O 17 de marzo de 2023 publicouse no Diario Oficial de Galicia núm. 54 a Resolución do 14 de marzo de 2023 pola que se establecen as bases reguladoras para a concesión, en réxime de concorrencia non competitiva, das subvencións a concellos para actuacións de embelecemento do litoral galego, no marco do Plan de recuperación, transformación e resiliencia, financiado pola Unión Europea NextGenerationEU, e se procede á súa convocatoria para o ano 2023 (código de procedemento TU503G). Esta resolución modificouse coa Resolución do 11 de abril de 2023, publicada no DOG núm. 72, do 14 de abril.
A dita resolución ten como obxecto establecer as condicións para a concesión de axudas para actuacións de rehabilitación de espazos singulares, dixitalización de recursos con potencial turístico e mellora da fachada turística no ámbito territorial do litoral da Comunidade Autónoma de Galicia. O artigo 6.3 sinala que se consideran gastos subvencionables aqueles que estean realizados e pagados entre o 1 de xaneiro de 2023 e o 31 de outubro de 2023. Por outra banda, o artigo 24 establece que as entidades beneficiarias das axudas quedan obrigadas a acreditar, como data límite o 31 de outubro de 2023, a realización dos proxectos subvencionados e a xustificar a totalidade do orzamento en virtude do establecido na resolución de concesión que lles foi notificada.
No presente procedemento de concesión de axudas estanse a rexistrar numerosas solicitudes de prórroga por parte dos concellos beneficiarios, motivadas polas dificultades existentes tanto na Axencia de Turismo de Galicia como nos concellos para a total implementación do sistema de información de xestión do cumprimento dos fitos e obxectivos definidos no Plan de recuperación, transformación e resiliencia, e ademais non existe a posibilidade de causarlles prexuízos a terceiros.
O artigo 45.3 do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia (DOG núm. 20, do 29 de xaneiro), establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.
Por outra banda, remítese ao disposto con carácter xeral no artigo 32 da Lei 39/2015, do 1 de outubro, do procedemento administrativo común das administracións públicas (LPACAP), no cal se indica que a ampliación poderá acordarse de oficio ou por instancia de parte antes do vencemento do prazo de que se trate e se as circunstancias así o aconsellan.
Polo exposto,
RESOLVO:
Primeiro. Modificar a data límite que figura no artigo 6.3 das bases reguladoras para a concesión, en réxime de concorrencia non competitiva, das subvencións a concellos para actuacións de embelecemento do litoral galego, no marco do Plan de recuperación, transformación e resiliencia, financiado pola Unión Europea NextGenerationEU, e se procede á súa convocatoria para o ano 2023 (código de procedemento TU503G). A redacción do artigo queda da seguinte maneira:
«3. Os gastos subvencionables deberán estar realizados e pagados entre o 1 de xaneiro de 2023 e o 31 de marzo de 2024».
Segundo. Modificar a data límite para presentar a documentación xustificativa que figura no artigo 24 das bases reguladoras mencionadas no punto anterior. A redacción do artigo queda da seguinte maneira:
«1. As entidades beneficiarias das axudas quedan obrigadas a acreditar, con data límite o 31 de marzo de 2024, a realización dos proxectos subvencionados e a xustificar a totalidade do orzamento en virtude do establecido na resolución de concesión que lles foi notificada. En caso de non xustificarse a totalidade do orzamento subvencionable, a subvención será minorada na mesma proporción. En calquera caso, a entidade beneficiaria deberá xustificar unha porcentaxe mínima do 40 % do investimento subvencionable; de non acadarse ese mínimo, enténdese que non se lograron os obxectivos propostos na solicitude e, polo tanto, determinarase a perda do dereito a cobrar a subvención concedida. Se a xustificación é superior ao 40 %, pero sen acadar o 100 % do investimento subvencionable, percibirase a subvención proporcional correspondente ao investimento xustificado admisible, sempre que se cumpra o resto das condicións de concesión e a finalidade ou os obxectivos para os que se concedeu a axuda.
Os gastos xustificados deberán ter correspondencia clara coas partidas do orzamento aceptadas pola Axencia de Turismo de Galicia na resolución de concesión da subvención e responder, de xeito indubidable, á natureza da actividade subvencionada.
O investimento xustificado deberá coincidir coa resolución de concesión da subvención ou coas modificacións autorizadas».
Terceiro. Redistribuír o crédito dispoñible establecido no artigo 2 das bases reguladoras para a concesión, en réxime de concorrencia non competitiva, das subvencións a concellos para actuacións de embelecemento do litoral galego, no marco do Plan de recuperación, transformación e resiliencia, financiado pola Unión Europea NextGenerationEU, e se procede á súa convocatoria para o ano 2023 (código de procedemento TU503G), que terá a seguinte distribución plurianual:
Partida orzamentaria |
2023 |
2024 |
04.A2.761A.760.0 |
128.244,57 € |
2.200.852,83 € |
Cuarto. Publicar esta resolución no Diario Oficial de Galicia para os efectos previstos nos artigos 44 e 45.3 da LPACAP.
Quinto. Esta modificación, unha vez publicada no Diario Oficial de Galicia, non implicará a apertura dun novo prazo para presentar novas solicitudes.
Santiago de Compostela, 26 de outubro de 2023
José Manuel Merelles Remy
Director da Axencia de Turismo de Galicia