A identificación dos cans e dos animais considerados como potencialmente perigosos vén recollida no artigo 5 do Decreto 90/2002, do 28 de febreiro, polo que se regula a tenza de animais potencialmente perigosos na Comunidade Autónoma de Galicia e se crean os rexistros galegos de Identificación de Animais de Compañía e Potencialmente Perigosos e de Adestradores Caninos. É obxecto do dito decreto o desenvolvemento da Lei estatal 50/1999, do 23 de decembro, sobre o réxime xurídico da tenza de animais potencialmente perigosos, que regula a normativa aplicable á tenza de animais potencialmente perigosos e as accións e medidas necesarias co fin de garantir a súa compatibilidade coa seguridade de persoas e bens e doutros animais.
Do mesmo xeito, posteriormente, a Lei 4/2017, do 3 de outubro, de protección e benestar dos animais de compañía en Galicia estableceu, por unha banda, as normas que garantan a protección e benestar, así como a posesión e tenza responsable dos animais de compañía no ámbito territorial da Comunidade Autónoma de Galicia e, por outra banda, que o Rexistro Galego de Identificación de Animais de Compañía e de Animais Potencialmente Perigosos regulado no Decreto 90/2002, do 28 de febreiro, pasaría a denominarse Rexistro Galego de Identificación de Animais de Compañía (Regiac).
A inscrición no Regiac, sen prexuízo dos demais requisitos establecidos regulamentariamente, contén o código identificador do animal, o número de pasaporte sanitario nos casos en que este sexa preceptivo, a especie e a raza, o sexo, a data do nacemento e o enderezo habitual do animal, xunto cos datos identificativos da persoa propietaria del.
A Dirección Xeral de Patrimonio Natural, dependente da Consellería de Medio Ambiente Territorio e Vivenda, exerce as competencias e funcións atribuídas á consellería en materia de conservación, protección, uso sustentable, mellora e restauración do patrimonio natural e da biodiversidade de Galicia e dos seus elementos etnográficos, e a súa preservación, para o exercicio das súas funcións en materia de elaboración de normativa que afecta o benestar e protección dos animais de compañía conta coa Subdirección Xeral de Biodiversidade e de Recursos Cinexéticos e Piscícolas e, en particular, co Servizo de Conservación da Biodiversidade para aplicación das medidas de protección e benestar de animais de compañía.
O Rexistro Galego de Identificación de Animais de Compañía é un rexistro dependente da Consellería de Medio Ambiente, Territorio e Vivenda no cal se recolle toda a información sobre os animais inscritos. Este rexistro pode ser consultado por todas as administracións públicas e autoridades competentes, así como por aquelas persoas físicas ou xurídicas que acrediten ter interese lexítimo no coñecemento dos datos que constan nel. En todo caso, o uso e tratamento dos datos contidos nos rexistros será acorde co disposto na normativa en materia de protección de datos.
A Lei 40/2015, do 1 de outubro, de réxime xurídico do sector público integra as materias que demandaban unha regulación unitaria das relacións ad intra de cada Administración e das relacións entre elas, como a sinatura e as sedes electrónicas, o intercambio electrónico de datos en contornos pechados de comunicación e a actuación administrativa automatizada.
O artigo 41.1 da Lei 40/2015, do 1 de outubro, define a actuación administrativa automatizada como calquera acto ou actuación realizada integramente a través de medios electrónicos por unha Administración pública no marco dun procedemento administrativo e na cal non interviñese de forma directa un empregado público.
O artigo 41.2 da devandita lei determina que «en caso de actuación administrativa automatizada deberase establecer previamente o órgano ou órganos competentes, segundo os casos, para a definición das especificacións, programación, mantemento, supervisión e control de calidade e, se for o caso, auditoría do sistema de información e do seu código fonte. Así mesmo, indicarase o órgano que debe ser considerado responsable para os efectos de impugnación».
A Lei 4/2019, do 17 de xullo, de administración dixital de Galicia, establece no artigo 76.4 que as actuacións administrativas automatizadas deberán declararse mediante unha resolución conxunta do órgano competente para a definición das especificacións, programación, mantemento, supervisión e control de calidade e, de ser o caso, auditoría do sistema de información e do seu código fonte, así como do órgano responsable para os efectos de impugnación. Nesta resolución especificarase a identificación de tales órganos e os sistemas de sinatura utilizados, no seu caso, para a actuación administrativa automatizada. Así mesmo, o artigo 76.5 indica que se publicará na sede electrónica da Xunta de Galicia e no Diario Oficial de Galicia o texto íntegro das resolucións indicadas no punto anterior.
Por todo o exposto,
RESOLVO:
Primeiro. Declarar as seguintes actuacións administrativas automatizadas a través de sistemas de información no ámbito do Rexistro Galego de Identificación de Animais de Compañía:
Emisión dos certificados de inscrición no Rexistro Galego de Identificación de Animais de Compañía.
Segundo. Os órganos responsables en relación coas actuacións administrativas automatizadas relacionadas no punto anterior serán:
a) A Dirección Xeral de Patrimonio Natural como órgano responsable da definición das especificacións destas actuacións administrativas automatizadas.
b) A Axencia para a Modernización Tecnolóxica de Galicia como órgano responsable da programación, mantemento, supervisión e control de calidade e, de ser o caso, auditoría do sistema de información e do seu código fonte.
c) A Dirección Xeral de Patrimonio Natural como órgano responsable para os efectos de impugnación.
Terceiro. Autorizar a Axencia para a Modernización Tecnolóxica de Galicia para xestionar a solicitude de creación dun selo electrónico denominado Rexistro Galego de Identificación de Animais de Compañía (Regiac) ante a autoridade de servizos de certificación que corresponda.
A titularidade, así como a responsabilidade do seu uso, corresponderá á Dirección Xeral de Patrimonio Natural.
O selo electrónico estará baseado nun certificado electrónico recoñecido ou cualificado e as súas características técnicas xerais serán as que consten na declaración de prácticas de certificación do emisor do certificado.
Os datos necesarios para acceder ao servizo de validación para a verificación do certificado estarán incluídos no certificado.
Os datos que deberán constar no selo electrónico son os seguintes:
a) NIF do organismo subscritor: S1511001H.
b) Organismo subscritor: Dirección Xeral de Patrimonio Natural.
c) Nome do selo: Rexistro Galego de Identificación de Animais de Compañía (Regiac).
Cuarto. Autorizar a Axencia para a Modernización Tecnolóxica de Galicia para utilizar o selo electrónico denominado Rexistro Galego de Identificación de Animais de Compañía (Regiac) para asinar as actuacións administrativas automatizadas declaradas nesta resolución e para realizar as tarefas técnicas precisas para a súa implantación efectiva nos sistemas automatizados que dan soporte ás actuacións e procedementos mencionados.
Quinto. Autorizar a Axencia para a Modernización Tecnolóxica de Galicia para a renovación do selo electrónico Rexistro Galego de Identificación de Animais de Compañía (Regiac) sempre e cando continúen vixentes as actuacións administrativas automatizadas declaradas nesta resolución.
Sexto. A presente resolución producirá efectos desde o día da súa sinatura e publicarase na sede electrónica da Xunta de Galicia.
Santiago de Compostela, 18 de novembro de 2022
Belén María do Campo Piñeiro |
Julián Cerviño Iglesia |
Directora xeral de Patrimonio Natural |
Director da Axencia para a Modernización |