DOG 45 do 7/03/2022 - RESOLUCIÓN do 31 de decembro de 2021 pola que se establecen as bases reguladoras para a concesión, en réxime de concorrencia competitiva, das axudas do Programa de unidades mixtas de investigación, e se procede á súa convocatoria para o ano 2022 (códigos de procedemento IN853A, IN853B e IN853C).

III. Outras disposicións

Axencia Galega de Innovación

RESOLUCIÓN do 31 de decembro de 2021 pola que se establecen as bases reguladoras para a concesión, en réxime de concorrencia competitiva, das axudas do Programa de unidades mixtas de investigación, e se procede á súa convocatoria para o ano 2022 (códigos de procedemento IN853A, IN853B e IN853C).

A Constitución española, no seu artigo 44.2, obriga os poderes públicos a promover a ciencia e a investigación científica e técnica en beneficio do interese xeral. Ademais, establece no artigo 149.1.15 que o fomento e a coordinación da investigación científica e técnica son competencia exclusiva do Estado. Pola súa banda, o Estatuto de autonomía de Galicia recolle no seu artigo 27.19 que lle corresponde á Comunidade Autónoma galega a competencia do fomento da cultura e da investigación en Galicia, sen prexuízo do establecido no artigo 149.2 da Constitución.

A Lei 5/2013, do 30 de maio, de fomento da investigación e da innovación de Galicia, ten por obxecto establecer o marco para o fomento da investigación e do desenvolvemento tecnolóxico, da transferencia e valorización de resultados e da innovación en Galicia en todas as súas vertentes, así como da súa xestión eficiente. Esta lei, no seu capítulo III, establece o Plan galego de investigación e innovación como unha ferramenta encamiñada ao logro deste obxectivo.

O Decreto 50/2012, do 12 de xaneiro, polo que se crea a Axencia Galega de Innovación e se aproban os seus estatutos, establece que a Axencia Galega de Innovación ten como finalidade fomentar e vertebrar as políticas de innovación nas administracións públicas galegas e o apoio e impulso do crecemento e da competitividade das empresas galegas a través da implementación de estratexias e programas de innovación eficientes. Entre os seus obxectivos destacan o de definir e desenvolver as políticas públicas que permitan ás empresas e ao resto de axentes o desenvolvemento de iniciativas de innovación construídas a partir de coñecementos que incrementen a súa competitividade e fomenten o seu crecemento; definir e desenvolver as políticas públicas orientadas á valorización do coñecemento desenvolvido polas empresas, universidades e centros de investigación de Galicia; fomentar a investigación e o desenvolvemento científico e tecnolóxico, a través de iniciativas e programas específicos na Comunidade Autónoma galega; promover as relacións de colaboración entre os distintos axentes do Sistema galego de innovación impulsando a creación e o fortalecemento de redes de coñecemento entre axentes públicos e privados desde unha perspectiva de intercambio e de investigación aberta; favorecer a transferencia de coñecemento e tecnoloxía entre os diferentes axentes e, particularmente, entre os organismos públicos de investigación e as empresas.

A Estratexia de especialización intelixente de Galicia (RIS3 Galicia), folla de ruta das políticas de investigación e innovación da Comunidade Autónoma galega, estrutúrase arredor de 3 retos que orientarán a definición detallada da estratexia de actuación asociando a cada un destes retos unhas liñas de actuación específicas aliñadas cos obxectivos e os principais programas de innovación no ámbito rexional, nacional e europeo.

Na RIS3 Galicia defínense liñas de actuación/instrumentos encamiñados a lograr que o investimento público exerza como elemento tractor na mobilización e atracción de capital privado para os procesos de innovación galegos. Entre estes instrumentos, as unidades mixtas de investigación teñen como propósito o desenvolvemento de iniciativas colaborativas focalizadas nun contexto limitado de áreas de singularidade estratéxica para o conxunto da rexión mediante a creación de consorcios estratéxicos rexionais entre as universidades e os centros de innovación tecnolóxica coas empresas.

As unidades mixtas de investigación son unha fórmula importante de achegamento entre o mundo empresarial e o científico/técnico para desenvolver liñas de investigación e valorización conxuntas, con vistas a acadar os seguintes obxectivos:

– Configurar grupos mixtos de traballo entre organismos de investigación e empresas que se convertan en catalizadores do desenvolvemento de liñas de I+D+i.

– Desenvolver proxectos de alto impacto intensivos en coñecemento.

– Poñer en valor os grupos de investigación.

– Aproximar os organismos de investigación á empresa.

– Atraer a Galicia liñas de I+D+i.

– Incentivar a transferencia de resultados da I+D+i ao mercado.

No ano 2014, a Axencia Galega de Innovación pon en marcha o Programa de unidades mixtas de investigación, como unha nova ferramenta no mapa de apoios públicos á innovación en Galicia destinada á atracción de capital privado para aunar o coñecemento e as capacidades dos organismos de investigación galegos coas demandas de innovación do tecido empresarial mediante a constitución de grupos mixtos de traballo para a realización conxunta de actividades de I+D+i. Para o desenvolvemento do programa e como primeira fase deste, a Axencia Galega de Innovación, periodicamente e en réxime de concorrencia competitiva, está a convocar axudas de tres anos de duración para a creación, posta en marcha e funcionamento destas unidades.

Desde o inicio do programa puxéronse en marcha unidades mixtas de investigación no marco dos tres retos estratéxicos da RIS3 Galicia, que contribuíron á creación de emprego cualificado, a impulsar a transferencia de I+D+i ao tecido empresarial galego, á atracción a Galicia de empresas foráneas líderes nos seus respectivos sectores, ao desenvolvemento das capacidades dos organismos de investigación galegos en sectores punteiros e á mellora da competitividade das empresas.

Estes resultados puxeron de manifesto a conveniencia de contar, dentro do programa, cunha liña complementaria de axudas orientada á consolidación destas unidades, ampliando a súa duración en tres anos, cos obxectivos, entre outros, de fortalecer a alianza estratéxica organismo de investigación-empresa, manter a actividade investigadora e innovadora, ampliar o alcance, obxectivos e expectativas das liñas de investigación/traballo co desenvolvemento de novas actividades e novos proxectos no marco destas, poñer en valor os resultados obtidos e conservar o emprego cualificado creado.

Así, nos anos 2018 e 2020, e como segunda fase do Programa de unidades mixtas de investigación, a Axencia Galega de Innovación publica a primeira e segunda convocatorias de axudas destinadas en exclusiva a consolidación das unidades mixtas creadas ao abeiro das convocatorias dos anos 2014-2015 e 2016-2017, respectivamente.

O importante papel que están a xogar as unidades mixtas de investigación nos procesos de innovación galegos, como catalizadores da colaboración entre os distintos axentes do Sistema galego de I+D+i e da mellora da competitividade das empresas a través da transferencia de coñecemento, pon de manifesto a necesidade de contar cunha terceira fase no programa de unidades mixtas de investigación que sirva de panca para o afianzamento, estabilidade e continuidade destes grupos mixtos de traballo a medio e longo prazo.

Os centros mixtos de investigación constitúen a terceira fase do programa secuencial de apoio ás unidades mixtas de investigación. Esta terceira fase representa o punto de partida para a estabilización das unidades mixtas de investigación a través dunha maior implicación e participación dos seus integrantes, tanto a nivel cualitativo como cuantitativo.

Mediante esta resolución convócanse en réxime de concorrencia competitiva, para o ano 2022, as axudas correspondentes ás tres fases do Programa de unidades mixtas de investigación: creación e posta en marcha, consolidación e centros mixtos de investigación. As axudas concédense en función dunha serie de criterios que, de forma obxectiva, valoran a calidade científico-técnica, a capacidade e as características destas unidades.

As axudas que agora se convocan están, pois, en consonancia cos retos estratéxicos da RIS3 Galicia e tamén co esquema da Unión Europea reflectido no Programa marco de investigación e innovación co fin de procurar, a medio e longo prazo, a obtención de retornos sociais.

Esta convocatoria enmárcase nas liñas de actuación orientadas a avanzar cara a estruturas colaborativas e integradas arredor das cadeas de valor de innovación estratéxicas para Galicia no marco da Estratexia de especialización intelixente RIS3 Galicia.

Con estas estruturas, coas que se ordenan e agrupan os diferentes axentes do Sistema galego de innovación, búscase reducir o diferencial coas rexións europeas líderes en innovación sobre a base dunha crecente especialización e a participación activa do sector privado, co obxectivo de desenvolver un novo modelo de crecemento e emprego cualificado capaz de atraer talento internacional.

Os organismos de investigación e o tecido empresarial, como axentes claves do Sistema galego de innovación, son estratéxicos no desenvolvemento destas estruturas colaborativas que afondarán no desenvolvemento dos retos da RIS3 para mellorar a competitividade de Galicia.

Pola súa vez, a Axencia Galega de Innovación, no compromiso coa innovación responsable (en diante, IIR) e en consonancia coa Axenda 2030, a través desta actuación impulsa no ecosistema galego a adopción de medidas que axuden a garantir e incrementar o impacto social das actividades de I+D+i, en termos de: gobernanza e participación, igualdade de xénero, educación científica e ética da investigación.

O procedemento de concesión destas axudas tramitarase en réxime de concorrencia competitiva e as axudas concedidas no marco da presente resolución axustaranse ao establecido no Regulamento (UE) nº 651/2014 da Comisión, do 17 de xuño de 2014, polo que se declaran determinadas categorías de axudas compatibles co mercado interior en aplicación dos artigos 107 e 108 do Tratado, publicado no Diario Oficial de la Unión Europea (DOUE) núm. 187, do 26 de xuño de 2014 (en diante, Regulamento (UE) nº 651/2014), en concreto á categoría de axudas reguladas no seu artigo 25, axudas a proxectos de investigación e desenvolvemento.

Esta convocatoria tramítase de xeito anticipado ao abeiro do artigo 25 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (en diante, Decreto 11/2009).

As axudas da presente convocatoria poderán ser susceptibles de cofinanciamento polo Fondo Europeo de Desenvolvemento Rexional (Feder) no marco do programa operativo Feder Galicia 2021-2027.

Consecuentemente con todo o anterior, a directora da Axencia Galega de Innovación, en exercicio das facultades que lle confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación e se aproban os seus estatutos,

DISPÓN:

Artigo 1. Convocatoria e bases reguladoras

1. Esta resolución ten por obxecto aprobar as bases polas que se rexerá a concesión das subvencións da Axencia Galega de Innovación no marco do Programa de unidades mixtas de investigación mediante as seguintes modalidades de axuda:

• Modalidade A: axudas para a creación e posta en marcha de novas unidades mixtas de investigación, procedemento IN853A.

