O 23 de xullo de 2021 (DOG núm. 140) publicouse a Orde do 14 de xullo de 2021 pola que a Vicepresidencia e Consellería de Presidencia, Xustiza e Turismo convocaba unha liña de subvencións para o ano 2021, que establecía as bases reguladoras para a adxudicación de equipamentos de emerxencia, en réxime de concorrencia competitiva, aos concellos de menos de 50.000 habitantes, mancomunidades ou agrupacións de concellos galegos, cofinanciado polo Fondo Europeo de Desenvolvemento Rexional no marco do programa operativo Feder-Galicia 2014-2020.

O 15 de novembro de 2021 (DOG núm. 219) publicouse a Resolución do 4 de novembro de 2021 pola que se resolvía a adxudicación, en réxime de concorrencia competitiva, de equipamentos de emerxencias a diversos concellos, entre os que figuraba o Concello de Allariz cunha coitela para a retirada de neve (liña 4).

No punto segundo da Resolución do 4 de novembro de 2021 establecíase unha lista de reserva conformada por todos os solicitantes admitidos co fin de redistribuír o equipamento non adxudicado por renuncia dalgún beneficiario ou pola posible nova adquisición de máis equipamento, seguindo o establecido no artigo 9.2 da Orde do 23 de xullo de 2021.

Así mesmo, na repartición deste material teríase en conta a puntuación total acadada por cada entidade e a non obtención de equipamento da mesma especie na primeira adxudicación; en todo caso, esta segunda asignación non afectaría a distribución inicial do equipamento entre as entidades solicitantes.

Con posterioridade á adxudicación da subvención en especie e antes de asinar a acta de cesión, o Concello de Allariz renunciou ao equipamento concedido: liña 4: coitela para a retirada de neve.

En aplicación do establecido no artigo 9.2 da Orde do 23 de xullo de 2021, e co fin de redistribuír o equipamento non adxudicado ao Concello de Allariz, unha vez consultada a lista de reserva, a puntuación total acadada por cada entidade e a non obtención de equipamento da mesma especie, procede adxudicar a coitela para a retirada de neve (liña 4) ao concello da Gudiña, co NIF P3203500H.

En consecuencia,

RESOLVO:

Primeiro. Modificar a Resolución do 4 de novembro de 2021 e adxudicar ao Concello da Gudiña o equipamento de emerxencia da liña 4: coitela para a retirada de neve.

Unha vez manifestada por parte da entidade beneficiaria a aceptación da subvención en especie concedida nesta resolución, asinarase a acta de cesión do equipamento concedido.

Segundo. Contra esta resolución, que esgota a vía administrativa, poderase interpoñer recurso de reposición ante este mesmo órgano, no prazo dun mes, ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ao da publicación desta resolución.

Santiago de Compostela, 24 de marzo de 2022

Santiago Villanueva Álvarez
Director xeral de Emerxencias e Interior