A Xunta de Goberno Local do Concello de Moaña, na sesión ordinaria que tivo lugar o 24 de abril de 2023, acordou aprobar inicialmente o documento denominado Estudo de detalle para reaxuste de aliñación na rúa Donato Bernárdez Sotelo, promovido por Cordeiro, S.L. e redactado polo arquitecto Félix Gómez Pousa, que ten por obxecto a adaptación e o reaxuste á realidade do terreo ou da vía das aliñacións e rasantes xa fixadas no plan da rúa Donato Bernárdez Sotelo para as parcelas con referencia catastral número 1923020NG2812S e 1923021NG2812S.
En cumprimento do artigo 80.2 da Lei 2/2016, do 10 de febreiro, do solo de Galicia, e dos artigos 194.2 e 207 do seu regulamento, sométese o expediente a información pública polo prazo dun (1) mes contado desde o día seguinte ao da derradeira das publicacións deste anuncio no Diario Oficial de Galicia ou nun dos xornais de maior difusión na provincia, para que calquera persoa poida examinar o estudo de detalle e formular as alegacións que considere convenientes.
A documentación estará á disposición no portal de transparencia do Concello de Moaña (Indicador 6.1. Urbanismo, obras públicas e ambiente/planeamento urbanístico), ao cal se accede a través da sede electrónica do Concello de Moaña (https://concellodemoana.sedelectronica.gal/), a partir da data de publicación do correspondente anuncio no DOG, de conformidade co disposto na letra e) do artigo 7 da Lei 19/2013, do 9 de decembro, de transparencia, acceso á información pública e bo goberno.
Réxime de recursos.
O acordo de aprobación inicial ten a natureza xurídica de acto administrativo de trámite non susceptible de impugnación independente, pero podería ser alegado polos interesados para a súa consideración na resolución que poña fin ao procedemento. Todo isto segundo o establecido no artigo 112 da Lei 39/2015, do 1 de outubro. Así mesmo, poderá presentar, no período de información pública que se lle notifica mediante este anuncio, as alegacións ou reclamacións que se consideren pertinentes, no prazo dun mes contado desde o día seguinte ao da recepción desta notificación.
Moaña, 15 de maio do 2023
Leticia Santos Paz
Alcaldesa