• Modalidade B: axudas para a consolidación de unidades mixtas de investigación, procedemento IN853B.

• Modalidade C: axudas para centros mixtos de investigación, procedemento IN853C.

2. Así mesmo, por medio desta resolución convócanse as ditas axudas para o ano 2022 en réxime de publicidade, obxectividade e concorrencia competitiva; as axudas concedidas no marco da presente resolución axustaranse ao establecido no Regulamento (UE) nº 651/2014.

Artigo 2. Definicións

1. Organismos de investigación e difusión de coñecementos: son organismos de investigación e difusión de coñecementos (en diante, organismos de investigación), segundo a definición do artigo 2.83 do Regulamento (UE) nº 651/2014, toda entidade (por exemplo, universidades ou centros de investigación, organismos de transferencia de tecnoloxía, intermediarios de innovación ou entidades colaborativas reais ou virtuais orientadas á investigación), independentemente da súa personalidade xurídica (de dereito público ou privado) ou forma de financiamento, cuxo principal obxectivo sexa realizar, de xeito independente, investigación fundamental, investigación industrial ou desenvolvemento experimental, ou difundir amplamente os resultados delas mediante o ensino, a publicación ou a transferencia de coñecementos. Cando unha entidade deste tipo leve a cabo tamén actividades económicas, o financiamento, os custos e os ingresos de tales actividades deberán contabilizarse por separado. As empresas que poidan exercer unha influencia decisiva nas ditas entidades, por exemplo, en calidade de accionistas ou membros, non poderán gozar de acceso preferente aos resultados que xeren.

Así, no marco desta resolución consideraranse organismos de investigación:

– Os centros tecnolóxicos e de apoio á innovación tecnolóxica de Galicia.

– As universidades do Sistema universitario galego.

– Os centros en Galicia do Consello Superior de Investigacións Científicas.

– As fundacións de investigación sanitaria de Galicia.

– Outros organismos de investigación de Galicia que teñan definida nos seus estatutos a I+D como actividade principal.

2. Empresa: segundo o artigo 1 do anexo I do Regulamento (UE) nº 651/2014, considerarase empresa toda entidade, independentemente da súa forma xurídica, que exerza unha actividade económica. En particular, consideraranse empresas as entidades que exerzan unha actividade artesanal ou outras actividades a título individual ou familiar, así como as sociedades de persoas e as asociacións que exerzan unha actividade económica de forma regular.

3. Pequena e mediana empresa (peme): segundo o artigo 2 do anexo I do Regulamento (UE) nº 651/2014, consideraranse pemes as empresas que ocupan menos de 250 persoas e cuxo volume de negocio anual non excede os 50 millóns de euros ou o seu balance xeral non excede os 43 millóns de euros. Dentro das pemes, considerarase pequena empresa aquela que ocupa menos de 50 persoas e cuxo volume de negocio anual ou balance xeral anual non supera os 10 millóns de euros. Para o cálculo destes efectivos deberán considerarse as indicacións incluídas nos artigos 3, 4, 5 e 6 do citado anexo I do Regulamento (UE) nº 651/2014.

4. Grande empresa: toda empresa que non cumpre cos requisitos para ser considerada como peme nos termos establecidos no anexo I do Regulamento (UE) nº 651/2014.

5. Agrupación de entidades beneficiarias: para os efectos desta resolución, nos termos previstos no artigo 8.3 da Lei 9/2007, do 13 de xuño, de subvencións de Galicia, enténdese por agrupación de entidades beneficiarias, empresas e organismos de investigación aquelas que participan de xeito conxunto no proxecto obxecto da subvención, a través dunha relación de «colaboración efectiva», entre as que exista un acordo regulador para o seu funcionamento.

6. Colaboración efectiva: colaboración entre, polo menos, dúas partes independentes para o intercambio de coñecementos ou tecnoloxía, ou para acadar un obxectivo común sobre a base da división do traballo, en que as partes implicadas definen conxuntamente o ámbito do proxecto en colaboración, contribúen á súa aplicación e comparten os seus riscos e os seus resultados; unha ou varias das partes poden soportar a totalidade dos custos do proxecto e liberar así outras partes dos seus riscos financeiros; a investigación baixo contrato e a prestación de servizos de investigación non se considerarán formas de colaboración.

7. Empresa en crise: a que así se defina consonte o previsto no artigo 2.18 do Regulamento (UE) nº 651/2014 e as directrices comunitarias sobre axudas estatais de salvamento e de reestruturación de empresas en crise (DOUE C 249, do 31.7.2014) ou documento que o substitúa.

8. Empresa vinculada: son empresas vinculadas, segundo o artigo 3.3 do anexo I do Regulamento (UE) nº 651/2014, aquelas empresas entre as cales existe algunha das seguintes relacións:

a) Unha empresa posúe a maioría dos dereitos de voto dos accionistas ou socios da outra empresa.

b) Unha ten dereito a nomear ou revogar a maioría dos membros do órgano de administración, dirección ou control da outra empresa.

c) Unha empresa ten dereito a exercer unha influencia dominante sobre outra, en virtude dun contrato celebrado con ela ou dunha cláusula estatutaria da segunda empresa.

d) Unha empresa, accionista ou asociada a outra, controla soa, en virtude dun acordo celebrado con outros accionistas ou socios da segunda empresa, a maioría dos dereitos de voto dos seus accionistas ou socios.

Presumirase que non existe influencia dominante, cando os investidores enunciados no artigo 3.2 (segundo parágrafo) do citado anexo I do Regulamento (UE) nº 651/2014 non teñan implicación directa ou indirecta na xestión da empresa en cuestión, sen prexuízo dos dereitos que lles correspondan na súa calidade de accionistas.

As empresas que manteñan calquera das relacións recollidas no parágrafo primeiro do artigo 3 do citado anexo I a través doutra ou doutras empresas, ou cos investidores enumerados no punto 2 do mesmo artigo, consideraranse tamén vinculadas.

Tamén se considerarán empresas vinculadas as que manteñan algunha das ditas relacións a través dunha persoa física ou un grupo de persoas físicas que actúen de común acordo, se as ditas empresas exercen a súa actividade ou parte desta no mesmo mercado de referencia ou en mercados contiguos, considerándose mercado contiguo o mercado dun produto ou servizo situado nunha posición inmediatamente anterior ou posterior á do mercado en cuestión.

9. Investigación industrial: investigación planificada ou estudos críticos encamiñados a adquirir novos coñecementos e aptitudes que poidan ser útiles para desenvolver novos produtos, procesos ou servizos, ou permitan mellorar considerablemente os xa existentes; comprende a creación de compoñentes de sistemas complexos e pode incluír a construción de prototipos nunha contorna de laboratorio ou nunha contorna con interfaces simuladas cos sistemas existentes, así como liñas piloto cando sexa necesario para a investigación industrial e, en particular, para a validación de tecnoloxía xenérica.

10. Desenvolvemento experimental: a adquisición, combinación, configuración e emprego de coñecementos e técnicas xa existentes, de índole científica, tecnolóxica, empresarial ou doutro tipo, con vistas á elaboración de produtos, procesos ou servizos novos ou mellorados; pode incluír tamén, por exemplo, actividades de definición conceptual, planificación e documentación de novos produtos, procesos e servizos. Entre as actividades poderá figurar a elaboración de proxectos, deseños, plans e demais tipos de documentación, sempre e cando non vaia destinada a usos comerciais.

O desenvolvemento experimental poderá comprender a creación de prototipos, a demostración, a elaboración de proxectos piloto, o ensaio e a validación de produtos, procesos ou servizos novos ou mellorados, en contornas representativas de condicións reais de funcionamento, sempre que o obxectivo principal sexa achegar novas melloras técnicas a produtos, procesos ou servizos que non estean substancialmente asentados; pode incluír o desenvolvemento de prototipos ou proxectos piloto que poidan utilizarse comercialmente cando sexan necesariamente o produto comercial final e a súa fabricación resulte demasiado onerosa para o seu uso exclusivo con fins de demostración e validación.

O desenvolvemento experimental non inclúe as modificacións habituais ou periódicas efectuadas en produtos, liñas de produción, procesos de fabricación, servizos existentes e outras operacións en curso, aínda cando as ditas modificacións poidan representar melloras deles.

11. Reto estratéxico: sintetiza o conxunto de prioridades tecnolóxicas e de innovación da Estratexia RIS3 de Galicia, baseadas tanto en actividades existentes como en oportunidades de futuro. Os retos estratéxicos son:

Reto 1. Xestión innovadora de recursos naturais e culturais. Modernización dos sectores tradicionais galegos a través da introdución de innovacións que incidan no melloramento da eficiencia e rendemento no uso dos recursos endóxenos e a súa reorientación cara a usos alternativos con maior valor engadido en actividades enerxéticas, acuícolas, farmacolóxicas, cosméticas, alimentarias e culturais.

Reto 2. O modelo industrial da Galicia do futuro. Aumentar a intensidade tecnolóxica da estrutura industrial de Galicia, a través da hibridación e das tecnoloxías facilitadoras esenciais.

Reto 3. Novo modelo de vida saudable baseado no envellecemento activo. Posicionar Galicia como a rexión líder do sur de Europa na oferta de servizos e produtos intensivos en coñecemento relacionados cun modelo de vida saudable: envellecemento activo, aplicación terapéutica de recursos hídricos e mariños e nutrición funcional.

Artigo 3. Financiamento

As subvencións imputaranse ao capítulo VII do orzamento da Axencia Galega de Innovación coa seguinte distribución:

Modalidade	Beneficiarios	Capítulo orzamentario	Crédito (en euros)
Modalidade	Beneficiarios	Capítulo orzamentario	Ano 2022	Ano 2023	Ano 2024	Ano 2025	Total
Mod. A (IN853A)	Organismos de investigación privados	06.A2.561A.781.0 2015 00016	642.500,00	900.000,00	862.500,00	750.000,00	3.155.000,00
	Organismos de investigación públicos	06.A2.561A.744.0 2015 00016	7.500,00	300.000,00	287.500,00	250.000,00	845.000,00
	Total		650.000,00	1.200.000,00	1.150.000,00	1.000.000,00	4.000.000,00
Mod. B (IN853B)	Organismos de investigación privados	06.A2.561A.781.0 2015 00016	637.500,00	900.000,00	862.500,00	750.000,00	3.150.000,00
	Organismos de investigación públicos	06.A2.561A.744.0 2015 00016	12.500,00	300.000,00	287.500,00	250.000,00	850.000,00
	Total		650.000,00	1.200.000,00	1.150.000,00	1.000.000,00	4.000.000,00
Mod. C (IN853C)	Organismos de investigación privados	06.A2.561A.781.0 2015 00016	520.000,00	660.000,00	720.000,00	600.000,00	2.500.000,00
	Organismos de investigación públicos	06.A2.561A.744.0 2015 00016	180.000,00	440.000,00	480.000,00	400.000,00	1.500.000,00
	Total		700.000,00	1.100.000,00	1.200.000,00	1.000.000,00	4.000.000,00
Total			2.000.000,00	3.500.000,00	3.500.000,00	3.000.000,00	12.000.000,00

As subvencións imputaranse ás aplicacións orzamentarias que se indican neste artigo, de conformidade co establecido no artigo 25 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, no cal se establece a tramitación anticipada de expedientes de gasto; a concesión destas subvencións queda condicionada á existencia de crédito adecuado e suficiente no momento da resolución de adxudicación.

