O Decreto 42/2024, do 14 de abril, polo que se establece a estrutura orgánica da Xunta de Galicia, e o Decreto 49/2024, do 22 de abril, polo que se fixa a estrutura orgánica das consellerías da Xunta de Galicia, aproban unha nova estrutura das consellerías da Xunta de Galicia.

Por outra parte, o Decreto 48/2024, do 22 de abril, polo que se establecen os órganos superiores e de dirección dependentes da Presidencia da Xunta de Galicia, aproba a estrutura da Presidencia da Xunta de Galicia.

Tras a entrada en vigor destes decretos, é necesario adaptar as estruturas orzamentarias para adecualas á nova realidade.

Esta adecuación require, en primeiro lugar, a creación dunha nova estrutura orzamentaria que permita xestionar os expedientes e consolidar a información sen colidir coa estrutura vixente ata a aprobación dos decretos. O artigo 3 desta orde aproba a nova estrutura, que se recolle no anexo.

Unha vez creada, cómpre adaptar a situación contable da execución dos expedientes á nova estrutura. Esta adaptación aplicarase a aqueles expedientes que permanecen vivos no momento da aprobación dos decretos, imputando a execución contable á nova estrutura para permitir a continuidade dos expedientes. Este proceso realizarase mediante a anulación dos saldos vivos na estrutura anterior, e a súa imputación á nova estrutura, logo da dotación dos correspondentes créditos orzamentarios.

O proceso de adaptación debe realizarse coa maior celeridade posible para garantir a continuidade no funcionamento dos diferentes departamentos. Para lograr este obxectivo, encoméndase á Intervención Xeral da Comunidade Autónoma a realización, de forma masiva e automatizada, das operacións contables que sexan necesarias no proceso de transformación.

No caso de que os criterios obxectivos empregados para a clasificación dos créditos non sexan suficientes para que os procesos automatizados realicen a adecuación detallada dos créditos, as consellerías afectadas deberán tramitar os necesarios expedientes de modificación de créditos con posterioridade ao proceso de transformación contable que regula esta orde. A Intervención Xeral poderá participar tamén nestes procesos cando así o aconselle a operativa concreta de cada caso.

No caso das entidades dependentes da Xunta de Galicia, a modificación da estrutura da Xunta de Galicia e das consellerías non supón unha modificación nas estruturas destas entidades, alén do posible cambio de adscrición dunha consellería a outra. Neste caso, a conservación dos códigos orixinais que figuran nos orzamentos da Comunidade Autónoma para 2024 facilita a xestión e a transparencia da información de cada entidade, o que aconsella non acometer procesos de transformación de códigos contables ou orzamentarios nestas entidades ata a tramitación dos orzamentos do exercicio 2025.

O artigo 5.q) da Lei 9/2023, do 28 de decembro, de orzamentos xerais da Comunidade Autónoma de Galicia para o ano 2024, atribúe á persoa titular da Consellería de Facenda e Administración Pública competencias específicas para realizar, entre outras modificacións orzamentarias, as adaptacións técnicas e as transferencias de crédito que procedan como consecuencia de reorganizacións administrativas, da posta en marcha de organismos autónomos e axencias públicas autonómicas, ou do traspaso de competencias nas cales estean implicadas outras administracións, sen que en ningún caso, polo que se refire aos dous primeiros supostos, poida orixinarse un incremento de gasto.

Á vista da habilitación legal anterior, e das reguladas na disposición derradeira segunda do Decreto 42/2024, do 14 de abril, na disposición derradeira primeira do Decreto 48/2024, do 22 de abril, polo que se establecen os órganos superiores e de dirección dependentes da Presidencia da Xunta de Galicia, e na disposición derradeira terceira do Decreto 49/2024, do 22 de abril, polo que se fixa a estrutura orgánica das consellerías da Xunta de Galicia,

DISPOÑO:

Artigo 1. Obxecto

Esta orde ten por obxecto regular o procedemento para a adaptación das estruturas orzamentarias e contables á nova estrutura da Xunta de Galicia aprobada polo Decreto 42/2024, do 14 de abril, o Decreto 48/2024, do 22 de abril, e o Decreto 49/2024, do 22 de abril, ao abeiro do disposto no artigo 5.q) da Lei 9/2023, do 28 de decembro, de orzamentos xerais da Comunidade Autónoma de Galicia para o ano 2024.

