O 19 de maio de 2022 publicouse no Diario Oficial de Galicia a Resolución do 4 de maio pola que se establecen as bases reguladoras para a concesión, en réxime de concorrencia competitiva, das axudas do programa Consolida Bio para o apoio á consolidación do sector biotecnolóxico a través de plans de investimento e innovación, financiados no marco do eixe REACT EU do programa operativo do fondo europeo de desenvolvemento rexional (Feder) de Galicia 2014-2020 como parte da resposta da UE á pandemia da COVID-19, e se procede á súa convocatoria para o ano 2022 (código de procedemento IN861A).

De acordo co disposto nos artigos 4 e 26 das bases reguladoras, a data límite para executar os plans de investimento e innovación é o 30 de abril de 2023. O artigo 26 tamén establece como data limite para presentar a documentación xustificativa dos investimentos o 15 de maio de 2023.

O artigo 45.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (DOG núm. 20, do 29 de xaneiro), establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.

Doutra banda, no artigo 32 da Lei 39/2015, do 1 de outubro, do procedemento administrativo común das administracións públicas (LPACAP), indícase que a ampliación se poderá acordar de oficio ou por instancia de parte, antes do vencemento do prazo de que se trate e se as circunstancias así o aconsellan.

Na actualidade, practicamente todas as empresas, independentemente do seu sector, están a sufrir tanto escaseza de materias primas como o aumento do seu prezo. Isto é especialmente relevante no sector da construción, provocando atrasos na execución de obras, o que está a dificultar a execución e xustificación dos proxectos subvencionados pola presente axuda nas datas establecidas.

Consecuentemente con todo o anterior, e dada a inexistencia de prexuízos a terceiros, a directora da Axencia Galega de Innovación, en exercicio das facultades que lle confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación.

DISPÓN:

Artigo 1. Modificar a data límite que figura no artigo 4.4 das bases reguladoras para executar a segunda anualidade do proxecto, quedando a redacción da seguinte maneira:

«Os plans terán duración plurianual conforme os prazos de execución e xustificación dispostos no artigo 26 da presente orde, sendo o prazo de execución como se indica na seguinte estrutura de anualidades:

• Primeira anualidade: desde a data de solicitude da axuda ata o 30 de novembro de 2022.

• Segunda anualidade: desde o 1 de decembro de 2022 ata o 30 de setembro de 2023».

Artigo 2. Modificar os prazos de xustificación que figuran no artigo 26.2 das bases reguladoras para executar e xustificar a segunda anualidade do proxecto, quedando a redacción da seguinte maneira:

«2. Prazos de xustificación:

	Períodos de emisión das facturas (realización de gastos) e realización de pagamentos dos gastos executados	Prazos de presentación da documentación
Primeira anualidade	Desde a data de solicitude ata o 30 de novembro de 2022	Ata o 12 de decembro de 2022
Segunda anualidade	Desde o 1 de decembro de 2022 ata o 30 de setembro de 2023	Ata o 10 de outubro de 2023

Exceptúanse desta regra xeral aqueles gastos cuxos pagamentos deban efectuarse nun momento posterior por axustarse aos calendarios de recadación, como os ingresos a conta do IRPF ou cotas de seguros sociais liquidables con posterioridade á data de xustificación. A entidade subvencionada quedará obrigada a presentar os documentos acreditativos do seu pagamento antes de finalizar o mes seguinte en que ao beneficiario lle corresponde liquidar eses gastos».

Disposición derradeira única. Entrada en vigor

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 20 de abril de 2023

Patricia Argerey Vilar
Directora da Axencia Galega de Innovación