O Decreto 144/2001, do 7 de xuño, establece as indemnizacións por razón do servizo ao persoal con destino na Administración autonómica de Galicia. A súa disposición derradeira cuarta dispón que o importe das indemnizacións se poderá revisar mediante acordo do Consello da Xunta de Galicia, que se publicará no Diario Oficial de Galicia.
Ata o momento actual, o Consello da Xunta de Galicia adoptou tres acordos de revisión ao abeiro do previsto na referida disposición derradeira cuarta do Decreto 144/2001, do 7 de xuño. Con base no primeiro deles, adoptado o 29 de decembro de 2005, véñense aplicando desde o ano 2006 as ditas contías, tanto para as axudas de custo como para as indemnizacións por uso de vehículo particular para o persoal empregado público da Xunta de Galicia.
No ámbito estatal, a Orde do Ministerio de Facenda e Función Pública HFP/793/2023, do 12 de xullo, pola que se revisa o importe da indemnización por uso de vehículo particular establecida no Real decreto 462/2002, do 24 de maio, sobre indemnizacións por razón do servizo, actualizou a contía da indemnización que se vai percibir como gasto de viaxe polo uso de vehículo particular en comisión de servizo ata 0,26 € por quilómetro percorrido.
De conformidade co exposto, á vista do tempo transcorrido desde a última revisión, e tendo en conta as circunstancias da situación económica actual, apréciase a necesidade de actualizar determinados importes: por unha banda, os das indemnizacións por razón do servizo en territorio nacional para gastos por aloxamento e manutención previstas para o persoal empregado público da Xunta de Galicia, e, por outra, a contía da indemnización por uso de vehículo particular polo persoal empregado público da Xunta de Galicia.
En consecuencia, por proposta da Consellería de Facenda e Administración Pública, o Consello da Xunta, na súa reunión do día 23 de novembro de 2023, adoptou o seguinte
ACORDO:
1. Aprobar a actualización das contías das axudas de custo por razón do servizo en territorio nacional para gastos por aloxamento e manutención previstas para o persoal empregado público da Xunta de Galicia, nos importes e para os grupos de persoal reflectidos a continuación, de conformidade coa disposición derradeira cuarta do Decreto 144/2001, do 7 de xuño, sobre indemnizacións por razón do servicio ao persoal con destino na Administración autonómica de Galicia:
|
Axudas de custo en territorio nacional |
||||
|
Grupo |
Persoal |
Por aloxamento |
Por manutención |
Axuda de custo enteira |
|
1º |
Altos cargos, subdirectores xerais e asimilados |
120,92 € |
53,34 € |
174,26 € |
|
2º |
Funcionarios subgrupos A1 e A2 e asimilados |
77,78 € |
44,09 € |
121,87 € |
|
3º |
Funcionarios subgrupo C1 e asimilados |
57,68 € |
33,26 € |
90,94 € |
|
4º |
Persoal non incluído dentro dos anteriores |
57,68 € |
33,26 € |
90,94 € |
2. Aprobar a actualización da contía da indemnización por uso de vehículo particular, que queda fixada como segue:
Uso de vehículo particular, 0,26 euros por quilómetro percorrido.
3. Ordenar a publicación deste acordo no Diario Oficial de Galicia, que entrará en vigor o día seguinte ao da súa publicación.
Santiago de Compostela, 24 de novembro de 2023
Jorge Atán Castro
Secretario xeral técnico e do Patrimonio
da Consellería de Facenda e Administración Pública