Artigo 2. Ámbito de aplicación

As transformacións e actuacións previstos nesta orde aplicaranse ás consellerías creadas polo Decreto 42/2024, do 14 de abril, e aos órganos regulados no Decreto 48/2024, do 22 de abril.

Non se realizarán cambios nas seccións orzamentarias que non están afectadas polos ditos decretos.

En concreto, non se realizarán cambios nas seguintes seccións orzamentarias:

01 - Parlamento de Galicia

02 - Consello de Contas

03 - Consello da Cultura Galega

20 - Consello Consultivo de Galicia

21 - Transferencias a corporacións locais

22 - Débeda pública da Comunidade Autónoma

23 - Gastos de diversas consellerías

Non se realizarán cambios nas estruturas das entidades contables diferentes da Xunta de Galicia. Estas entidades manterán a súa codificación ata o final do exercicio contable 2024.

Artigo 3. Nova codificación orzamentaria

Apróbase unha nova codificación orzamentaria para as consellerías reguladas no Decreto 42/2024, do 14 de abril, e para os órganos regulados no Decreto 48/2024, do 22 de abril.

A definición da nova codificación detállase no anexo desta orde.

Artigo 4. Asignación de expedientes á nova estrutura

Os expedientes iniciados e non concluídos modificaranse para seren adaptados á nova estrutura.

A modificación dos expedientes supón a transformación da codificación das aplicacións contables á nova estrutura. De ser necesario, por motivos operativos, poderanse modificar tamén outras codificacións asociadas aos expedientes.

Para os efectos do previsto neste artigo, entenderase por expediente iniciado aquel expediente para o que se contabilizase algún documento contable, e que non fose anulado antes do inicio do proceso de transformación contable.

Entenderase por expediente non concluído aquel expediente para o cal non se acadase a fase de «proposta de pagamento» (fase K).

No caso de expedientes que acadasen parcialmente a fase K, a transformación aplicarase aos saldos que non acadasen a dita fase.

Artigo 5. Tramitación de oficio

A Intervención Xeral da Comunidade Autónoma determinará as transformacións necesarias en cada consellería.

A Intervención Xeral da Comunidade Autónoma, a través da Subdirección Xeral de Contabilidade, contabilizará de oficio todas as operacións necesarias para realizar as transformacións previstas nesta orde.

Cando, pola complexidade da transformación, non sexa posible realizala de forma automatizada, a Intervención Xeral poderá realizar as operacións precisas para garantir a integridade do proceso.

Artigo 6. Procedemento

O proceso de transformación contable consistirá en realizar de forma masiva e automatizada as seguintes operacións:

a) Operacións negativas de anulación de saldos pendentes na estrutura antiga.

b) Modificacións de crédito e de límites de gasto en exercicios futuros necesarias para adaptar a situación orzamentaria á nova estrutura.

c) Operacións positivas para imputar os saldos vivos á nova estrutura orzamentaria.

A Intervención Xeral da Comunidade Autónoma poderá ditar as instrucións concretas necesarias para a definición do detalle do proceso.

Artigo 7. Reapertura da contabilidade

Unha vez concluído o proceso de transformación contable, a Intervención Xeral da Comunidade Autónoma comunicará ás consellerías correspondentes a apertura da contabilidade e informará sobre os cambios realizados na codificación dos expedientes e aplicacións.

Artigo 8. Actuacións posteriores

Unha vez completado o proceso automatizado de transformación contable, a Dirección Xeral de Orzamentos e Financiamento Autonómico realizará as modificacións orzamentarias necesarias para completar o proceso de reestruturación, con base no previsto no artigo 5.q) da Lei 9/2023, do 28 de decembro, de orzamentos xerais da Comunidade Autónoma de Galicia para o ano 2024.

