Mediante a Orde do 29 de decembro de 2022 reguláronse os criterios de repartición e establecéronse as bases reguladoras e a convocatoria de subvencións da liña en concorrencia non competitiva e da liña en concorrencia competitiva do Fondo de Compensación Ambiental para o ano 2023, de forma individual e mediante o sistema de xestión compartida, destinadas a entidades locais de Galicia (DOG núm. 19, do 27 de xaneiro), que foi modificada pola Orde do 3 de maio de 2023 para ampliar a dotación orzamentaria da liña competitiva (DOG núm. 88, do 9 de maio).
Esta orde tramitouse como expediente anticipado de gasto segundo o previsto na Orde da Consellería de Economía e Facenda do 11 de febreiro de 1998, sobre tramitación anticipada de expedientes de gasto, modificada polas ordes da mesma consellería do 27 de novembro de 2000 e do 25 de outubro de 2001, e de acordo co establecido no proxecto de lei de orzamentos xerais da Comunidade Autónoma para o ano 2023, aprobado polo Consello da Xunta na súa reunión do 18 de outubro de 2022, na cal se acordou a súa remisión ao Parlamento de Galicia para a súa tramitación.
No artigo 30 da orde fíxase no 31 de outubro de 2023 a data límite do prazo para a realización e xustificación das actuacións subvencionadas. Tendo en conta o número de proxectos subvencionados e a complexidade do proceso de tramitación e de contratación nas entidades locais beneficiarias, considerando que as bases reguladoras non conteñen precepto en contra e que non se causa prexuízo a terceiros, é procedente ampliar o devandito prazo de execución e xustificación das actuacións subvencionadas ata o 17 de novembro de 2023 para facer viable o proceso de execución dos proxectos subvencionados e posibilitar o cumprimento do procedemento de xestión.
Esta ampliación do prazo está amparada no artigo 45.3 do Decreto 11/2009, do 8 de xaneiro, polo que se aproba o Regulamento da Lei de subvencións de Galicia, segundo o cal o órgano concedente da subvención poderá outorgar, salvo precepto en contra contido nas bases reguladoras, unha ampliación do prazo establecido para a presentación da xustificación, que non exceda a metade deste e sempre que con iso non se prexudiquen dereitos de terceiros.
Así mesmo, para optimizar a aplicación dos recursos dispoñibles, considérase necesario redistribuír a asignación inicial do Fondo de Compensación Ambiental para o exercicio 2023, establecida para a aplicación orzamentaria 06.04.141A.461.1 no artigo 2.1.c) da Orde do 29 de decembro de 2022 que, ao abeiro do previsto no artigo 25.5. da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental (DOG núm. 252, do 29 de decembro), se destina a incrementar correlativamente na mesma contía a aplicación 06.04.141A.761.1, que ten a mesma finalidade ben que diferente natureza económica.
Esta redistribución respecta o cumprimento da normativa de aplicación ao canon eólico como ingreso afectado que debe xestionarse a través do Fondo de Compensación Ambiental e a execución do mandato legal de aplicar os ingresos derivados do canon eólico á finalidade determinada na orde anual distribuidora do Fondo, segundo determina o artigo 25 da Lei 8/2009, do 22 de decembro.
Con base en todo o anterior, de acordo coa Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compesanción Ambiental coa Lei 9/2007, do 13 de xuño, de subvencións de Galicia, co Decreto 11/2009, do 8 de xaneiro, polo que se aproba o Regulamento da Lei de subvencións, co Decreto 117/2022, do 23 de xuño, polo que se establece a estrutura orgánica da Vicepresidencia Segunda e Consellería de Presidencia, Xustiza e Deportes, en relación co previsto na disposición transitoria primeira do Decreto 79/2023, do 22 de xuño, polo que se fixa a estrutura orgánica das vicepresidencias e das consellerías da Xunta de Galicia, e co disposto na Orde do 29 de decembro de 2022 pola que se regulan os criterios de repartición e se establecen as bases reguladoras e a convocatoria de subvencións da liña en concorrencia non competitiva e da liña en concorrencia competitiva do Fondo de Compensación Ambiental para o ano 2023, de forma individual e mediante o sistema de xestión compartida,
DISPOÑO:
Artigo 1
Modifícase parcialmente a asignación inicial do Fondo de Compensación Ambiental para o exercicio 2023, establecida no artigo 2.1.c) da Orde do 29 de decembro de 2022 na aplicación orzamentaria 06.04.141A.461.1 que, ao abeiro do previsto no artigo 25.5 da Lei 8/2009, do 22 de decembro, se destina a financiar outras actuacións específicas de protección do ambiente, e increméntase correlativamente na mesma contía (275.000,00 €) a aplicación 06.04.141A.761.1, que ten a mesma finalidade ben que diferente natureza económica.
Xa que logo, a dotación das devanditas aplicacións orzamentarias, prevista no citado artigo 2.1.c) da Orde do 29 de decembro de 2022, queda establecida nos importes que se indican a seguir:
Centro xestor |
Aplicación orzamentaria |
Proxecto |
Importe |
Descrición |
Dirección Xeral de Administración Local |
06.04.141A.461.1 |
2013 00770 |
565.515,00 |
Outras actuacións Fondo de Compensación Ambiental |
06.04.141A.761.1 |
2015 00168 |
875.000,00 |
Fondo de Compensación Ambiental (outras actuacións específicas) |
Artigo 2
Modifícase o artigo 30.1 da Orde do 29 de decembro de 2022, que queda redactado nos seguintes termos:
«1. As entidades beneficiarias terán de prazo para executar o proxecto subvencionado e presentar a conta xustificativa ata o 17 de novembro de 2023».
Disposición derradeira
Esta orde entrará en vigor o día da súa publicación no Diario Oficial de Galicia.
Santiago de Compostela, 23 de outubro de 2023
Diego Calvo Pouso
Vicepresidente primeiro e conselleiro de Presidencia,
Xustiza e Deportes