Poderán ampliarse os créditos dedicados a esta convocatoria logo da declaración de dispoñibilidade de crédito como consecuencia das circunstancias establecidas no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia e, se for o caso, logo da aprobación da modificación orzamentaria que proceda.

A distribución de fondos entre as modalidades de axuda, aplicacións orzamentarias, tipoloxía de beneficiarios e anualidades sinaladas na táboa anterior é unha previsión que deberá axustarse segundo a valoración das solicitudes recibidas, é será posible incluso a incorporación de novas aplicacións orzamentarias e de novos conceptos de gasto tendo en conta a natureza das entidades beneficiarias, sempre sen incrementar o crédito total.

Artigo 4. Entidades beneficiarias

1. Poderán ser beneficiarias destas axudas as agrupacións entre un organismo de investigación de Galicia e unha ou varias empresas, nos termos previstos no artigo 8.3 da Lei 9/2007, do 13 de xuño, de subvencións de Galicia, e atendendo aos requisitos para cada unha das modalidades de axuda recollidos no artigo seguinte, que formen parte dunha unidade mixta de investigación para o desenvolvemento de forma conxunta e coordinada de actividades de I+D+i.

No marco desta resolución, considéranse organismos de investigación os enumerados no artigo 2.

As empresas poderán ser pequenas, medianas e grandes, segundo as definicións do Regulamento (UE) nº 651/2014 e contidas no artigo 2 desta convocatoria.

2. Unicamente poderán ser beneficiarias das axudas da modalidade B as unidades mixtas de investigación beneficiarias dunha axuda da Axencia Galega de Innovación para a súa creación e posta en marcha da convocatoria do ano 2018. Estas unidades mixtas son as beneficiarias das axudas concedidas pola Resolución do 12 de novembro de 2018 (DOG núm. 220, do 19 de novembro).

3. Así mesmo, unicamente poderán ser beneficiarias das axudas da modalidade C as unidades mixtas de investigación beneficiarias dunha axuda da Axencia Galega de Innovación para a súa consolidación das convocatorias dos anos 2017 e 2018. Estas unidades mixtas son as beneficiarias das axudas de consolidación concedidas polas resolucións do 31 de outubro de 2017 (DOG núm. 213, do 9 de novembro) e do 13 de novembro de 2018 (DOG núm. 220, do 19 de novembro).

4. As unidades mixtas de investigación non teñen personalidade xurídica propia, polo que se deberán facer constar expresamente, tanto na solicitude como na resolución de concesión, os compromisos de execución asumidos por cada un dos membros da unidade que terán, igualmente, a condición de beneficiarios. O organismo de investigación actuará como representante único da unidade mixta, como único interlocutor coa Administración en todo o procedemento e con poderes bastantes para cumprir as obrigas que como beneficiario corresponden á unidade mixta.

O organismo de investigación será o único perceptor das axudas da Axencia Galega de Innovación previstas nesta convocatoria.

Os integrantes das unidades mixtas, empresas e organismos de investigación serán beneficiarios dos resultados xerados no desenvolvemento das liñas de investigación/actividades das unidades subvencionadas pola Axencia Galega de Innovación ao abeiro da presente convocatoria. Para tal efecto, tanto a empresa como o organismo de investigación participarán e colaborarán directamente nas actividades de I+D+i da unidade mixta coa achega de coñecemento e dos recursos propios que se especifican no artigo seguinte.

5. As unidades mixtas de investigación rexeranse por un acordo regulador asinado entre as partes. Este acordo, que terá natureza de acordo de constitución, acordo de consolidación ou acordo de centro mixto de investigación, segundo corresponda, deberá recoller, como mínimo, o seguinte:

– Características e obxectivos da unidade mixta.

– Descrición das actividades-liña/s de investigación que vai desenvolver a unidade mixta.

– Definición dos compromisos, dereitos e obrigas que adquire cada participante da unidade mixta nos diferentes ámbitos: científico-técnico, económico e organizativo.

– Definición dos compromisos e planificación para a explotación e participación dos resultados xerados: propiedade, protección legal (patentes) e divulgación.

– Acordos de confidencialidade.

– Xestión da unidade mixta de investigación, plan de continxencias e distribución de responsabilidades ante posibles dificultades.

Este acordo regulador poderá ser modificado ao longo da súa vixencia, sempre e cando os cambios non afecten aspectos tidos en conta para a concesión das axudas. Calquera modificación das condicións establecidas no acordo regulador deberá ser comunicada á Axencia Galega de Innovación.

A data deste acordo non poderá ser anterior á data de presentación da solicitude de axuda nin posterior ao prazo de 15 días hábiles a partir do día seguinte á data de publicación da correspondente resolución de concesión no Diario Oficial de Galicia. A data de sinatura deste acordo marcará o inicio das actividades da unidade mixta de investigación.

De acordo co artigo 6 do Regulamento (UE) nº 651/2014, considerarase que as axudas teñen un efecto incentivador se a solicitude de axuda se presentou antes do inicio da actividade.

6. Non poderán acceder á condición de beneficiarias as persoas ou entidades nas cales concorra algunha das prohibicións recollidas no artigo 10 da Lei 9/2007, nin tampouco as empresas en crise, nin aquelas que estean suxeitas a unha orde de recuperación pendente tras unha decisión previa da Comisión Europea que declarase unha axuda ilegal e incompatible co mercado común.

Artigo 5. Requisitos das unidades mixtas de investigación

1. Para os efectos desta convocatoria, enténdese por unidade mixta de investigación a colaboración entre un organismo de investigación e unha ou varias empresas para o desenvolvemento de liñas de I+D+i de forma coordinada e conxunta e na que se cumpran, segundo a modalidade de axuda que proceda, os seguintes requisitos:

– Modalidade A: axudas para a creación e posta en marcha de novas unidades mixtas de investigación (IN853A)

A1. Entidades participantes.

A unidade mixta de investigación estará constituída por un único organismo de investigación e unha única empresa.

Excepcionalmente, poderán formar parte da unidade mixta ata dúas empresas máis sempre que exista unha complementariedade xustificada e unha participación equilibrada co resto de entidades participantes nela.

O organismo de investigación actuará como representante da unidade mixta de investigación ante a Axencia Galega de Innovación, como solicitante da axuda e como único interlocutor con ela.

A2. Áreas/liñas de investigación.

As áreas de investigación das unidades mixtas estarán aliñadas cos retos estratéxicos e prioridades da RIS3 Galicia. A descrición destes retos e o detalle das súas liñas prioritarias detállase no artigo 2.

Todos os integrantes da unidade mixta poderán participar dos resultados que xera a súa actividade coas condicións e limitacións establecidas polas partes para o efecto.

A3. Acordo de constitución e duración das unidades mixtas.

As unidades mixtas de nova creación acreditaranse mediante un acordo de constitución asinado entre as partes (acordo regulador). A data de sinatura deste acordo non poderá ser anterior á data de presentación da solicitude nin posterior ao prazo de 15 días hábiles a partir do día seguinte á data de publicación da correspondente resolución de concesión no Diario Oficial de Galicia. A data de sinatura deste acordo marcará o inicio do período mínimo de duración de 3 anos da unidade mixta e o inicio da súa actividade.

A4. Localización.

As unidades mixtas estarán situadas en Galicia, cunha localización única, e deberán estar perfectamente delimitadas, identificadas e fisicamente diferenciadas das entidades que nela participan. A maiores desta localización principal, cando sexa preciso, poderán dispor de instalacións satélites para atender o traballo de campo ou laboratorio.

A5. Orzamento subvencionable mínimo da unidade mixta de investigación.

a) O orzamento subvencionable mínimo da unidade mixta deberá ser de 1.800.000 euros para o marco temporal 2022-2025, dividido entre os integrantes da unidade mixta.

b) A participación da/s empresa/s no orzamento da unidade mixta debe ser, como mínimo, dun 40 %.

Para o desenvolvemento das actividades da unidade mixta, esta participación poderá ser mediante a execución con medios propios e/ou mediante achegas monetarias ao organismo de investigación. O importe destas achegas monetarias será destinado integramente polo organismo de investigación ao financiamento en exclusiva das actividades da unidade mixta e non computarán para os efectos da achega do organismo de investigación.

c) A participación do organismo de investigación no orzamento da unidade mixta debe ser, como mínimo, dun 10 %. Tendo en conta que o organismo de investigación será o único perceptor da axuda da Axencia Galega de Innovación, tal e como se especifica no artigo 4 desta convocatoria, a porcentaxe de participación do organismo de investigación no orzamento da unidade mixta calcularase descontando da achega total do organismo de investigación a subvención que este reciba de Gain.

d) Estes requisitos mínimos serán de imprescindible cumprimento no momento da resolución de concesión. No caso de que no momento da finalización da duración da unidade mixta de investigación se comprobe algunha desviación nestes requisitos e sempre que se respecten, como mínimo, os límites sinalados na táboa que segue, a Axencia Galega de Innovación poderá resolver a viabilidade da unidade mixta, despois de estudar as circunstancias que orixinaron o incumprimento destes requisitos mínimos, sempre que un informe técnico avale o correcto desenvolvemento das actuacións previstas e a consecución dos fins para os que se concedeu a subvención.

	Importes mínimos
Orzamento da unidade mixta	Como mínimo, o 60 % do orzamento inicial concedido
Participación da/s empresa/s	40 % do orzamento total da unidade mixta
Participación do organismo de investigación	10 % do orzamento total da unidade mixta

Non obstante, aplicaranse a estes supostos as penalizacións e previsións contidas no artigo 33 (gradación dos incumprimentos).

– Modalidade B: axudas para a consolidación de unidades mixtas de investigación (IN853B).

