Expediente: IN407A 2024/048-1.

Promotora: UFD Distribución Electricidad, S.A.

Denominación do proxecto: LMTS, CS e CT móbil na subestación San Marcos.

Concello: Oleiros.

Feitos:

1. O día 5.2.2024, a empresa promotora solicitou a autorización administrativa previa e a autorización administrativa de construción do proxecto de execución da instalación de distribución eléctrica mencionada, co obxecto de instalar un centro de transformación móbil que será utilizado nos cortes programados en que sexa necesario dentro do ámbito da Delegación da Coruña.

Ao abeiro do artigo 123 do Real decreto 1955/2000, presentan o proxecto de execución denominado LMTS, CS e CT móbil na subestación San Marcos, asinado o día 5.12.2023 por Antonio Javier Sabín Vázquez, enxeñeiro técnico industrial eléctrico, nº colexiado 2.233.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, solicitouse o informe preceptivo ás distintas entidades afectadas: Concello de Oleiros e AESA.

Non consta no expediente, a día de hoxe, contestación do organismo á solicitude de condicionado.

4. O día 4.9.2024 emitiuse o informe técnico.

Consideracións legais e técnicas:

Primeira. O director territorial é competente para resolver este expediente, ao abeiro do disposto no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG nº 22, do 1 de febreiro), e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG nº 101, do 27 de maio).

Segunda. Lexislación de aplicación:

• Lei 24/2013, do 26 de decembro, do sector eléctrico.

• Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

• Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

• Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

• Real decreto 842/2002, do 2 de agosto, polo que se aproba o Regulamento electrotécnico para baixa tensión.

• Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas:

As instalacións atópanse na subestación San Marcos, no concello de Oleiros e as súas características técnicas son as seguintes:

• Centro de transformación móbil de tipo prefabricado compacto telecontrolado vía GSM/GPRS/FO 2L1P 630kVA/15 kV manobra exterior con envolvente metálica que irá situado no interior da subestación San Marcos (SMC).

• Novo centro de seccionamento de tipo prefabricado compacto manobra exterior con envolvente de formigón 3L 2TC GSM/GPRS/FO+TT que irá situado no interior da subestación San Marcos (SMC).

• Liña de media tensión soterrada en condutor de tipo RHZ1-2 OL(S)-12/20 kV 3 (1×240) mm² Al, para alimentar o centro de seccionamento, que discorrerá canalizado nunha gabia de dimensións de 0,40 metros de ancho e de 1,00 metro de profundidade nunha lonxitude de 20 m, con inicio e fin en empalmes que se van realizar no LMTS SMC712, unha vez entra e saia do CS proxectado.

• Liña de media tensión soterrada con 15 metros de condutor de tipo RHZ1-2 OL(S)-12/20 kV 3 (1×240) mm² Al, para alimentar o Centro de transformación móbil proxectado. O condutor discorrerá canalizado nunha gabia de dimensións de 0,40 m de ancho e 0,80 m de profundidade.

Cuarta. No expediente consta un informe favorable dos servizos técnicos deste departamento territorial.

De acordo con todo o exposto,

RESOLVO:

1. Conceder a autorización administrativa previa e a autorización administrativa de construción da dita instalación de distribución eléctrica.

2. A instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.

3. Para a posta en explotación da instalación autorizada, deberá achegar ante este departamento territorial unha solicitude coa cal xuntará a seguinte documentación:

• As declaracións de conformidade relativas ao material ou equipamento, e as certificacións ou homologacións, se procede.

• Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas oportunas na montaxe da instalación e posta a punto.

• Planimetría as built da instalación eléctrica en formato shape.

4. Esta aprobación outórgase sen prexuízo doutras que sexan de aplicación segundo a lexislación vixente, en especial, no relativo á ordenación do territorio e ao ambiente.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía e Industria, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña,11 de setembro de 2024

Isidoro Martínez Arca
Director territorial da Coruña