O 28 de outubro de 2022, na Mesa Sectorial, os/as representantes da Administración sanitaria e as organizacións sindicais CIG, CC.OO., CSIF, SATSE e UGT asinaron un acordo sobre as futuras convocatorias de carreira profesional (Diario Oficial de Galicia núm. 231, do 5 de decembro).

Ese acordo, conxuntamente co asinado o 6 de xullo de 2018 (Diario Oficial de Galicia núm. 144, do 30 de xullo), constitúen actualmente as bases aplicables á carreira profesional no ámbito do Servizo Galego de Saúde e das entidades adscritas á Consellería de Sanidade e ao dito organismo.

O Acordo do 28 de outubro de 2022, no seu punto III, relativo ao grao inicial, ademais de ampliar o ámbito do persoal que pode solicitar o dito grao, dispuxo que as solicitudes de grao inicial presentadas ata o último día do prazo que estableza a Dirección Xeral de Recursos Humanos terán efectos desde o 7 de agosto de 2018, sempre que nesa data xa se cumprisen os requisitos para o acceso. Noutro caso, os efectos serán desde o primeiro día, posterior a esa data, en que se cumpran os ditos requisitos.

En execución dese punto do acordo, a Resolución deste centro directivo do 25 de novembro de 2022 (Diario Oficial de Galicia núm. 231, do 5 de decembro), xuntamente con outras previsións relativas á convocatoria ordinaria do ano 2022 e a un procedemento excepcional de encadramento, publicou os novos requisitos para acceder ao grao inicial e dispuxo que as solicitudes de grao inicial presentadas ata o día 31 de xaneiro de 2023 terían efectos desde o 7 de agosto de 2018, nos termos acordados o 28 de outubro.

Posteriormente, a comisión de seguimento da carreira profesional acordou que a mellora relativa ao grao inicial que estableceu o Acordo do 28 de outubro de 2022 (efectos retroactivos) debe aplicarse non unicamente á categoría/especialidade que figure na solicitude do/da profesional entre o 5 de decembro de 2022 e o 31 de xaneiro de 2023 (por prestar servizos nela), senón ás diversas categorías/especialidades en que, de ser o caso, prestase servizos algún día desde o 7 de agosto de 2018; e precisou que, por razóns de carácter técnico, sería tras o 31 de xaneiro de 2023 cando se abriría un prazo especial para presentar as solicitudes de grao inicial nesas outras categorías/especialidades.

Por outra parte, ese mesmo prazo especial debe ser utilizado para que o actual persoal laboral residente en formación do Servizo Galego de Saúde (MIR, EIR...) poida solicitar o grao inicial polos servizos que, de ser o caso, prestase como persoal estatutario a partir do 7 de agosto de 2018.

En atención ao que antecede, en virtude do disposto no artigo 7.e) da Orde do 22 de abril de 2020, de delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, logo do acordo da comisión de seguimento da carreira profesional,

RESOLVO:

Primeiro. Solicitudes de grao inicial noutra categoría/especialidade

O/a profesional que, de conformidade co que estableceu a Resolución deste centro directivo do 25 de novembro de 2022 (Diario Oficial de Galicia núm. 231, do 5 de decembro), tivese habilitada a solicitude de grao inicial entre o 5 de decembro de 2022 e o 31 de xaneiro de 2023 en determinada categoría/especialidade (por prestar servizos nela), e pretenda o recoñecemento do grao inicial nesa ou noutra categoría/especialidade distinta na cal traballase algún día desde o 7 de agosto de 2018, poderá solicitalo no prazo que se iniciará o día seguinte ao da publicación desta resolución no Diario Oficial de Galicia e finalizará o 30 de abril de 2023.

Segundo. Persoal laboral residente en formación do Servizo Galego de Saúde

No mesmo prazo establecido no punto primeiro, o persoal do Servizo Galego de Saúde con vínculo de laboral residente en formación (MIR, EIR...) entre o 5 de decembro de 2022 e o 31 de xaneiro de 2023 poderá solicitar o grao inicial en calquera categoría/especialidade na cal, de ser o caso, prestase servizos algún día desde o 7 de agosto de 2018, no Servizo Galego de Saúde ou entidades adscritas.

Terceiro. Regulación do grao inicial

Esta resolución executa acordos da comisión de seguimento da carreira profesional e é complementaria da ditada por este centro directivo o 25 de novembro de 2022 (Diario Oficial de Galicia núm. 231, do 5 de decembro). Polo tanto, para os demais aspectos da regulación do grao inicial aplicarase o que establece esa Resolución do 25 de novembro de 2022.

Contra esta resolución, que pon fin á vía administrativa, as persoas interesadas poderán interpoñer recurso contencioso-administrativo no prazo de dous meses, contados a partir do día seguinte ao da súa publicación no Diario Oficial de Galicia, nos termos da Lei 29/1998, do 13 de xullo, reguladora da xurisdición contencioso-administrativa. Potestativamente, e con carácter previo, poderán interpoñer recurso de reposición ante esta dirección xeral no prazo dun mes contado a partir da mesma data, de conformidade coa Lei 39/2015, do 1 de outubro, do procedemento administrativo común das administracións públicas.

Santiago de Compostela, 17 de marzo de 2023

Ana María Comesaña Álvarez
Directora xeral de Recursos Humanos