B1. Poderán optar ás axudas de consolidación previstas nesta convocatoria aquelas unidades mixtas de investigación beneficiarias das axudas da Axencia Galega de Innovación para a súa creación e posta en marcha, concedidas pola Resolución do 12 de novembro de 2018 (DOG núm. 220, do 19 de novembro).

B2. Entidades participantes.

A consolidación dunha unidade mixta de investigación implica o deber de manter e fortalecer a alianza estratéxica entre os seus membros: o organismo de investigación galego e a empresa asinante do seu acordo de constitución. Estes membros corresponderanse cos relacionados na Resolución da Axencia Galega de Innovación, do 12 de novembro de 2018, de concesión de axudas para a creación e posta en marcha de unidades mixtas de investigación.

Excepcionalmente, as unidades mixtas de investigación constituídas inicialmente por un organismo de investigación e unha única empresa poderán incorporar á súa composición unha segunda empresa cando exista unha complementariedade xustificada e unha participación equilibrada co resto de entidades participantes na unidade. Neste caso, as dúas empresas participantes na unidade mixta deberán pertencer ao mesmo grupo empresarial no sentido do disposto no artigo 42 do Real decreto do 22 de agosto de 1885, polo que se publica o Código de comercio.

O organismo de investigación actuará como representante da unidade mixta de investigación ante a Axencia Galega de Innovación, como solicitante da axuda e como único interlocutor con ela.

B3. Áreas/liñas de investigación.

As liñas de investigación das unidades mixtas de investigación serán a continuidade, ampliación e evolución das definidas no momento de creación da unidade e materializaranse no desenvolvemento de novas actividades e novos proxectos no marco destas. Estas novas actividades e novos proxectos non poderán ser nunca unha duplicidade dos traballos desenvolvidos na etapa de creación.

Estas áreas/liñas de investigación estarán aliñadas cos retos estratéxicos e prioridades da RIS3 Galicia. A descrición destes retos e o detalle das súas liñas prioritarias detállase no artigo 2.

Todos os integrantes da unidade mixta poderán participar dos resultados que xera a súa actividade coas condicións e limitacións establecidas polas partes para o efecto.

B4. Acordo de consolidación e duración das unidades mixtas.

A consolidación das unidades mixtas acreditarase mediante un acordo de consolidación asinado entre as partes (acordo regulador). A data de sinatura deste acordo non poderá ser anterior á data de presentación da solicitude nin posterior ao prazo de 15 días hábiles a partir do día seguinte á data de publicación da correspondente resolución de concesión no Diario Oficial de Galicia. A data de sinatura deste acordo marcará o inicio do período mínimo de duración de 3 anos da unidade mixta e o inicio das novas actividades programadas para a súa consolidación.

B5. Localización.

B6. Orzamento subvencionable mínimo da unidade mixta de investigación.

a) O orzamento subvencionable mínimo da unidade mixta deberá ser de 2.000.000 de euros para o marco temporal 2022-2025, dividido entre os integrantes da unidade mixta.

b) A participación da/s empresa/s no orzamento da unidade mixta debe ser, como mínimo, dun 40 %.

Para o desenvolvemento das actividades da unidade mixta, esta participación poderá ser mediante a execución con medios propios e/ou mediante achegas monetarias ao organismo de investigación. O importe destas achegas monetarias será destinado integramente polo organismo de investigación ao financiamento en exclusiva das actividades da unidade mixta e non computará para os efectos da achega do organismo de investigación.

	Importes mínimos
Orzamento da unidade mixta	Como mínimo, o 60 % do orzamento inicial concedido
Participación da/s empresa/s	40 % do orzamento total da unidade mixta
Participación do organismo de investigación	10 % do orzamento total da unidade mixta

Non obstante, aplicaranse a estes supostos as penalizacións e as previsións contidas no artigo 33 (graduación dos incumprimentos).

– Modalidade C: axudas para centros mixtos de investigación (IN853C).

C1. Poderán optar ás axudas de centros mixtos de investigación previstas nesta convocatoria aquelas unidades mixtas de investigación beneficiarias das axudas da Axencia Galega de Innovación para a súa consolidación concedidas polas resolucións do 31 de outubro de 2017 (DOG núm. 213, do 9 de novembro) e do 13 de novembro de 2018 (DOG núm. 220, do 19 de novembro).

C2. Entidades participantes.

O centro mixto de investigación é a última fase do Programa de unidades mixtas de investigación tras as fases de creación/posta en marcha e consolidación. Esta fase implica o deber de manter e fortalecer a alianza estratéxica entre os seus membros: o organismo de investigación galego e a empresa asinantes do acordo de consolidación desta. Estes membros corresponderanse cos relacionados nas resolucións da Axencia Galega de Innovación, de concesión de axudas para a consolidación de unidades mixtas de investigación, do 31 de outubro de 2017 e do 13 de novembro de 2018.

Excepcionalmente, as unidades mixtas de investigación consolidadas inicialmente por un organismo de investigación e unha única empresa poderán incorporar á súa composición unha segunda empresa cando exista unha complementariedade xustificada e unha participación equilibrada co resto de entidades participantes na unidade. Neste caso, as dúas empresas participantes na unidade mixta deberán pertencer ao mesmo grupo empresarial no sentido do disposto no artigo 42 do Real decreto do 22 de agosto de 1885, polo que se publica o Código de comercio.

É requisito que as empresas participantes na fase de centro mixto de investigación teñan o seu domicilio social ou centro de traballo en Galicia. De non ter este centro de traballo no momento de presentar a solicitude de axuda, deberán presentar unha declaración que acredite que se establecerá en Galicia antes de iniciarse as actividades do centro mixto de investigación.

O organismo de investigación actuará como representante da unidade mixta de investigación ante a Axencia Galega de Innovación, como solicitante da axuda e como único interlocutor con ela.

C3. Áreas/liñas de investigación.

As liñas de investigación das unidades mixtas de investigación serán a continuidade, ampliación e evolución das definidas no momento de consolidación e materializaranse no desenvolvemento de novas actividades e novos proxectos no marco destas. Estas novas actividades e novos proxectos non poderán ser nunca unha duplicidade dos traballos desenvolvidos na etapa de consolidación nin de creación.

Todos os integrantes da unidade mixta poderán participar dos resultados que xera a súa actividade coas condicións e limitacións establecidas polas partes para o efecto.

C4. Acordo de centro mixto e duración das unidades mixtas.

Esta terceira fase das unidades mixtas acreditarase mediante un acordo de centro mixto de investigación asinado entre as partes (acordo regulador). A data de sinatura deste acordo non poderá ser anterior á data de presentación da solicitude nin posterior ao prazo de 15 días hábiles a partir do día seguinte á data de publicación da correspondente resolución de concesión no Diario Oficial de Galicia. A data de sinatura deste acordo marcará o inicio do período mínimo de duración de 3 anos da unidade mixta e o inicio das novas actividades programadas para o centro mixto de investigación.

C5. Localización.

C6. Orzamento subvencionable mínimo da unidade mixta de investigación.

a) O orzamento subvencionable mínimo da unidade mixta deberá ser de 3.500.000 euros para o marco temporal 2022-2025, dividido entre os integrantes da unidade mixta.

b) A participación da/s empresa/s no orzamento da unidade mixta debe ser, como mínimo, dun 45 %.

Para o desenvolvemento das actividades da unidade mixta, esta participación poderá ser mediante a execución con medios propios e/ou mediante achegas monetarias ao organismo de investigación. O importe destas achegas monetarias, que deberá ser como mínimo o 50 % da achega da empresa/s, será destinado integramente polo organismo de investigación ao financiamento en exclusiva das actividades da unidade mixta e non computará para os efectos da achega do organismo de investigación.

	Importes mínimos
Orzamento da unidade mixta	Como mínimo, o 60 % do orzamento inicial concedido
Participación da/s empresa/s	45 % do orzamento total da unidade mixta Mínimo 50 % en achega monetaria
Participación do organismo de investigación	10 % do orzamento total da unidade mixta

Non obstante, aplicaranse a estes supostos as penalizacións e previsións contidas no artigo 33 (graduación dos incumprimentos).

2. Só se financiarán as actividades das unidades mixtas de investigación desenvolvidas na Comunidade Autónoma galega, sen prexuízo de que as subcontratacións, asistencias técnicas ou colaboracións externas poidan encomendarse a entidades que operen fóra do territorio galego.

Artigo 6. Conceptos subvencionables

1. Terán a consideración de gastos subvencionables aqueles que respondan á natureza da actividade subvencionada e resulten estritamente necesarios para o desenvolvemento das actuacións da unidade mixta de investigación para as que foron concedidos. En ningún caso o custo de adquisición dos gastos subvencionables poderá ser superior ao valor de mercado.

2. Para a anualidade 2022, só se admitirán aqueles gastos que fosen realizados dentro do período comprendido entre a data de sinatura do acordo regulador da unidade mixta de investigación (que non poderá ser anterior á data de presentación da solicitude) e a data límite de execución establecida no artigo 26 desta resolución. Para o resto de anualidades, admitiranse os gastos realizados dentro do período comprendido entre a data límite de execución da anualidade anterior e a data límite de execución da anualidade corrente, tal e como se establece no artigo 26 desta resolución.

Exceptúanse desta regra xeral aqueles gastos cuxos pagamentos deban efectuarse nun momento posterior por se axustaren aos calendarios de recadación, como os ingresos á conta do IRPF ou cotas de seguros sociais liquidables con posterioridade á data de xustificación. A entidade subvencionada quedará obrigada a presentar os documentos acreditativos do seu pagamento antes de finalizar o mes seguinte a aquel en que ao beneficiario lle corresponda liquidar eses gastos.

