No DOG núm. 29 do 12 de febreiro de 2021, publicouse a Orde do 31 de decembro de 2020 pola que se establecen as bases reguladoras das axudas ás empresas de inserción laboral (EIL) e ás súas entidades promotoras, e se procede á súa convocatoria para o ano 2021.

Segundo o punto 6 do artigo 4 da Orde do 31 de decembro, de producirse remanentes nunha aplicación orzamentaria e/ou nun programa de axudas reasignaranse as contías sobrantes na outra aplicación e /ou programa. As reasignacións levaranse a cabo, logo das modificacións orzamentarias pertinentes, sen necesidade de facer unha nova publicación do importe dos créditos.

No Programa II de axudas ás empresas de inserción laboral para compensar os custos adicionais do emprego de persoas en risco ou situación de exclusión social (procedemento TR356C), non existe crédito suficiente nunha das aplicacións orzamentarias para atender a todas as solicitudes. Por outra parte, existen remanentes de crédito noutra aplicación do mesmo programa e no Programa I, que se poderían reasignar, logo das pertinentes modificacións de crédito.

En consonancia co parágrafo anterior, o artigo 31 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro, establece que a alteración da distribución entre os créditos consignados non precisará de nova convocatoria, pero si das modificacións que procedan no expediente de gasto e da publicación nos mesmos medios que a convocatoria.

Por todo o exposto e co fin de atender todas as solicitudes presentadas do Programa II de axudas da Orde do 31 de decembro de 2020,

RESOLVO:

Primeiro. Modificar o crédito destinado ás axudas convocadas pola Orde do 31 de decembro de 2020 pola que se establecen as bases reguladoras das axudas ás empresas de inserción laboral (EIL) e ás súas entidades promotoras, e se procede á súa convocatoria para o ano 2021(códigos de procedemento TR356A e TR356C), reasignando as contías sobrantes da aplicación 11.04.324C 470.5 do Programa I e da aplicación 11.04.324C 481.5 do Programa II; na aplicación 11.04.324C 470.5 do Programa II, e sen variar o orzamento total consignado na convocatoria.

Procedemento	Programa de axudas	Aplicacións	Incremento (€)	Minoración (€)
TR356A	Programa I	11.04.324C 470.5	0,000	20.000,00
TR356C	Programa II	11.04.324C 481.5	0,00	17.125,00
		11.04.324C 470.5	37.125,00	0,00
Total			37.125,00	37.125,00

Segundo. Esta modificación, unha vez publicada no Diario Oficial de Galicia, non implicará apertura de prazo para presentar novas solicitudes.

Santiago de Compostela, 22 de decembro de 2021

Covadonga Toca Carús
Directora xeral de Emprego, Traballo Autónomo e Economía Social