Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Andón da Comunidade de Montes Veciñais en Man Común de Andón, no concello de Forcarei (expediente RE22033).

O 22.4.2024, o Servizo de Montes deste departamento territorial emite o seguinte informe:

Feitos.

Primeiro. O 23.9.2022 e número de rexistro de entrada 2022/2337168 a Comunidade de Montes Veciñais en Man Común (en diante, CMVMC) de Andón, parroquia de Santa María de Aciveiro (Forcarei), solicita a revisión parcial do esbozo do monte veciñal en man común (en diante, MVMC) Andón (ID2768). A dita solicitude deu lugar á apertura do expediente RE22033. Consta no expediente a seguinte documentación:

– Revisión do esbozo do monte veciñal en man común de Andón, parroquia de Aciveiro (Santa María), concello de Forcarei. Asinada polo enxeñeiro de montes colexiado núm. 5039 o 29.12.2023.

– Certificado do secretario coa conformidade do presidente da CMVMC de Andón do 4.9.2022 da aprobación en Asemblea Xeral do 4.9.2022.

– Cartografía en formato dixital ETRS 89 UTM ZONE 29N.

Proponse a modificación dos lindes entre o MVMC de Andón coas parcelas de propietarios particulares limítrofes. Os novos lindes recollen as parcelas catastrais pertencentes ao MVMC de Andón unha vez extraídas aquelas parcelas de propiedade particular.

Segundo. O MVMC de Andón foi clasificado polo Xurado de MVMC de Pontevedra o 5.3.1975 e unha superficie inicial de 82 has. Segundo os datos do Sistema rexistral forestal regulado no artigo 126 da Lei 7/2012, de montes de Galicia:

– Non consta contrato de xestión coa Administración forestal.

– A CMVMC de Andón dispón dun documento de ordenación forestal inscrito no Rexistro de Montes Ordenados de Galicia co núm. 360290 e vixente ata 2031.

– Non constan actos de disposición que modifican o perímetro e superficie do MVMC.

Terceiro. A superficie e perímetro da revisión do esbozo proposto total é de 89,36 has e 9,23 km. Non se modifican os límites establecidos na resolución de clasificación do Xurado de MVMC de Pontevedra do 5.3.1975.

Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Andón (Forcarei), expediente RE22033, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.

Consideracións legais e técnicas.

Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.

Segunda. A revisión do esbozo do monte veciñal Andón proposta polo Servizo de Montes é a presentada pola CMVMC de Andón e queda definido consonte os datos reflectidos no feito terceiro.

Vista a proposta de revisión presentada polo Servizo de Montes sobre a adaptación do esbozo do monte veciñal denominado Andón e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,

ACORDA:

Aprobar a revisión do esbozo do monte veciñal denominado Andón clasificado a prol da CMVMC de Andón (Forcarei), segundo a proposta do Servizo de Montes e a planimetría elaborada por este.

Pontevedra, 29 de xullo de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común