3. Os custos subvencionables desagregaranse nas seguintes partidas:

a) Custos directos: son aqueles que están directa e inequivocamente relacionados coa execución da actividade subvencionada e cuxo nexo con esta actividade se pode demostrar. Consideraranse custos directos subvencionables os seguintes:

1. Custos de persoal:

a) Poderanse subvencionar os custos de persoal propio do organismo de investigación ou da empresa, así como os gastos de persoal de nova contratación que se incorpore ás entidades para realizar as actuacións para as cales se solicita a axuda (persoal investigador, técnicos e persoal auxiliar que realice actividades de investigación), no tempo imputado exclusivamente para o seu desenvolvemento. Cando esta imputación non sexa do 100 %, na memoria técnica que se achega coa solicitude deberán xustificarse os motivos da porcentaxe de imputación do tempo dedicado á unidade mixta. Non será sexa suficiente unha xustificación xenérica que non permita valorar a adecuación, pertinencia e verificabilidade do tempo imputado.

b) Serán subvencionables os custos de persoal propio do organismo de investigación e da empresa dedicado ás actividades da unidade mixta de investigación, unicamente cando este persoal desempeñe as citadas actividades nas dependencias da unidade e teña, para cada período de xustificación previsto nesta convocatoria, as seguintes dedicacións medias mínimas:

Persoal propio-Dedicacións medias mínimas
Modalidades de axuda	Organismo de investigación	Empresa
Mod. A (IN853A)	50 %	25 %
Mod. B (IN853B)	50 %	25 %
Mod. C (IN853C)	50 %	50 %

Para a modalidade C –centros mixtos de investigación– unicamente será subvencionable o persoal propio da empresa que estea dado de alta nun centro de traballo da empresa na Comunidade Autónoma de Galicia.

c) Serán subvencionables os custos de persoal de nova contratación que se incorpore ao organismo de investigación ou á empresa para a realización das actividades da unidade mixta de investigación, unicamente cando este persoal desempeñe as citadas actividades nas dependencias da unidade e teña, para cada período de xustificación previsto nesta convocatoria, as seguintes dedicacións medias mínimas:

Persoal de nova contratación-Dedicacións medias mínimas
Modalidades de axuda	Organismo de investigación	Empresa
Mod. A (IN853A)	100 %	50 %
Mod. B (IN853B)	100 %	50 %
Mod. C (IN853C)	100 %	100 %

É requisito deste novo persoal que no momento da contratación non teña vinculación laboral co organismo de investigación e non a teña nin a tivese coa/s empresa/s integrante/s da unidade mixta nos 6 meses anteriores á formalización do contrato.

Para a modalidade C –centros mixtos de investigación– unicamente será subvencionable o persoal de nova contratación da empresa que estea dado de alta nun centro de traballo da empresa na Comunidade Autónoma de Galicia.

d) No caso das modalidades B e C, tamén serán subvencionables os custos de persoal que correspondan ao mantemento do novo persoal contratado nas fases de creación e posta en marcha e consolidación, respectivamente. A este persoal seranlle de aplicación as dedicacións medias mínimas ás actividades da unidade mixta de investigación indicadas na alínea c) deste artigo.

Así mesmo, para a modalidade C –centros mixtos de investigación– unicamente será subvencionable o mantemento do persoal de nova contratación da empresa que estea dado de alta nun centro de traballo da empresa na Comunidade Autónoma de Galicia.

h) Só serán subvencionables aqueles gastos de persoal relacionados con actividades que a entidade non levaría a cabo se non se realizasen as actuacións subvencionadas. Consideraranse custos de persoal subvencionables os custos brutos de emprego do persoal beneficiario. Estes gastos inclúen:

– Os soldos e salarios fixados nun contrato de traballo, nunha decisión de nomeamento (acordo laboral) ou na lei, que teñan relación coas responsabilidades especificadas na descrición do posto de traballo correspondente.

– Outros gastos soportados directamente polo empregador como cotizacións sociais, achegas a plans de pensións, así como outras prestacións en favor dos traballadores que sexan obrigatorias en virtude de lei ou convenio ou habituais atendendo aos usos do sector e sempre que non sexan recuperables.

e) Non se considerarán subvencionables:

– No caso dos organismos públicos de investigación, das universidades públicas ou, en xeral, dos organismos públicos con orzamentos consolidables, non se subvencionarán os custos do persoal que xa estean cubertos polas dotacións previstas na Lei de orzamentos xerais do Estado ou nas leis de orzamentos da Comunidade Autónoma.

– Os conceptos incluídos na retribución bruta polo traballador que non garden relación coa actividade subvencionada.

– Os custos de viaxe, indemnizacións ou axudas de custo non teñen natureza de gastos de persoal.

– Os custos de persoal administrativo relacionados con tarefas de xestión da unidade mixta de investigación.

– No caso dos centros mixtos de investigación (procedemento IN853C), os gastos relacionados con aquel persoal traballador da empresa que non estea dado de alta nun centro de traballo da empresa na Comunidade Autónoma de Galicia

– As contratacións de bolseiros/as

– As contratacións en grupos de cotización inferiores aos correspondentes ás titulacións/categorías profesionais que son as establecidas pola Seguridade Social ao regular as bases de cotización por continxencias comúns indicadas na seguinte táboa:

Grupo de cotización	Titulación/categoría profesional
1	Enxeñeiros/licenciados/persoal de alta dirección
2	Enxeñeiros técnicos, peritos e axudantes titulados/diplomados
3	Xefes administrativos e de taller (técnicos especialistas)
4	Axudantes non titulados
5	Oficiais administrativos
6	Subalternos
7	Auxiliares administrativos
8	Oficiais de primeira e segunda
9	Resto de oficiais
10	Peóns
11	Traballadores menores de 18 anos

f) Calquera modificación no cadro de persoal asignado á unidade mixta deberá ser motivada e xustificada e para a súa realización será necesario obter a autorización previa da Axencia Galega de Innovación. Só se admitirán os cambios dunha persoa por outra con idéntica titulación ou cunha titulación susceptible de poder desempeñar idénticas funcións.

2. Custos de equipamento técnico e material instrumental de nova adquisición:

Serán subvencionables os custos de equipamento e material instrumental de nova adquisición, na medida e durante o período en que se utilicen para as actividades de investigación da unidade mixta.

Se o equipamento e material instrumental se dedica exclusivamente ás actividades da unidade mixta e a súa vida útil se esgota ao termo do seu período de execución, considerarase como gasto subvencionable o custo de adquisición. Deberá xustificarse na solicitude a vida útil deste equipamento ou material instrumental.

Se o equipamento e material non se utilizan exclusivamente para as actividades da unidade mixta, por exceder a súa vida útil a duración destas, só serán imputables os custos de amortización que correspondan á duración das actividades da unidade mixta, calculados sobre a base das boas prácticas contables. Para que este custo sexa considerado subvencionable, deberá detallarse na memoria da solicitude o procedemento de cálculo seguido para calcular os custos de amortización, tendo en conta o tempo concreto de imputación ás actividades da unidade mixta.

Dentro desta epígrafe considerarase:

– A instalación do equipamento sempre e cando sexa estritamente necesaria para a súa posta en funcionamento.

– As licenzas e renovacións de licenzas de software se son de uso específico para as actividades de I+D+i da unidade mixta e non de uso xeral.

Nesta epígrafe non se considerarán os seguintes gastos:

– Instalacións de edificios (electricidade, climatización, redes de telecomunicacións...) e as que non sexan estritamente necesarias para o funcionamento de equipamento científico e técnico.

– Equipamento para espazos ou usos alleos ás actividades de I+D da unidade mixta, como zonas de administración ou xestión, salas de reunións, despachos, mobiliario de oficina...

– Licenzas de software xeral.

3. Servizos tecnolóxicos externos:

Consideraranse servizos tecnolóxicos externos aquelas actividades distintas á investigación prestadas por terceiros de forma puntual, tales como análises e ensaios de laboratorio, enxeñaría para a montaxe e operación, estudos e actividades complementarias, consultorías, asistencias técnicas e servizos equivalentes. Se a actividade que se vaia realizar forma parte da propia investigación, deberá ser considerada como subcontratación.

Os servizos tecnolóxicos externos deberán ser necesarios para o desenvolvemento das actividades da unidade mixta de investigación e estar debidamente xustificados na memoria técnica da solicitude.

4. Materiais, subministracións e produtos similares:

Poderanse imputar os gastos de materiais directamente destinados ás actividades de I+D+i da unidade mixta de investigación. Os gastos de material de oficina e consumibles informáticos non se financiarán neste concepto pois considéranse incluídos dentro da porcentaxe de custos indirectos.

5. Subcontratacións:

Consideraranse subcontratacións as actuacións contratadas a terceiros que supoñan a execución dunha parte da actividade investigadora que constitúe o obxecto da subvención.

As entidades subcontratadas non poderán estar vinculadas cos integrantes da unidade mixta agás as excepcións recollidas no artigo 8 desta convocatoria.

As subcontratacións non poderán superar o 50 % da actividade subvencionada e deberán estar debidamente pormenorizadas e xustificadas na memoria técnica da solicitude e estarán sometidas ao cumprimento dos requisitos establecidos no artigo 8 desta convocatoria.

Non se subvencionarán aquelas subcontratacións en que non se motive con precisión o obxecto, alcance e necesidade delas para a realización das actividades da unidade mixta de investigación. En ningún caso poderán subcontratarse actividades que, aumentando o custo da actividade subvencionada, non acheguen valor engadido ao seu contido.

En todo caso, as subcontratacións quedarán suxeitas á verificación técnica no momento de comprobar o desenvolvemento das actividades de unidade mixta.

6. Actuacións de promoción e difusión dos resultados da unidade mixta de investigación:

Estes gastos poderán ser imputados co límite máximo do 2 % do orzamento. Nesta epígrafe englóbanse, entre outros, os seguintes tipos de gasto: difusión e publicidade, preparación de material de difusión, alugamento de salas e organización de conferencias, eventos, congresos e seminarios. Estas actuacións deberán estar exclusiva e unicamente dirixidas á difusión dos resultados da unidade mixta.

7. Custos de viaxe e aloxamento:

Serán subvencionables os custos de viaxe e aloxamento que se precisen para o desenvolvemento das actividades de investigación da unidade mixta e exclusivamente para o persoal adscrito a elas. Estes gastos poderán ser imputados co límite máximo do 5 % do orzamento. Esta epígrafe abranguerá unicamente: gastos de viaxe (por exemplo billetes, quilometraxe do vehículo, peaxes e gastos de aparcadoiro), custos de comida e custos de aloxamento, nas contías máximas sinaladas no Decreto 144/2001, do 7 de xuño, sobre indemnizacións por razóns de servizo ao persoal con destino na Administración autonómica de Galicia (actualizado pola Resolución do 29 de decembro de 2005; DOG núm. 250, do 30 de decembro) para un grupo I.

8. Formación:

Serán subvencionables os custos de formación do persoal adscrito á unidade mixta de investigación en temáticas relacionadas coas súas liñas de investigación (inscrición, matrícula, custos do persoal ou entidade docente no caso de formación específica contratada polas entidades integrantes da unidade mixta...). Non se admitirán as axudas de custo e desprazamento neste punto.

b) Custos indirectos: son aqueles que non están vinculados ou non poden vincularse directamente coa execución da actividade subvencionada por ter carácter estrutural, pero resultan necesarios para a súa realización, nos cales se inclúen os gastos administrativos (tales como xestión administrativa e contable), gastos de supervisión e control de calidade, subministracións (tales como auga, electricidade, calefacción, teléfono), seguros, seguridade ou gastos de limpeza. O custo subvencionable por este concepto será o importe resultante de aplicar unha porcentaxe de ata o 15 % aos custos de persoal imputados ás actividades e dependencias da unidade mixta.

