En cumprimento do disposto no artigo 42.4 da Lei 1/2021, do 8 de xaneiro, de ordenación do territorio de Galicia, faise público o Acordo do Consello da Xunta de Galicia, do 29 de xullo de 2021, polo que se declara de interese autonómico o proxecto denominado Novo Complexo Hospitalario Universitario da Coruña (CHUAC), situado no concello da Coruña.
Exposición de motivos:
O plan funcional da Área Sanitaria da Coruña-Cee determinou a necesidade de ampliar e reformar o Complexo Hospitalario Universitario da Coruña (CHUAC). A magnitude da ampliación e da reforma é tal que se configurará, tras o remate das actuacións, un novo hospital, cun entramado urbano renovado e modernizado na súa contorna. Así renovarase e ampliarase a infraestrutura hospitalaria e coidarase especialmente a súa accesibilidade, coa creación dun anel viario perimetral, prazas de aparcamento e a mellora da mobilidade tanto en transporte público como para peóns e ciclistas. Trátase, por tanto, dunha actuación que ordena o territorio e que afecta un pilar da política autonómica como é a sanidade.
Dada a singularidade e relevancia da actuación, é necesario acudir a unha das ferramentas de que dispón a Comunidade Autónoma a través da Lei 1/2021, de ordenación do territorio de Galicia, como é a do proxecto de interese autonómico, para poder acometer a actuación.
Por todo iso, o Consello da Xunta de Galicia na súa reunión do día 29 de decembro de 2021 adoptou, entre outros, o seguinte
ACORDO:
Primeiro. Declarar o interese autonómico para os efectos previstos na Lei 1/2021, do 8 de xaneiro, de ordenación do territorio de Galicia, do proxecto denominado Novo Complexo Hospitalario Universitario da Coruña (CHUAC), situado no concello da Coruña.
Segundo. Determinar como órgano competente por razón da materia a Consellería de Sanidade.
Terceiro. Informar que, de acordo coa encomenda do conselleiro de Sanidade do 17 de marzo de 2021, o organismo tramitador do expediente será a Axencia Galega de Infraestruturas.
Contra este acordo, que pon fin á vía administrativa, poderase interpoñer recurso potestativo de reposición, no prazo dun mes, contado desde o día seguinte ao da súa notificación ou publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contado desde o día seguinte ao da súa notificación ou publicación, de conformidade co establecido nos artigos 10, 14 e 46.1 da Lei 29/1998, do 13 de xullo, reguladora da xurisdición contencioso-administrativa, sen prexuízo de que os interesados poidan interpoñer calquera outro recurso que xulguen pertinente.
O que se fai público para xeral coñecemento.
Santiago de Compostela, 10 de febreiro de 2022
Mª Jesús Bello Piñeiro
Directora xeral de Recursos Económicos