Mediante a Resolución do 3 de xullo de 2023, da Dirección do Instituto Galego do Consumo e da Competencia, publicouse a convocatoria pola que se regula a concesión de axudas, en réxime de concorrencia non competitiva, para o ano 2023, ás asociacións de consumidores da Comunidade Autónoma de Galicia para actividades de sensibilización, formación e divulgación en materia de sobreendebedamento.
No anexo I da dita resolución establécense as bases reguladoras para a concesión, en réxime de concorrencia non competitiva, de axudas para o ano 2023 ás asociacións de consumidores da Comunidade Autónoma de Galicia para actividades de sensibilización, formación e divulgación en materia de sobreendebedamento.
Tal como se establece no artigo 1.2 das ditas bases, o procedemento de concesión destas axudas tramitarase en réxime de concorrencia non competitiva, de acordo co establecido na Lei 9/2007, do 13 de xuño, de subvencións de Galicia.
O artigo 10 das bases dispón que as axudas se concederán en actos sucesivos ata o esgotamento do crédito. O órgano xestor publicará no DOG e na páxina web do Instituto Galego do Consumo e da Competencia o esgotamento da partida orzamentaria e non admitirá as posteriores solicitudes de subvención, salvo que se produza un incremento de crédito.
Unha vez esgotados os recursos económicos destinados a estas axudas, previstas na Resolución do 3 de xullo de 2023, da Dirección do Instituto Galego do Consumo e da Competencia, pola que se se publica a convocatoria pola que se regula a concesión de axudas, en réxime de concorrencia non competitiva, para o ano 2023, ás asociacións de consumidores da Comunidade Autónoma de Galicia para actividades de sensibilización, formación e divulgación en materia de sobreendebedamento,
RESOLVO:
Primeiro. Facer público que o crédito orzamentario asignado ao financiamento das axudas previstas na devandita Resolución do 3 de xullo de 2023 se esgotou o 19 de xullo de 2023, coa solicitude presentada ás 13.39 horas.
Segundo. Ordenar a publicación da presente resolución no Diario Oficial de Galicia.
Contra esta resolución, que pon fin á vía administrativa, cabe interpoñer recurso potestativo de reposición ante o órgano que a ditou, no prazo dun mes contado desde o día seguinte ao da súa publicación no Diario Oficial de Galicia, ou ben directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses que se contarán desde a mesma data. En todo caso, non se poderá interpoñer recurso contencioso-administrativo ata que se resolva expresamente ou se produza a desestimación presunta do recurso de reposición.
Santiago de Compostela, 28 de agosto de 2023
Manuel Heredia Pérez
Director do Instituto Galego do Consumo e da Competencia