4. En ningún caso se considerarán gastos subvencionables os impostos indirectos cando sexan susceptibles de recuperación ou compensación nin os impostos sobre a renda, de conformidade co artigo 29.9 da Lei 9/2007, do 13 de xuño, de subvencións de Galicia.

No suposto de que o importe do IVE non sexa recuperable, poderá ser considerado un gasto subvencionable. Neste caso deberase presentar un certificado relativo á situación da entidade con respecto ao IVE.

Artigo 7. Ofertas

De acordo co establecido no artigo 29.3 da Lei 9/2007, do 13 de xuño, de subvencións de Galicia, cando o importe do gasto subvencionable, no caso de adquisición de bens de equipamentos e contratación de servizos ou subministracións e materiais, iguale ou supere os 15.000 euros, o beneficiario deberá solicitar, como mínimo, tres ofertas de diferentes provedores, con carácter previo á contratación do compromiso para a prestación do servizo ou a entrega do ben, salvo que polas especiais características dos gastos non exista no mercado suficiente número de entidades que as realicen, presten ou subministren. Estas excepcións deberán xustificarse. A elección entre as ofertas presentadas realizarase de conformidade con criterios de eficiencia e economía, e deberá xustificarse expresamente nunha memoria cando a elección non recaia na proposta económica máis vantaxosa.

No caso de que as entidades beneficiarias estean suxeitas á Lei 9/2017, do 8 de novembro, de contratos do sector público, deberán respectar, no que proceda, a citada normativa nos procedementos de contratación pública.

Artigo 8. Subcontratacións

1. As entidades beneficiarias das axudas poderán subcontratar as actividades subvencionadas ata unha porcentaxe máxima do 50 % do orzamento subvencionable, respectando para iso o establecido nos artigos 27 da Lei 9/2007, do 13 de xuño, de subvencións de Galicia, e 43 do Decreto 11/2009, do 8 de xaneiro, polo que se aproba o regulamento da citada lei e no artigo 7 desta convocatoria. A subcontatación deberá estar debidamente xustificada e motivada na memoria técnica da solicitude.

2. Considéranse subcontratacións as actuacións contratadas a terceiros que supoñan a execución total ou parcial da actividade investigadora que constitúe o obxecto da subvención e que non poden ser realizadas polos beneficiarios, concepto que haberá que xustificar e motivar na memoria técnica da unidade mixta. Queda fóra deste concepto a contratación daqueles gastos en que teña que incorrer o beneficiario para a realización por si mesmo da actividade subvencionada. As tarefas subcontratadas non poderán ser realizadas polos beneficiarios cos seus propios medios, tanto humanos como materiais.

3. Non se poderá subcontratar entre as entidades integrantes da unidade mixta de investigación.

4. Conforme o establecido no artigo 27.3 da citada Lei 9/2007, que establece que cando a actividade concertada con terceiros exceda o 20 % do importe da actividade subvencionada e o dito importe sexa superior a 60.000 euros, a subcontratación estará sometida ao cumprimento dos seguintes requisitos:

a) Que o contrato se subscriba por escrito.

b) Que a súa subscrición a autorice previamente a Axencia Galega de Innovación.

Non poderá fraccionarse un contrato co obxecto de diminuír a súa contía e eludir o cumprimento dos requisitos exixidos no parágrafo anterior.

5. En ningún caso as entidades beneficiarias poderán subcontratar con:

a) Persoas ou entidades incursas nalgunhas das prohibicións que se recollen no artigo 10 da Lei 9/2007.

b) Persoas ou entidades que percibisen outras subvencións para a realización da actividade obxecto da contratación.

c) Intermediarios ou asesores en que os pagamentos se definan como unha porcentaxe do custo total da operación, agás que o dito pagamento estea xustificado con referencia ao valor de mercado do traballo realizado ou dos servizos prestados.

d) Persoas ou entidades solicitantes de axuda na mesma convocatoria que non obtivesen subvención por non reuniren os requisitos ou non alcanzaren a valoración suficiente.

e) Persoas ou entidades en que concorra algunha das circunstancias detalladas no artigo 43.2 do Decreto 11/2009, sen prexuízo da excepción regulada no parágrafo seguinte en relación coas entidades vinculadas.

Excepcionalmente, en aplicación do artigo 27.7 da Lei de subvencións de Galicia, a Axencia Galega de Innovación poderá autorizar a subcontratación de entidades vinculadas cos beneficiarios cando sexa imprescindible para a execución das actividades do proxecto e sempre que se realice de acordo coas condicións normais de mercado. Estas condicións deberán ser xustificadas mediante unha memoria explicativa.

En todo caso, de acordo co artigo 43.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, Gain poderá comprobar, dentro do período de prescrición, o custo, así como o valor de mercado das actividades subcontratadas.

Artigo 9. Forma, lugar e presentación das solicitudes

1. As solicitudes presentaranse obrigatoriamente por medios electrónicos a través dos formularios normalizados dispoñibles na sede electrónica da Xunta de Galicia, https://sede.xunta.gal

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.

Para a presentación electrónica das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

2. O organismo de investigación, como representante da unidade mixta, presentará unha única solicitude e a información contida nos anexos que se indican:

Formularios normalizados (dispoñibles en https://sede.xunta.gal)
IN853A	Anexos I, II, VI e VII
IN853B	Anexos III, IV, VI e VII
IN853C	Anexos V, IV, VI e VII

3. Nos formularios de solicitude IN853A (anexo I), IN853B (anexo III), IN853C (anexo V) e tamén no anexo VI inclúense as seguintes declaracións responsables, relativas a cada un dos membros integrantes da unidade mixta:

1. Declaración responsable de todas as axudas solicitadas e concedidas para a mesma finalidade ou os mesmos custos, procedentes de calquera Administración ou ente público ou privado, nacional ou internacional.

2. Declaración responsable de que todos os datos contidos na solicitude e nos documentos que se achegan son certos e que acepta as condicións e obrigas do Programa de unidades mixtas de investigación recollidas nesta resolución.

3. Declaración responsable de non estar incurso en ningunha das circunstancias previstas no artigo 13 da Lei 38/2003, do 17 de novembro, xeral de subvencións.

4. Declaración responsable de non estar incurso en ningunha clase de inhabilitación para a obtención de axudas prevista nos números 2 e 3 do artigo 10 da Lei 9/2007, do 13 de xuño, de subvencións de Galicia. Deberase comunicar calquera variación das circunstancias recollidas na devandita declaración no momento en que se produza.

5. Declaración responsable de estar ao día no pagamento de obrigas por reintegro de subvencións, conforme o artigo 10.2.g) da Lei 9/2007, do 13 de xuño, de subvencións de Galicia, e o artigo 9 do Regulamento de subvencións de Galicia, aprobado polo Decreto 11/2009, do 8 de xaneiro, e de reembolso de préstamos ou anticipos concedidos con cargo aos orzamentos xerais da Comunidade Autónoma.

6. Declaración responsable de non estar suxeito a unha orde de recuperación pendente tras unha decisión previa da Comisión Europea que declarase unha axuda ilegal ou incompatible co mercado común.

7. Declaración responsable de que a solicitude de axuda é anterior ao comezo das actividades para as que se solicita (efecto incentivador).

8. Declaración responsable de que ten a capacidade administrativa, financeira e operativa para cumprir cos obxectivos da unidade mixta para a que se solicita a axuda.

9. Declaración responsable de que desenvolverá en Galicia as actividades que ten asignadas no plan de traballo da unidade mixta de investigación para o que solicita a axuda.

10. Declaración responsable de que as dependencias da unidade mixta de investigación estarán en Galicia, perfectamente delimitadas, identificadas e fisicamente diferenciadas das entidades que nela participan.

11. Declaración responsable de que non pode ser considerada unha empresa en crise conforme o disposto no artigo 2.18 do Regulamento (UE) nº 651/2014, do 17 de xuño, da Comisión. Non obstante, a Axencia Galega de Innovación utilizará os medios que considere oportunos para a súa verificación e requirirá ao solicitante, se for necesario, os documentos oportunos.

12. Declaración responsable de que, se é o caso, non vai realizar ningunha utilización comercial posterior do prototipo ou proxecto piloto incluído na proposta.

13. Declaración responsable de que manterá un sistema de contabilidade separada ou un código contable adecuado que facilite unha pista de auditoría apropiada en relación con todos os gastos correspondentes aos investimentos realizados ao abeiro da convocatoria, e conservará a documentación xustificativa relativa aos gastos financiados durante un prazo de cinco anos.

14. Declaración responsable de que cumprirá a normativa comunitaria, estatal ou autonómica de aplicación.

4. O prazo de presentación de solicitudes será dun mes contado a partir do día seguinte ao da publicación desta convocatoria no Diario Oficial de Galicia.

Entenderase como último día do prazo o correspondente ao mesmo ordinal do día de publicación. Se o último día do prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicial do cómputo, entenderase que o prazo remata o último día do mes.

5. A presentación da solicitude implica o coñecemento e a aceptación destas bases reguladoras.

Artigo 10. Documentación complementaria

1. Deberá achegarse xunto coas solicitudes a seguinte documentación complementaria.

a) Declaración responsable de cada un dos membros integrantes da unidade mixta (anexo VI).

b) Declaración responsable da categoría de empresa, peme ou grande empresa (anexo VII). Non obstante, a Axencia Galega de Innovación poderá utilizar os medios que considere oportunos para a súa verificación e requirirá ao solicitante, se for necesario, os documentos oportunos.

c) Para a modalidade A (IN853A):

– Memoria técnica da creación e posta en marcha da unidade mixta de investigación (anexo II), na cal se recollerá toda a información, tanto de carácter científico-técnico como económica do proxecto. Con independencia da información recollida neste anexo, poderase incluír información e documentación complementaria.

– Declaración asinada polas entidades participantes en que manifestan a súa intención de constituír unha unidade mixta de investigación atendendo aos requisitos desta convocatoria e ao contido da memoria técnica indicada no punto anterior. Coa sinatura desta declaración as partes manifestan a súa conformidade coa presentación da solicitude de axuda ao abeiro da presente convocatoria polo organismo de investigación como entidade representante da unidade mixta.

d) Para a modalidade B (IN853B):

– Memoria técnica da consolidación da unidade mixta de investigación (anexo IV), na cal se recollerá toda a información, tanto de carácter científico-técnico como económica do proxecto. Con independencia da información recollida neste anexo, poderase incluír información e documentación complementaria.

