O artigo 43 da Lei 5/2007, do 7 de maio, de emerxencias de Galicia, establece que o persoal do Sistema integrado de protección civil e emerxencias de Galicia estará formado tanto por persoal de carácter profesional de servizos que realice algunha actividade relacionada coa xestión de riscos e de emerxencias como por persoal voluntario de entidades ou organizacións públicas ou privadas sen ánimo de lucro que teñan como fin a protección das persoas, dos bens e do ambiente en situacións de xestión de riscos e de emerxencias. Segundo o artigo 44 da citada lei, este persoal organizarase en grupos operativos.

Mediante a Resolución do 2 de agosto de 2010 publicouse o Plan territorial de emerxencias de Galicia (Platerga), onde se establecen a estrutura de dirección e coordinación e as unidades organizativas para facer fronte dun xeito coordinado ás emerxencias que se poidan producir en Galicia derivadas de riscos naturais, tecnolóxicos ou antrópicos.

Conforme o establecido no artigo 46 da Lei 5/2007, do 7 de maio, de emerxencias de Galicia, e na Lei 1/2007, do 15 de xaneiro, da Academia Galega de Seguridade Pública (Agasp), anúnciase a convocatoria dunha xornada autonómica sobre persoas desaparecidas en Galicia, conforme as seguintes bases:

Primeira. Datos da actividade

Tipo	Xornada
Denominación	Xornada autonómica sobre persoas desaparecidas en Galicia
Modalidade	Presencial
Edicións	1
Horas lectivas	11
Prazas	Limitadas pola capacidade do local

Segunda. Obxectivos e contido da actividade formativa

Obxectivos: coñecer o desenvolvemento dos protocolos de actuación ante a desaparición dunha persoa no medio rural.

Contido: na xornada trataranse os seguintes temas:

1º día.

3 de maio das 9.00 ás 14.00.

Presentación e relatorios:

– Relatorios:

• Que é un desaparecido? A Asociación SOS Desaparecidos.

• O traballo do investigador dentro dun operativo de busca da Unidade Técnica da Policía Xudicial.

• Actuacións, medios e recursos da Unidade Cinolóxica da Garda Civil.

• A unidade de drons da Xunta de Galicia.

• Os servizos de extinción de incendios e salvamento nos obxectivos de busca de persoas desaparecidas (planificación, coordinación e estratexia da busca nos servizos contra incendios).

• As unidades caninas na busca de persoas desaparecidas (sepultadas) (protocolos de busca en derrubamentos e corrementos de terra).

• As agrupacións de Protección Civil nos operativos de busca de persoas desaparecidas.

• O Centro Nacional de Desaparecidos (CNDES) como órgano de xestión centralizada.

3 de maio das 16.00 ás 18.00.

Mesa redonda co obxecto de debater e pór en común os temas tratados ao longo da mañá.

2º día.

4 de maio das 9.00 ás 13.00.

Xornada práctica:

– A planificación e a xestión dunha busca desde o posto de mando avanzado.

– Exercicios prácticos con unidades caninas.

– Exercicios prácticos con unidades de drons.

Terceira. Destinatarios/as

Persoal do Sistema integrado de protección civil e emerxencias de Galicia (artigos 43 e 44 da Lei 5/2007, do 7 de maio, de emerxencias de Galicia), persoal das forzas e corpos de seguridade e outras persoas interesadas no tema.

Cuarta. Desenvolvemento da actividade

Lugar: Agasp (avenida da Cultura, s/n, A Estrada, Pontevedra)

Datas: 3 e 4 de maio de 2023.

Horario:

– Mércores 3 de maio: das 9.00 ás 14.00 e das 16.00 ás 18.00.

– Xoves 4 de maio: das 9.00 ás 13.00.

Quinta. Solicitudes

a) O persoal que desexe participar nos cursos convocados nesta resolución deberá cubrir o formulario de matrícula telemática dispoñible na páxina web da Agasp (htpp://agasp.xunta.gal) e non se admitirá ningunha outra forma ou modelo de solicitude.