Santiago de Compostela, 25 de abril de 2024

Miguel Corgos López-Prado
Conselleiro de Facenda e Administración Pública

ANEXO

Novos códigos orzamentarios das seccións e servizos da Xunta de Galicia

Código sección	Código servizo	Descrición
34		Presidencia da Xunta de Galicia
34	01	Secretaría Xeral da Presidencia
34	03	Secretaría Xeral de Medios
34	05	Oficina de Coordinación Económica da Presidencia
34	06	Asesoría Xurídica Xeral
34	08	Delegacións territoriais
35		Consellería de Presidencia, Xustiza e Deportes
35	01	Secretaría Xeral Técnica
35	02	Secretaría Xeral para o Deporte
35	03	Dirección Xeral de Xustiza
35	04	Dirección Xeral de Administración Local
35	05	Dirección Xeral de Relacións Institucionais e Parlamentarias
35	06	Dirección Xeral de Emerxencias e Interior
35	07	Dirección Xeral de Relacións Exteriores e coa Unión Europea
35	08	Dirección Xeral de Mobilidade
36		Consellería de Medio Ambiente e Cambio Climático
36	01	Secretaría Xeral Técnica
36	02	Dirección Xeral de Enerxías Renovables e Cambio Climático
36	03	Dirección Xeral de Calidade Ambiental e Sostibilidade
36	04	Dirección Xeral de Patrimonio Natural
37		Consellería de Educación, Ciencia, Universidades e Formación Profesional
37	01	Secretaría Xeral Técnica
37	02	Secretaría Xeral de Universidades
37	03	Dirección Xeral de Ordenación e Innovación Educativa
37	04	Dirección Xeral de Formación Profesional
37	05	Dirección Xeral de Centros e Recursos Humanos
38		Consellería de Política Social e Igualdade
38	01	Secretaría Xeral Técnica
38	02	Dirección Xeral de Familia, Infancia e Dinamización Demográfica
38	03	Dirección Xeral de Inclusión Social
38	04	Dirección Xeral de Persoas con Discapacidade
38	05	Dirección Xeral de Maiores e Atención Sociosanitaria
38	06	Dirección Xeral de Loita contra a Violencia de Xénero
38	07	Dirección Xeral de Promoción da Igualdade
39		Consellería de Economía e Industria
39	01	Secretaría Xeral Técnica
39	02	Secretaría Xeral de Industria e Desenvolvemento Enerxético
39	03	Dirección Xeral de Estratexia Industrial e Solo Empresarial
39	04	Dirección Xeral de Planificación Enerxética e Minas
40		Consellería de Facenda e Administración Pública
40	01	Secretaría Xeral Técnica e do Tesouro
40	02	Dirección Xeral de Orzamentos e Financiamento Autonómico
40	03	Dirección Xeral de Cohesión e Fondos Europeos
40	04	Dirección Xeral de Emprego Público e Administración de Persoal
40	05	Dirección Xeral de Simplificación Administrativa e do Patrimonio
40	06	Intervención Xeral da Comunidade Autónoma
41		Consellería de Vivenda e Planificación de Infraestruturas
41	01	Secretaría Xeral Técnica
41	02	Secretaría Xeral de Vivenda e Urbanismo
41	03	Dirección Xeral de Urbanismo
41	04	Xurado de Expropiación de Galicia
42		Consellería de Sanidade
42	01	Secretaría Xeral Técnica
42	02	Dirección Xeral de Saúde Pública
42	03	Dirección Xeral de Planificación e Reforma Sanitaria
43		Consellería de Cultura, Lingua e Xuventude
43	01	Secretaría Xeral Técnica
43	02	Secretaría Xeral da Lingua
43	03	Dirección Xeral de Cultura
43	04	Dirección Xeral de Patrimonio Cultural
43	05	Dirección Xeral de Xuventude
44		Consellería de Emprego, Comercio e Emigración
44	01	Secretaría Xeral Técnica
44	02	Secretaría Xeral de Emprego e Relacións Laborais
44	03	Dirección Xeral de Formación e Cualificación para o Emprego
44	04	Dirección Xeral de Traballo Autónomo e Economía Social
44	05	Secretaría Xeral da Emigración
44	06	Dirección Xeral de Comercio e Consumo
45		Consellería do Medio Rural
45	01	Secretaría Xeral Técnica
45	02	Dirección Xeral de Defensa do Monte
45	03	Dirección Xeral de Planificación e Ordenación Forestal
45	04	Dirección Xeral de Gandaría, Agricultura e Industrias Agroalimentarias
45	05	Dirección Xeral da PAC e do Control da Cadea Alimentaria
45	06	Dirección Xeral de Desenvolvemento Rural
46		Consellería do Mar
46	01	Secretaría Xeral Técnica
46	02	Dirección Xeral de Pesca, Acuicultura e Innovación Tecnolóxica
46	03	Dirección Xeral de Desenvolvemento Pesqueiro