– Declaración asinada polos integrantes da unidade mixta de investigación en que manifestan a súa intención de consolidar a unidade mixta de investigación atendendo aos requisitos desta convocatoria e ao contido da memoria técnica indicada no punto anterior, acompañada dunha copia do acordo de constitución da unidade mixta. Coa sinatura desta declaración as partes manifestan a súa conformidade coa presentación da solicitude de axuda ao abeiro da presente convocatoria polo organismo de investigación como entidade representante da unidade mixta.

e) Para a modalidade C (IN853C):

– Memoria técnica do centro mixto de investigación (anexo IV), na cal se recollerá toda a información, tanto de carácter científico-técnico como económica do proxecto. Con independencia da información recollida neste anexo, poderase incluír información e documentación complementaria.

– Declaración asinada polos integrantes da unidade mixta de investigación en que manifestan a súa intención de establecer un centro mixto de investigación atendendo aos requisitos desta convocatoria e ao contido da memoria técnica indicada no punto anterior, acompañada dunha copia do acordo de consolidación da unidade mixta de investigación. Coa sinatura desta declaración as partes manifestan a súa conformidade coa presentación da solicitude de axuda ao abeiro da presente convocatoria polo organismo de investigación como entidade representante da unidade mixta.

– De ser o caso, declaración da empresa/s de establecer un centro de traballo en Galicia antes de iniciar as actividades do centro mixto de investigación.

2. Os anexos II, IV, VI e VII estarán dispoñibles na sede electrónica da Xunta de Galicia http://sede.xunta.gal

3. De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán obtidos electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, de non se poderen obter os citados documentos, poderáselle solicitar novamente á persoa interesada a súa achega.

4. A documentación complementaria deberá presentarse electronicamente.

Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.

5. Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

6. No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a súa presentación de forma presencial dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Artigo 11. Comprobación de datos

1. Para a tramitación destes procedementos consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que as persoas interesadas se opoñan á súa consulta:

– Certificados de estar ao día no pagamento coa Seguridade Social, das débedas coa Administración pública da Comunidade Autónoma de Galicia e das obrigas tributarias coa Axencia Estatal da Administración Tributaria (AEAT).

2. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas a presentación dos documentos correspondentes.

4. Non obstante, aquelas entidades comprendidas no artigo 11 do Decreto 11/2009, do 8 de xaneiro, que desenvolve a Lei de subvencións de Galicia, poderán presentar unha declaración responsable de estar ao día no cumprimento das obrigas tributarias ou fronte á Seguridade Social e de non ter pendente ningunha outra débeda coa Administración pública da Comunidade Autónoma de Galicia.

5. No caso de que o solicitante deba presentar estes certificados na fase de emenda, logo de que a consulta polo órgano xestor non obtivese resultado favorable, a data de expedición dos certificados pola Administración correspondente deberá ser posterior á data de consulta polo órgano xestor, o que se comunicará no requirimento de emenda da documentación.

6. A Axencia Galega de Innovación realizará as comprobacións documentais necesarias para garantir que os beneficiarios non incorren en ningunha das circunstancias enumeradas no artigo 2.18 do Regulamento (UE) nº 651/2014, do 17 de xuño, da Comisión, para considerar unha empresa en crise.

Artigo 12. Notificacións

1. As notificacións de resolucións e actos administrativos practicaranse só por medios electrónicos, nos termos previstos na normativa reguladora do procedemento administrativo común.

2. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas practicaranse mediante a comparecencia na sede electrónica da Xunta de Galicia a través do Sistema de notificacións electrónicas de Galicia-Notifica.gal. Este sistema remitirá ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.

3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e as entidades instrumentais do sector publico autonómico. En todo caso, a Administración xeral e as entidades do sector público autonómico de Galicia poderán de oficio crear o indicado enderezo, para os efectos de asegurar que as persoas interesadas cumpran a súa obriga de relacionarse por medios electrónicos.

4. As notificacións entenderanse practicadas no momento en que se produza o acceso ao seu contido e rexeitadas cando transcorresen dez días naturais desde a posta á disposición da notificación sen que se acceda ao seu contido.

5. Se o envío da notificación electrónica non fose posible por problemas técnicos, practicarase a notificación polos medios previstos na normativa reguladora e do procedemento administrativo común.

Artigo 13. Trámites administrativos posteriores á presentación de solicitudes

Todos os trámites administrativos que as persoas interesadas deban realizar tras a presentación da solicitude deberán ser efectuados electronicamente accedendo á Carpeta cidadá da persoa interesada, dispoñible na sede electrónica da Xunta de Galicia.

Artigo 14. Información aos interesados

1. Sobre as diferentes modalidades de axuda desta convocatoria poderase obter información adicional na Axencia Galega de Innovación, a través dos seguintes medios:

a) Páxina web da Axencia Galega de Innovación http://gain.xunta.gal, na súa epígrafe de axudas.

b) Nos teléfonos 981 54 10 96 e 881 99 96 33 da Axencia.

c) No enderezo electrónico xestion.gain@xunta.gal

d) Persoalmente.

e) Na Guía de procedementos e servizos administrativos, no enderezo http://sede.xunta.gal/guia-de-procedementos-e-servizos

2. Así mesmo, para cuestións xerais sobre estes procedementos, poderá facerse uso do teléfono de información xeral da Xunta de Galicia 012.

3. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as entidades beneficiarias quedan informadas da existencia do Rexistro Público de Subvencións.

4. Por outra banda, de conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, transmitiranse á Base de datos nacional de subvencións a información requirida por esta, o texto da convocatoria para a súa publicación na citada base e o seu extracto no Diario Oficial de Galicia.

Artigo 15. Transparencia e bo goberno

1. Deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.

2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que se atopen vinculadas, logo de requirimento, toda a información necesaria para que aquela cumpra obrigas previstas no título I da citada lei.

Artigo 16. Instrución do procedemento e tramitación

1. A Área de Xestión será a competente para a instrución do procedemento de concesión das subvencións e será competencia da Dirección da Axencia Galega de Innovación ditar as resolucións de outorgamento das ditas axudas.

2. De conformidade co establecido no artigo 68 da Lei 39/2015, do 1 de outubro, do procedemento administrativo común das administracións públicas, se a solicitude non reúne algún dos requisitos exixidos nesta convocatoria, ou non se lle xunta a documentación exixida, requirirase o interesado para que, nun prazo de dez días hábiles, emende a falta ou achegue os documentos preceptivos. Neste requirimento farase indicación expresa de que, se así non o fixer, se considerará que desiste na súa petición, logo da correspondente resolución. Non se considerará enmendable a falta de presentación ou a presentación fóra de prazo da solicitude de axuda e/ou memoria técnica do proxecto.

A documentación requirida presentarase electronicamente accedendo á Carpeta cidadá da persoa interesada, dispoñible na sede electrónica da Xunta de Galicia, de acordo co disposto no artigo 14 da Lei 39/2015.

3. Sen prexuízo do disposto no parágrafo anterior, poderá requirirse o solicitante para que forneza cantos datos, documentos complementarios e aclaracións resulten necesarios para tramitar e resolver o procedemento e para o seguimento e avaliación da RIS3 en que se enmarcan estas axudas.

4. Unha vez revisadas as solicitudes e feitas as emendas, aqueles expedientes administrativos que reúnan todos os requisitos e a documentación necesaria serán avaliados por expertos e remitidos á Comisión de Selección.

5. Os expedientes que non cumpran as exixencias contidas nestas bases ou na normativa de aplicación, ou que non conteñan a documentación necesaria, quedarán á disposición do órgano instrutor para que formule a proposta de resolución de inadmisión, en que se indicarán as causas desta.

6. O feito de non axustarse aos termos da convocatoria, así como a ocultación de datos, a súa alteración ou calquera outra manipulación da información será causa de desestimación da solicitude, sen prexuízo do disposto nos artigos 50 e seguintes da Lei 9/2007.

Artigo 17. Comisión de Selección

1. A Comisión de Selección será o órgano colexiado encargado de seleccionar as solicitudes e estará composta por:

(a) Un/unha director/a de área da Axencia Galega de Innovación, ou persoa en quen delegue, que actuará como presidente.

(b) Un/unha funcionario/a da Axencia Galega de Innovación, que actuará como secretario.

2. A Comisión realizará a selección de acordo co informe de avaliación realizado para cada solicitude, conforme os criterios de valoración establecidos no artigo seguinte.

Proporase a concesión das solicitudes por orde decrecente de valoración ata esgotar os créditos dispoñibles, e quedarán, de ser o caso, como suplentes aquelas para as cales non se dispón de crédito suficiente, pero que acadaron unha puntuación igual ou superior á puntuación mínima requirida (60 puntos).

3. A Comisión de Selección emitirá un informe final no cal figurarán, de xeito individualizado, as solicitudes propostas para obter a subvención, con especificación da avaliación que lles corresponde. Así mesmo, indicarase o importe do custo subvencionable e da subvención para cada un deles sen superar o crédito dispoñible e tendo en conta a intensidade de axuda prevista no artigo 19 desta convocatoria.

Artigo 18. Criterios de valoración e selección

1. A valoración de cada solicitude que reúna os requisitos exixidos nesta convocatoria realizarase sobre un total de 100 puntos, que se outorgarán segundo os seguintes criterios de valoración:

1.1. Modalidade A. Creación e posta en marcha de novas unidades mixtas de investigación (IN853A):

A) Calidade científico-técnica da unidade mixta (máximo 38 puntos):

A.1) Obxectivos. Valorarase a calidade, contido e orixinalidade na formulación dos obxectivos. Estes obxectivos deberanse definir de maneira clara e concisa. A descrición da finalidade da unidade mixta deberá ser obxectiva e concreta (máximo 12 puntos).

A.2) Planificación. Valorarase o nivel de excelencia do plan de traballo para a consecución dos obxectivos da proposta e o seguimento do seu avance (máximo 8 puntos).

a) Descrición das fases e actividades (máximo 4 puntos). Deberanse indicar claramente os fitos e os entregables que se producirán durante o desenvolvemento das actividades da unidade mixta.

b) Dirección e coordinación dos traballos (máximo 2 puntos).

c) Cronograma (máximo 2 puntos). Ademais das fases e actividades, deberanse indicar os fitos e os entregables que se van acadar.

A.3) Grao de innovación das liñas de investigación/innovación (máximo 10 puntos).

a) Xustificación do carácter innovador dos obxectivos (máximo 5 puntos).

b) Novidades ou melloras substanciais respecto ao estado actual da arte (máximo 5 puntos).

A.4) Viabilidade das liñas de investigación/innovación (máximo 8 puntos).

a) Compatibilidade e coherencia cos obxectivos da unidade mixta (máximo 4 puntos).

b) Avaliación dos puntos críticos e factores de risco (máximo 4 puntos).