É preciso que todas as persoas que desexen participar en cursos da Agasp manteñan actualizados os seus datos persoais, especialmente a conta de correo electrónico e o teléfono móbil, co obxecto de posibles comunicacións. No suposto de non seren correctos ou exactos os ditos datos, a Agasp non é responsable dos posibles prexuízos causados aos interesados.

b) As persoas que non sexan usuarias da páxina web da Agasp deberán previamente darse de alta nela, para o cal é necesario facilitar unha conta persoal de correo electrónico.

c) En caso de dúbida, dificultades técnicas ou necesidade de máis información poderán dirixirse á Agasp a través dos números de teléfono 886 20 61 37, 886 20 61 38, e 886 20 61 11, ou do enderezo de correo electrónico formacion.emerxencias.agasp@xunta.gal, que adoptará as medidas necesarias para facilitar a presentación de solicitudes.

d) A falsidade ou ocultación de datos esenciais para a selección das persoas aspirantes dará lugar á exclusión automática do curso solicitado, así como á imposibilidade de participar en ningunha outra actividade durante o prazo dun ano computado desde o momento en que se detecte o feito.

e) Serán excluídas automaticamente aquelas solicitudes que non teñan cubertos correctamente todos os datos para realizar a selección do alumnado, non se axusten ao modelo normalizado ou sexan presentadas fóra de prazo.

Sexta. Prazo de inscrición

O prazo de inscrición é ata o 28 de abril de 2023 a partir do día seguinte ao da publicación desta resolución no Diario Oficial de Galicia.

Se o último día do prazo é inhábil, entenderase prorrogado ao primeiro día hábil seguinte.

Sétima. Criterios de selección

Non existen criterios de selección, xa que a xornada vai dirixida ao persoal do Sistema integrado de protección civil e emerxencias de Galicia (artigos 43 e 44 da Lei 5/2007, do 7 de maio, de emerxencias de Galicia), ao persoal das forzas e corpos de seguridade e a outras persoas interesadas no tema.

Oitava. Admisión

A Agasp publicará na súa páxina web, http://agasp.xunta.gal, unha relación das persoas seleccionadas para participar no curso.

O alumnado seleccionado só poderá renunciar á actividade formativa por causas de forza maior suficientemente xustificadas.

A renuncia deberase comunicar por escrito á Agasp, por correo electrónico ao enderezo formacion.emerxencias.agasp@xunta.gal, e cunha antelación mínima de 48 horas ao inicio do curso, co fin de poder cubrir a vacante.

A Agasp reserva para si o dereito de solicitar todos aqueles datos que considere necesarios para a adecuada realización da selección.

Novena. Dereitos e deberes do alumnado participante

Durante o desenvolvemento da actividade ao alumnado seralle de aplicación, en canto aos dereitos e deberes, o previsto no Regulamento de réxime interior da Agasp, aprobado mediante a Orde da Consellería de Presidencia, Administracións Públicas e Xustiza, do 4 de febreiro de 2009 (DOG núm. 30, do 12 de febreiro).

Décima. Certificado de asistencia

Ao finalizar a actividade entregaráselles un certificado de asistencia a aquelas persoas que acrediten a súa participación continuada.

Décimo primeira. Facultades da Agasp

A Agasp poderá modificar sen necesidade de nova publicación o desenvolvemento normal da actividade para adaptala ás necesidades da Administración e ás continxencias que poidan xurdir.

A Agasp tamén poderá, sen necesidade de nova publicación, suprimir a actividade, cambiar as datas da súa realización, ampliar novas edicións ou prazas desta, ou suspendela, cando así veña exixido por circunstancias que afecten a súa organización ou docencia.

Así mesmo, facúltase o director xeral para ditar resolución sen necesidade de nova publicación para interpretar, se for o caso, o desenvolvemento da convocatoria ou docencia.

A Estrada, 13 de abril de 2023

Santiago Villanueva Álvarez
Director xeral da Academia Galega de Seguridade Pública