar servizos mínimos para os sectores afectados por esta folga na Administración da Comunidade Autónoma de Galicia. En consecuencia, procede facer o propio no ámbito do Servizo Galego de Saúde e das entidades públicas adscritas ao dito organismo e á Consellería de Sanidade. Para isto e ante o mantemento da actual situación de crise sanitaria, resulta procedente remitirse aos termos da orde que determinou os servizos esenciais para a folga do pasado 8 de marzo (publicada no Diario Oficial de Galicia núm. 44, do 5 de marzo de 2021), ben que cinguindo os seus efectos ao persoal temporal afectado pola presente convocatoria de folga.
Con base no que antecede,
DISPOÑO:
Artigo único
A convocatoria de folga que terá lugar entre as 0.00 e as 24.00 horas do 18 de xuño de 2021, realizada polas organizacións Confederación Intersindical, Co.bas, Solidaridad Obrera e SAS, deberá entenderse condicionada ao mantemento dos servizos mínimos que se establecen nesta orde, os cales, por remisión, serán os contidos na Orde desta consellería do 1 de marzo de 2021 pola que se determinan os servizos mínimos, no ámbito da asistencia sanitaria, durante as folgas convocadas para o día 8 de marzo de 2021 (publicada no DOG núm. 44, do 5 de marzo, páx. 13341 e ss.).
Deste xeito, para determinar os servizos esenciais que se deberán respectar durante a folga do 18 de xuño de 2021 aplicarase na súa integridade a devandita orde, tanto no que atinxe ao seu articulado e, nomeadamente, aos criterios reitores contidos neste, como aos seus anexos, coas únicas matizacións e excepcións que a seguir se indican:
– Dado que os criterios reitores e os efectivos de servizos mínimos recollidos na Orde do 1 de marzo de 2021 van ligados á actividade que en cada caso debe quedar garantida no correspondente centro, unidade e quenda, na folga do 18 de xuño o persoal temporal poderá ser designado para cubrir os servizos mínimos só nos supostos en que resulte imprescindible para cumprir o criterio reitor correspondente, e na medida en que este o precise.
De tal xeito que, nos casos en que a actividade esencial quede garantida con persoal fixo (xa que logo, non convocado á folga) do respectivo centro, servizo/unidade e quenda, non procederá designar servizos mínimos.
– Non será de aplicación a Orde do 1 de marzo de 2021 no que concirne ao persoal das empresas e entidades privadas recollidas nela, por non estar incluído no ámbito de aplicación da folga do 18 de xuño, dirixida exclusivamente –consonte o seu teor literal– ao persoal temporal e interino funcionario, estatutario e laboral das distintas administracións públicas.
Disposición derradeira
Esta orde producirá efectos e entrará en vigor o mesmo día da súa publicación no Diario Oficial de Galicia.
Santiago de Compostela, 15 de xuño de 2021
Julio García Comesaña
Conselleiro de Sanidade