Examinada a solicitude de deslindamento formulada polos representantes do MVMC Aceveda ou Coto Castiñeira, pertencente á CMMVVMC de Castiñeira, e do MVMC de San Mamede, pertencente á CMMVVMC de San Mamede de Hedrada, no concello de Vilariño de Conso, resultan os seguintes feitos:
Primeiro. O 8 de xullo de 2022 a CMMVVMC de Castiñeira presentou un escrito (REXEL 2022/1794982) en que solicita a aprobación de deslindamentos entre o MVMC Aceveda ou Coto de Castiñeira e o MVMC de San Mamede.
Coa solicitude achegou a seguinte documentación:
– Acta de deslindamento do 18.1.2022.
– Memoria e planos.
– Acta de conciliación levantada no Xulgado de Paz de Vilariño de Conso.
– Certificacións de aprobación das dúas comunidades.
Segundo. O informe do Servizo de Montes da Xefatura Territorial de Ourense do 14 de xullo de 2022 fai constar que a documentación achegada corresponde ao deslindamento parcial do perímetro estremeiro entre o MVMC Aceveda ou Coto Castiñeira, pertencente á CMMVVMC de Castiñeira, e o MVMC de San Mamede, pertencente á CMMVVMC de San Mamede de Hedrada, desde o vértice 1 (o situado máis ao leste) ata o vértice 6 (o situado máis ao oeste).
Logo de analizar os vértices e a súa localización, conclúese que se deben aprobar os puntos comprendidos entre o 1 e o 5, xa que o 6 se sitúa presumiblemente en terreos do MVMC de Pradoalbar, pertencente á CMMVVMC do mesmo nome, a cal non participou da avinza; de aí que se propón que o vértice 6 se teña en conta simplemente como punto auxiliar que permita definir a dirección da liña de deslindamento a partir do punto 5 e ata a súa intersección coa liña perimetral procedente do esbozo da carpeta-ficha de Pradoalbar.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de xullo de 2022, o Xurado Provincial de Montes en Man Común acordou, por unanimidade, o día 10 de outubro de 2022:
Aprobar o acto de conciliación acadado polas xuntas reitoras do MVMC Aceveda ou Coto Castiñeira, pertencente á CMMVVMC de Castiñeira, e do MVMC de San Mamede, pertencente á CMMVVMC de San Mamede de Hedrada, no concello de Vilariño de Conso.
Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 20 de outubro de 2022
Luis Jorge Álvarez Ferro
Presidente do Xurado Provincial de Clasificación de
Montes Veciñais en Man Común de Ourense