B) Consonancia e adecuación das áreas de investigación da unidade mixta aos retos estratéxicos da RIS3 Galicia. Grao de aliñamento coas liñas prioritarias destes retos (máximo 5 puntos).

C) Avaliación dos integrantes da unidade mixta: capacidade técnica, antecedentes, complementariedade, colaboracións (máximo 19 puntos).

C.1) Antecedentes e experiencia nas liñas de investigación/innovación das entidades participantes da unidade mixta (máximo 5 puntos).

C.2) Complementariedade científico-técnica das entidades participantes para o desenvolvemento dos obxectivos da unidade mixta (máximo 5 puntos).

C.3) Capacidade técnica das entidades participantes nas liñas de investigación da unidade mixta/valoración da calidade e traxectoria científico-técnica do equipo humano integrante da unidade mixta (máximo 5 puntos).

C.4) Colaboración científico-técnica da unidade mixta con pemes, no desenvolvemento das actividades da unidade a través da sinatura do correspondente acordo de colaboración mediante a modalidade de subcontratación. Valorarase con 1 punto por cada 25.000 euros subcontratados, ata un máximo de 4 puntos.

Para acadar a dita puntuación as actividades subvencionadas deberán cumprir cos requisitos indicados nestas bases reguladoras. O solicitante deberá incluír na memoria técnica, por cada unha destas colaboracións, unha descrición detallada e pormenorizada do obxecto, alcance e necesidade destas actividades dentro da unidade mixta.

D) Definición e presentación de proxectos no Programa marco de investigación e innovación da UE e outros programas internacionais (máximo 10 puntos).

D.1) Capacidade da unidade mixta para presentar proxectos no Programa marco de investigación e innovación da UE e outros programas internacionais. Valorarase a experiencia dos integrantes da unidade mixta na elaboración de propostas neste tipo de convocatorias (máximo 5 puntos)

D.2) Resultados obtidos con éxito nos últimos 5 anos. Valorarase cun punto cada proxecto concedido neste tipo de programas ata un máximo de 5 puntos. Deberase achegar documentación acreditativa do proxecto concedido, ademais de indicar de forma tabulada o título do proxecto, o programa específico e o ano de concesión. De omitir algún punto desta información, o resultado con éxito non será tido en conta.

E) Desenvolvemento de novas tecnoloxías e impacto tecnolóxico (máximo 16 puntos).

E.1) Efecto tractor sobre a cadea de valor. Valorarase a capacidade de arrastre da unidade mixta no seu ámbito (máximo 8 puntos).

E.2) Impacto científico-tecnolóxico dos resultados previstos sobre o sector de actividade da unidade mixta (máximo 8 puntos).

F) Impacto socioeconómico da unidade mixta (máximo 12 puntos).

F.1) Interese socioeconómico da unidade mixta atendendo ao estado actual da arte (máximo 4 puntos).

F.2). Xeración de emprego. Valorarase con 1 punto cada emprego xerado ata un máximo de 4 puntos.

F.3) Igualdade de xénero. Participación equilibrada de mulleres no equipo humano do proxecto. Se a porcentaxe de mulleres dentro do equipo é igual ou superior ao 50 %: 2 puntos.

F.4) Pola súa vez, Gain, no compromiso coa investigación e innovación responsable (IIR) e en consonancia coa Axenda 2030,a través desta actuación impulsa no ecosistema galego a adopción de medidas que axuden a garantir e incrementar o impacto social das actividades de I+D+i. Na práctica, a IIR impleméntase como un conxunto de medidas que inclúen e facilitan a participación de múltiples axentes e das persoas na investigación e na innovación, permitindo un acceso máis sinxelo aos seus resultados, a incorporación do xénero e da ética no contido e no proceso de I+D+i, e na educación científica formal e informal.

Neste senso, outorgarase ata un máximo de 2 puntos pola adecuación argumentada do aliñamento dos obxectivos da unidade mixta de investigación a algún dos seguintes criterios:

(1) A I+D realizada axudará a mellorar a calidade de vida e a saúde dos cidadáns.

(2) A I+D realizada terá un impacto positivo na conservación ambiental e/ou dará lugar a unha relación máis sustentable entre a sociedade, a industria e o ambiente.

(3) A I+D realizada axudará a aumentar o coñecemento, a concienciación e a comprensión da ciencia, da enxeñaría e da tecnoloxía entre a sociedade en xeral.

(4) A I+D realizada axudará a mellorar a reputación internacional da rexión.

(5) A I+D realizada cumpre cos criterios éticos da investigación.

Para que unha solicitude poida ser financiada, deberá ter unha nota final igual ou superior aos 60 puntos.

1.2. Modalidade B. Consolidación unidades mixtas de investigación (IN853B):

A) Calidade científico-técnica da unidade mixta (máximo 40 puntos):

A.1) Obxectivos. Valoraranse a calidade, o contido e a orixinalidade na formulación dos obxectivos das liñas de investigación/innovación, que deberán ser a continuidade, ampliación e evolución das definidas no momento de creación da unidade. Estes obxectivos deberanse definir de maneira clara e concisa baseándose nos resultados e evolución das liñas de investigación no período anterior (máximo 12 puntos).

A.2) Planificación. Valorarase o nivel de excelencia do plan de traballo para a consecución dos obxectivos da proposta e o seguimento do seu avance (máximo 9 puntos).

a) Descrición das fases e actividades (máximo 5 puntos). Deberanse indicar claramente os fitos e os entregables que se producirán durante o desenvolvemento das actividades da unidade mixta.

b) Dirección e coordinación dos traballos (máximo 2 puntos).

c) Cronograma (máximo 2 puntos). Ademais das fases e actividades, deberanse indicar os fitos e os entregables que se van acadar.

A.3) Grao de innovación das liñas de investigación/innovación (máximo 10 puntos)

a) Xustificación do carácter innovador dos obxectivos (máximo 5 puntos).

b) Novidades ou melloras substanciais respecto ao estado actual da arte (máximo 5 puntos).

A.4) Viabilidade das liñas de investigación/innovación (máximo 9 puntos).

a) Compatibilidade e coherencia cos obxectivos da unidade mixta (máximo 5 puntos).

b) Avaliación dos puntos críticos e factores de risco (máximo 4 puntos).

B) Resultados acadados na etapa de creación e posta en marcha da unidade mixta (máximo 15 puntos):

B.1) Propostas aprobadas no Programa marco de investigación e innovación da UE ou noutros programas internacionais froito do traballo realizado na etapa de creación e posta en marcha da unidade mixta. Valorarase cun punto cada proxecto concedido neste tipo de programas ata un máximo de 6 puntos.

B.2) Invencións xeradas no período de creación e posta en marcha da unidade mixta. Valorarase con 2 puntos cada solicitude para o rexistro ante organismos oficiais de invencións realizadas ata un máximo de 4 puntos.

B.3) Impacto científico e tecnolóxico dos resultados. Valorarase a repercusión dos resultados nos procesos e produtos nas entidades participantes da unidade mixta e no sector da actividade da unidade mixta (máximo 5 puntos).

C) Internacionalización dos resultados. Valorarase o plan e o grao de internacionalización dos resultados previstos, e o impacto na capacidade de liderado internacional do equipo de investigación nas liñas de investigación (máximo 6 puntos).

D) Detección de oportunidades de negocio nos resultados previstos nas liñas de investigación/innovación e comercialización dos resultados (máximo 15 puntos). Nesta epígrafe valoraranse as seguintes cuestións:

D.1) O potencial e as capacidades para poñer en marcha as oportunidades detectadas, a competencia e os atributos diferenciadores, a análise das barreiras de entrada e a dispoñibilidade de recursos (máximo 7 puntos).

D.2) Plan de negocio e comercialización dos resultados previstos nas liñas de investigación/innovación (máximo 8 puntos).

E) Repercusión dos resultados previstos na etapa de consolidación nos procesos e produtos a nivel individual e no sector da actividade da unidade mixta. Capacidade de arrastre da unidade mixta no seu ámbito (máximo 10 puntos).

F) Colaboración científico-técnica da unidade mixta con pemes, no desenvolvemento das actividades da unidade a través da sinatura do correspondente acordo de colaboración mediante a modalidade de subcontratación. Valorarase con 1 punto por cada 25.000 euros subcontratados ata un máximo de 4 puntos.

G) Xeración de emprego (máximo 6 puntos). Valorarase con 2 puntos cada emprego xerado novo nesta etapa de consolidación, tomando como base o número de empregos xerados na etapa anterior de creación e posta en marcha da unidade mixta.

H) Igualdade de xénero. Participación equilibrada de mulleres no equipo humano do proxecto. Se a porcentaxe de mulleres dentro do equipo é igual ou superior ao 50 %: 2 puntos.

I) Pola súa vez, Gain, no compromiso coa investigación e innovación responsable (IIR) e en consonancia coa Axenda 2030,a través desta actuación impulsa no ecosistema galego a adopción de medidas que axuden a garantir e incrementar o impacto social das actividades de I+D+i. Na práctica, a IIR impleméntase como un conxunto de medidas que inclúen e facilitan a participación de múltiples axentes e das persoas na investigación e na innovación, permitindo un acceso máis sinxelo aos seus resultados, a incorporación do xénero e da ética no contido e no proceso de I+D+i, e na educación científica formal e informal.

Neste senso, outorgarase ata un máximo de 2 puntos pola adecuación argumentada do aliñamento dos obxectivos da unidade mixta de investigación a algún dos seguintes criterios:

(1) A I+D realizada axudará a mellorar a calidade de vida e a saúde dos cidadáns.

(2) A I+D realizada terá un impacto positivo na conservación ambiental e/ou dará lugar a unha relación máis sustentable entre a sociedade, a industria e o ambiente.

(3) A I+D realizada axudará a aumentar o coñecemento, a concienciación e a comprensión da ciencia, da enxeñaría e da tecnoloxía entre a sociedade en xeral.

(4) A I+D realizada axudará a mellorar a reputación internacional da rexión.

(5) A I+D realizada cumpre cos criterios éticos da investigación.

Para que unha solicitude poida ser financiada, deberá ter unha nota final igual ou superior aos 60 puntos.

1.3. Modalidade C. Centros mixtos de investigación (IN853C):

A) Calidade científico-técnica da unidade mixta (máximo 40 puntos):

A.1) Obxectivos. Valoraranse a calidade, o contido e a orixinalidade na formulación dos obxectivos das liñas de investigación/innovación, que deberán ser a continuidade, ampliación e evolución das definidas para a fase de consolidación. Estes obxectivos deberanse definir de maneira clara e concisa baseándose nos resultados e evolución das liñas de investigación no período anterior (máximo 12 puntos).