Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra, na sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Mourentán, da Comunidade de Montes Veciñais en Man Común de Mourentán, no concello de Arbo (expediente RE22064).

O 13.3.2024, o Servizo de Montes deste departamento territorial emitiu o seguinte informe:

Feitos:

Primeiro. O 3.4.2021, con número de rexistro de entrada 2021/736093, a Comunidade de Montes Veciñais en Man Común (en diante, CMVMC) de Mourentán solicitou a revisión parcial do esbozo do monte veciñal en man común (en diante, MVMC) Mourentán (ID2446). A dita solicitude deu lugar á apertura do expediente RE22064. Constan no expediente:

– Memoria técnica da revisión do esbozo do monte Mourentán de setembro de 2022, asinada o 20.12.2023 polo enxeñeiro técnico forestal núm. 902 do COETF de Galicia.

– Certificado do secretario do 12.3.2021, coa conformidade do presidente da CMVMC de Mourentán, da aprobación na asemblea xeral do 15.3.2020.

– Cartografía en formato dixital.

A proposta da revisión do monte veciñal Mourentán:

– O monte correspóndese con parte do antigo monte de utilidade pública núm. 163 Chan de Padrón, que está deslindado e marcado. Na parte norte do monte veciñal realizouse un levantamento topográfico dos marcos existentes e co apoio do plano do MUP xeorreferenciado.

– A estrema coa CMVMC de Arbo foi modificada pola Sentenza xudicial 00028/2019, do 24.10.2019, da Sala do Civil do Tribunal Superior de Xustiza de Galicia, que ratifica a Sentenza núm. 147/2017, do Xulgado de Primeira Instancia e Instrución núm. 2 de Ponteareas. A sentenza determina a liña divisoria do monte veciñal de Mourentán polo vento oeste respecto dos montes veciñais de Santa María de Arbo e Cabeiras.

– No perímetro coas propiedades privadas axústase a cartografía catastral e no interior do monte recoñécense varios enclavados de propiedade particular.

– A estrema co MVMC de Cerdeira (As Neves) e co CMVMC Cequeliños e San Xoán de Arbo son obxecto de deslindamentos administrativos, consonte o artigo 53 da Lei 7/2012, do 28 de xuño, de montes de Galicia.

Segundo. O obxecto é a revisión do esbozo do monte Mourentán, con Resolución de clasificación do 13.11.1979 e unha superficie de 501 ha. Segundo os datos do Sistema rexistral forestal (artigo 126 da Lei de montes de Galicia):

– Non ten contrato de xestión coa Administración forestal.

– Non dispón dun documento de xestión forestal.

– Recolle as permutas autorizadas polo Xurado de MVMC de Pontevedra.

– Na estrema co monte veciñal da CMVMC de Cerdeira (As Neves) teñen un deslindamento administrativo DC22099.

– Na estrema co monte veciñal da CMVMC de Cequeliños teñen un deslindamento administrativo (DC22120). Revisión de esbozo RE22062.

– Na estrema co monte veciñal da CMVMC de San Xoán teñen un deslindamento administrativo DC22037. Revisión de esbozo RE22049.

– Sentenza xudicial 00028/2019, do 24.10.2019, da Sala do Civil do Tribunal Superior de Xustiza de Galicia, que ratifica a Sentenza núm.147/2017, do Xulgado de Primeira Instancia e Instrución núm. 2 de Ponteareas, de definición de estremas coa CMVMC de Arbo e Cabeiras.

Terceiro. A revisión do esbozo proposto ten unha superficie de 358,13 ha, descontada a superficie enclavada, e un perímetro de 69,95 km (descontados os deslindamentos DC22037 e DC22120). A descrición da Resolución de clasificación do 13.11.1979, do Xurado de MVMC de Pontevedra, modifícase cos nomes, cabidas e límites que a continuación se consignan:

Monte: Mourentán.

Cabida: 358,13 ha.

Estrema norte: termo municipal da Cañiza.

Estrema sur: monte de Arbo.

Estrema leste: MVMC de Cequeliños e Albeos (Crecente).

Estrema oeste: MVMC de Arbo.

Cuarto. O 2.10.2022, o Xurado Provincial de MVMC de Pontevedra acordou solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Mourentán (Arbo) (expediente RE22064), coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.

Consideracións legais e técnicas:

Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira establece o procedemento de revisión de esbozos de montes veciñais en man común.

Segunda. A revisión do esbozo do monte veciñal Mourentán, da CMVMC de Mourentán, proposta polo Servizo de Montes é a presentada pola comunidade e queda definida consonte os datos reflectidos no feito terceiro.

Vista a proposta de revisión presentada polo Servizo de Montes sobre a adaptación do esbozo do monte veciñal denominado Mourentán, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,

ACORDA:

Aprobar a revisión do esbozo do monte veciñal denominado Mourentán, clasificado a prol da CMVMC de Mourentán (Arbo), segundo a proposta do Servizo de Montes e a planimetría elaborada por este.

Pontevedra, 9 de agosto de 2024

Antonio Crespo Iglesias
Presidente do Xurado Provincial
de Clasificación de Montes Veciñais
en Man Común de Pontevedra