Dando cumprimento ao ordenado na base III.2 da Resolución do 31 de maio de 2021 pola que se convoca o proceso selectivo para o ingreso, polas quendas de acceso libre e de promoción interna, no corpo superior da Administración xeral da Comunidade Autónoma de Galicia, subgrupo A1, escala superior de finanzas (DOG núm. 115, do 18 de xuño), e na base II.4.2 da Resolución do 31 de maio de 2021 pola que se convoca proceso selectivo para o ingreso, pola quenda de acceso libre e promoción interna, no corpo de xestión da Administración xeral da Comunidade Autónoma de Galicia, subgrupo A2, escala técnica de finanzas (DOG núm. 115, do 18 de xuño), esta consellería

RESOLVE:

Primeiro. Obxecto e finalidade

O período de prácticas integrado nos procesos selectivos para o ingreso, polas quendas de acceso libre e de promoción interna, no corpo superior da Administración xeral da Comunidade Autónoma de Galicia, subgrupo A1, escala superior de finanzas (DOG núm. 115, do 18 de xuño), e para o ingreso, pola quenda de acceso libre e promoción interna, no corpo de xestión da Administración xeral da Comunidade Autónoma de Galicia, subgrupo A2, escala técnica de finanzas (DOG núm. 115, do 18 de xuño), consistirán na aplicación á realidade cotiá do traballo administrativo e ao funcionamento da organización dos coñecementos previamente adquiridos polo persoal aspirante.

As prácticas terán como finalidade a súa preparación para o exercicio das funcións específicas tanto da especialidade de inspección e xestión financeira e tributaria como da especialidade de contabilidade e intervención.

Segundo. Organización e dirección

Encoméndase á Secretaría Xeral Técnica e do Patrimonio da Consellería de Facenda e Administración Pública a organización e dirección do período de prácticas.

Terceiro. Destinos en prácticas

O conselleiro de Facenda e Administración Pública, por proposta da Secretaría Xeral Técnica e do Patrimonio da Consellería de Facenda e Administración Pública, disporá as unidades administrativas en que o persoal funcionario en prácticas deberá realizar esta fase do proceso selectivo.

Deste xeito, os destinos en prácticas serán os obtidos no acto de elección de destino convocado pola Resolución do 28 de setembro de 2023 pola que se convocan para a elección de destino en prácticas e se procede ao nomeamento como persoal funcionario en prácticas das persoas aspirantes que superaron as fases de oposición e de concurso do proceso selectivo para o ingreso, polas quendas de acceso libre e de promoción interna, no corpo superior da Administración xeral da Comunidade Autónoma de Galicia, subgrupo A1, escala superior de finanzas, convocado pola Resolución do 31 de maio de 2021, e das persoas aspirantes que superaron as fases de oposición e de concurso do proceso selectivo para o ingreso, pola quenda de acceso libre e promoción interna, no corpo de xestión da Administración xeral da Comunidade Autónoma de Galicia, subgrupo A2, escala técnica de finanzas, convocado pola Resolución do 31 de maio de 2021 (DOG núm. 188, do 3 de outubro).

A realización de prácticas non comporta en ningún caso o desempeño dun posto de traballo.

O persoal funcionario en prácticas estará baixo a dependencia da Intervención Xeral da Comunidade Autónoma, da Dirección Xeral de Planificación e Orzamentos da Consellería de Facenda e Administración Pública e da Axencia Tributaria de Galicia (Atriga).

Cuarto. Duración e xornada de traballo

Segundo o disposto tanto na base III.2 da convocatoria do proceso selectivo da escala superior de finanzas como na base II.4.2 da convocatoria do proceso selectivo da escala técnica de finanzas, o período de prácticas terá unha duración de dous (2) meses, que comezará o día 10 de outubro de 2023 e rematará o 11 de decembro de 2023, ambos incluídos.

Desenvolverase de luns a venres co horario laboral xeral para o persoal da Administración da Xunta de Galicia (das 7.45 ás 15.15 horas).

Quinto. Sistema de cualificación

Unha vez rematado o período de prácticas, o persoal funcionario nomeado coordinador das prácticas pola persoa titular da dirección xeral baixo cuxa dependencia prestaron servizo remitiralle á Secretaría Xeral Técnica e do Patrimonio un informe en que manifeste expresamente se o persoal funcionario en prácticas cumpriu ou non satisfactoriamente coas tarefas encomendadas.

A declaración definitiva de apto/a ou non apto/a competerá ao tribunal cualificador do proceso selectivo, logo de informe proposta da Secretaría Xeral Técnica e do Patrimonio.

Para a avaliación do persoal funcionario en prácticas é preciso que estes presten servizo, polo menos, o 90 % da duración total das prácticas. No caso de non ser posible por causa de forza maior debidamente xustificada, quedará dispensado de facelo, logo de solicitude do/da interesado/a, mediante resolución da Secretaría Xeral Técnica e do Patrimonio. Quedará obrigado a realizar o período de prácticas coa promoción inmediatamente posterior ao momento de desaparición da causa impeditiva, coa prelación que lle corresponda atendendo á puntuación obtida na fase de oposición.

Sexto. Non superación do período de prácticas

O persoal aspirante que non supere o período de prácticas perderá todos os seus dereitos para o nomeamento como persoal funcionario de carreira, mediante resolución motivada da Consellería de Facenda e Administración Pública por proposta da Secretaría Xeral Técnica e do Patrimonio da Consellería de Facenda e Administración Pública, e logo do informe favorable da Comisión de Persoal.

Sétimo. Situación durante o período de prácticas

Durante o período de prácticas, o persoal aspirante será nomeado persoal funcionario en prácticas coa situación xurídica prevista nos artigos 16 e 17 do Decreto 95/1991, do 20 de marzo, polo que se aproba o Regulamento de selección de persoal da Administración da Comunidade Autónoma de Galicia, e demais disposicións de aplicación.

Oitavo. Réxime disciplinario

O persoal funcionario en prácticas estará sometido ao disposto no Regulamento de réxime disciplinario dos funcionarios da Administración da Comunidade Autónoma de Galicia, aprobado polo Decreto 94/1991, do 20 de marzo, nos termos establecidos no seu artigo 1.1.

Noveno

Esta resolución pon fin á vía administrativa e contra ela poderase recorrer potestativamente en reposición, ante este mesmo órgano, no prazo dun mes contado a partir do día seguinte ao da súa publicación no DOG, ou poderase impugnala directamente, ante a orde xurisdicional contencioso-administrativa, de conformidade co disposto no artigo 123 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 28 de setembro de 2023

O conselleiro de Facenda e Administración Pública
P.D. (Orde do 8.1.2020; DOG núm. 16, do 24 de xaneiro)
José María Barreiro Díaz
Director xeral da Función Pública