A Orde do 29 de decembro de 2022 establece as bases reguladoras das axudas para a creación de empresas para as persoas agricultoras mozas, financiadas co instrumento de recuperación da Unión Europea (EURI), para o apoio aos investimentos nas explotacións agrícolas e para a creación de empresas para o desenvolvemento de pequenas explotacións, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2023 (códigos de procedemento MR404A, MR405A e MR405B).
Unha das liñas de axuda establecidas é a correspondente á creación de empresas para as persoas agricultoras mozas, código de procedemento MR404A. A axuda concederase pola execución do plan empresarial e consistirá nunha prima cuxa contía básica, calculada de acordo cunha estimación dos custos da Seguridade Social da persoa moza durante os cinco anos de permanencia mínima na actividade agraria, establecida en 25.000 €, que poderá incrementarse segundo o establecido no artigo 29 da orde de convocatoria, sen que a axuda total supere os 70.000 €.
A concesión das subvencións, segundo establecen as bases reguladoras, efectuarase mediante concorrencia competitiva.
De conformidade co previsto no artigo 45 da Lei 39/2015, do 1 de outubro, do procedemento administrativo común das administracións públicas, as resolucións destas subvencións convocadas mediante concorrencia competitiva deben ser obxecto de publicación no Diario Oficial de Galicia, a cal producirá os mesmos efectos da notificación.
Unha vez rematada a fase de instrución das solicitudes recibidas, avaliadas as solicitudes por cada xefatura territorial da Consellería do Medio Rural, é informado o órgano colexiado da admisibilidade dos expedientes, segundo o previsto no artigo 7 das bases reguladoras. O dito órgano aplica os criterios de prioridade para que a persoa titular da Subdirección Xeral de Explotacións Agrarias formule a proposta de resolución, tendo en conta as dispoñibilidades orzamentarias. Vista esta, a persoa titular da Dirección Xeral de Gandaría, Agricultura e Industrias Agroalimentarias, por delegación da persoa titular da consellería, procede a resolver a convocatoria.
Por outra parte, de conformidade co establecido no artigo 15 da Lei 9/2007, do 13 de xuño, de subvencións de Galicia, e no artigo 17 da Lei 1/2016, do 18 de xaneiro, de transparencia e bo goberno, os órganos administrativos concedentes publicarán no Diario Oficial de Galicia as subvencións concedidas con expresión da convocatoria, o programa e crédito orzamentario a que se imputen, beneficiario, cantidade concedida e finalidade ou finalidades da subvención.
Por todo o indicado,
RESOLVO:
Primeiro. Conceder as subvencións para a creación de empresas para as persoas agricultoras mozas, financiadas co instrumento de recuperación da Unión Europea (EURI) no marco do Programa de desenvolvemento rural (PDR) de Galicia 2014-2020 (código de procedemento MR404A), convocadas pola Orde do 29 de decembro de 2022 (publicada no DOG do 26 de xaneiro de 2023), que establece as bases reguladoras das axudas para a creación de empresas para as persoas agricultoras mozas, financiadas co instrumento de recuperación da Unión Europea (EURI), para o apoio aos investimentos nas explotacións agrícolas e para a creación de empresas para o desenvolvemento de pequenas explotacións, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2023 (códigos de procedemento MR404A, MR405A e MR405B), aos solicitantes que se relacionan no anexo I, como consecuencia da aplicación dos criterios de valoración e de preferencia establecidos no artigo 28 da convocatoria, pola contías que se reflicten no anexo, e con cargo á aplicación:
14.04.712B 772.0 e proxecto 2022 00137 para as axudas previstas á primeira instalación de persoas agricultoras mozas dos orzamentos xerais da Comunidade Autónoma de Galicia para os anos 2023, 2024 e 2025.
Esta axuda ten por finalidade incrementar a competitividade e o rendemento global das explotacións mediante a súa modernización e asegurar a continuidade do tecido agrario.
Segundo. Denegar as solicitudes de subvención que se relacionan no anexo II por non acadar a puntuación mínima de 10 puntos e, polo menos, dous criterios, necesaria para a concesión da subvención (tal e como se establece no artigo 28 da orde), por non cumprir os requisitos exixidos (como se establece no artigo 24).
