O 10 de outubro de 2024 publicouse no Diario Oficial de Galicia a Orde do 4 de outubro de 2023 pola que se establecen as bases reguladoras e se procede á convocatoria para a concesión do Selo de grao de excelencia a titulacións universitarias de grao impartidas polas universidades do Sistema universitario de Galicia no curso académico 2022/23.
Rematado o prazo para a entrega da documentación necesaria para a tramitación do procedemento establecido no artigo 5 da orde de convocatoria, a comisión avaliadora prevista no artigo 8 da citada orde analizou as solicitudes.
Tendo en conta o anteriormente exposto e atendendo á proposta de resolución da Secretaría Xeral de Universidades, esta consellería
RESOLVE:
Primeiro. Concederlles o Selo de grao de excelencia da Xunta de Galicia ás titulacións universitarias oficiais de grao, impartidas polas universidades do Sistema universitario de Galicia no curso académico 2022/23, que se relacionan no anexo I da presente resolución.
Segundo. O recoñecemento do Selo de grao de excelencia ten unha vixencia de seis cursos académicos, á fin dos cales poderá ser renovado por períodos sucesivos de igual duración.
Terceiro. As universidades responsables dos títulos comprométense a manter os requisitos que deron lugar á obtención da puntuación mínima para acadar o Selo de grao de excelencia da Xunta de Galicia ou, de ser o caso, notificar á Secretaría Xeral de Universidades calquera variación nestes, no prazo dun mes desde que se produza o feito que implica tal variación.
Cuarto. Anualmente, a Secretaría Xeral de Universidades poderá realizar cantas comprobacións considere necesarias para garantir o cumprimento e o mantemento dos requisitos que serviron de base para a concesión do Selo de grao de excelencia, para o cal poderá solicitar canta información sexa necesaria.
Quinto. Contra esta resolución, que esgota a vía administrativa, as universidades poderán interpoñer recurso potestativo de reposición, ante o conselleiro de Cultura, Educación, Formación Profesional e Universidades, no prazo dun mes contado a partir do día seguinte ao da publicación da resolución no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 2 de abril de 2024
Román Rodríguez González
Conselleiro de Cultura, Educación,
Formación Profesional e Universidades, en funcións
ANEXO I
Titulación |
Facultade/escola |
Universidade |
Grao en Enxeñaría Informática |
Facultade de Informática |
Universidade da Coruña |
Grao en Fisioterapia |
Facultade de Fisioterapia |
Universidade da Coruña |
Grao en Veterinaria |
Facultade de Veterinaria |
Universidade de Santiago de Compostela |