Terceiro. Informar os beneficiarios que figuran no anexo I desta resolución do seguinte:
a) As condicións de aplicación a estas axudas son con carácter xeral as establecidas na Orde desta consellería do 29 de decembro de 2022 que regula estas axudas e, supletoriamente, as establecidas na normativa autonómica, estatal e comunitaria aplicable.
b) Non se admitirán modificacións dos investimentos aprobados nin do calendario e datas máximas de xustificación establecidas, salvo nos casos e condicións admitidos nos artigos 10 e 11 da Orde do 29 de decembro de 2022.
c) Para a concesión desta axuda e o establecemento das súas características tívose en conta a información e a documentación incluída coa solicitude de axuda. Toda alteración das condicións iniciais para a concesión das axudas previstas na orde de convocatoria e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.
d) O prazo de xustificación desta axudas será o seguinte:
Creación de empresas para as persoas agricultoras mozas: esta axuda ten dous prazos de xustificación:
– Dentro dos 9 meses seguintes á resolución de aprobación, para solicitar o primeiro pagamento (data máxima de xustificación 2.9.2024).
– E unha vez finalizado o plan empresarial (24 meses desde a data de instalación, sen superar o 31 de xullo de 2025).
e) Para proceder ao pagamento da subvención correspondente a cada prazo da xustificación, o beneficiario deberá cumprir as condicións establecidas na Orde do 29 de decembro de 2022 e presentar a documentación indicada no seu artigo 30, todo iso sen superar as datas máximas de xustificación indicadas anteriormente.
f) Se o beneficiario da axuda cumpre as condicións establecidas na resolución de concesión, executando e xustificando o seu plan empresarial aprobado nos prazos establecidos, e cumprindo co resto dos requisitos da resolución de concesión, aboarase a totalidade da subvención concedida. De non ser así, procederase conforme o establecido no artigo 15 da Orde do 29 de decembro de 2022, relativo a incumprimentos.
g) A persoa agricultora moza comprométese a exercer a actividade agraria durante cinco anos, contados desde a concesión da axuda, e unha vez adquirida a condición de persoa agricultora profesional, mantela ata que finalice o período de compromiso. Deberá manter os elementos materiais que formaron parte do volume de gastos que incrementaron a prima base durante o período de compromisos, así como o resto dos requisitos dos beneficiarios detallados no artigo 24.2 da orde de convocatoria.
h) Conforme o disposto no artigo 3.2 da orde de convocatoria, o beneficiario da axuda deberá dispor dunha contabilidade específica Feader para todas as transaccións relativas á operación subvencionada.
i) Estas axudas proceden do Programa de desenvolvemento rural de Galicia 2014-2020, e están cofinanciadas co instrumento de recuperación da Unión Europea (EURI) do seguinte xeito:
– Medida 6. Desenvolvemento de explotacións agrícolas e empresariais.
• Submedida 6.1. Creación de empresas para persoas agricultoras mozas. Financiado nun 100 % polo instrumento da Unión Europea (EURI). Esta submedida prográmase na área focal 2B: facilitar a entrada no sector agrario de agricultores adecuadamente formados e, en particular, o relevo xeracional.
j) Estas axudas son incompatibles con calquera outra axuda da mesma natureza, concedida coa mesma finalidade ou para os mesmos investimentos e/o gastos, con excepción das axudas correspondentes a garantías para préstamos ou derivadas doutros instrumentos financeiros comunitarios nas condicións establecidas no artigo 37 do Regulamento (UE) nº 1303/2013 do Parlamento Europeo e do Consello.
Conforme iso, se para os mesmos investimentos se solicita ou se concede un préstamo garantido e unha subvención non reembolsable, aplicaranse os límites establecidos no artigo 13 da orde de convocatoria.
k) O beneficiario deberá cumprir coa normativa sobre información e publicidade das axudas do Feader establecida no artigo 17 da orde de convocatoria e no anexo III do Regulamento de execución (UE) nº 808/2014.
Cuarto. Os solicitantes relacionados no anexo I disporán de información máis detallada da axuda aprobada na súa carpeta cidadá.
Quinto. Contra a presente resolución, que pon fin á vía administrativa, poderá interpoñerse protestativamente recurso de reposición ante o conselleiro do Medio Rural, no prazo dun mes, contado a partir do día seguinte ao da súa notificación, ou directamente recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous meses a partir do día seguinte ao da súa notificación, consonte o disposto no artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de que os interesados poidan exercer calquera outro dereito que consideren pertinente.
Santiago de Compostela, 2 de xaneiro de 2024
O conselleiro do Medio Rural
P.D. (Orde do 17.11.2015; DOG núm. 223, do 23 de novembro)
Silvestre José Balseiros Guinarte
Director xeral de Gandaría, Agricultura e Industrias Agroalimentarias