Mediante a Orde do 10 de setembro de 2024 (DOG núm. 181, do 19 de setembro) convocouse a provisión, polo sistema de libre designación, dun posto de traballo vacante na Axencia Galegas das Industrias Culturais (Agadic).

De conformidade co establecido no artigo 92 da Lei 2/2015, do 29 de abril, do emprego público de Galicia, e no artigo 27 do Decreto 151/2022, do 4 de agosto, polo que se aproba o Regulamento dos procedementos de mobilidade do persoal funcionario de carreira da Administración xeral da Comunidade Autónoma de Galicia e das entidades públicas instrumentais integrantes do sector público autonómico, e demais normativa vixente, esta consellería

RESOLVE:

Primeiro. Adxudicarlle o destino no posto de traballo que se indica á persoa funcionaria de carreira que se relaciona no anexo I da presente orde, seleccionada conforme o establecido nas bases da convocatoria, efectuada pola Orde do 10 de setembro de 2024.

Segundo. O cesamento no actual destino efectuarase no prazo de tres (3) días hábiles contados a partir do seguinte ao da publicación desta orde no Diario Oficial de Galicia.

O prazo para tomar posesión no novo destino obtido será de tres (3) días hábiles, se non implica cambio de residencia, ou de sete (7) días hábiles se comporta cambio de residencia. Cando a persoa adxudicataria do posto obteña coa súa toma de posesión o reingreso ao servizo activo, o prazo será dun (1) mes, de conformidade co establecido no artigo 8 do Decreto 151/2022, do 4 de agosto.

Terceiro. A xefatura do centro en que cause baixa a persoa funcionaria, así como a daquel en que obteña praza, realizará, dentro dos prazos sinalados no punto anterior, as dilixencias de cesamento e toma de posesión, das que se dará traslado á Dirección Xeral de Emprego Público e Administración de Persoal.

Contra a presente orde, que esgota a vía administrativa, as persoas interesadas poderán interpoñer recurso potestativo de reposición perante o conselleiro de Cultura, Lingua e Xuventude, no prazo dun mes contado a partir do día seguinte ao da súa publicación no Diario Oficial de Galicia, de conformidade co establecido na Lei 39/2015, do 1 de outubro, do procedemento administrativo común das administracións públicas, ou poderán impugnala directamente perante o xulgado do contencioso-administrativo competente no prazo de dous meses contados a partir da mesma data, segundo o establecido na Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 17 de outubro de 2024

José Carlos López Campos
Conselleiro de Cultura, Lingua e Xuventude

ANEXO I

Nome e apelidos: María Ángeles Antón Vilasánchez.

NIF: ***4293**.

Subgrupo: A1.

Corpo ou escala: corpo superior da Administración xeral da Comunidade Autónoma de Galicia.

Posto de traballo: subdirector/a xeral do Departamento de Coordinación Xeral e Xerencia.

Código do posto: ED.A11.00.001.15770.001.

Nivel: 30.

Centro de destino: Axencia Galega das Industrias Culturais (Agadic).

Localidade: Santiago de Compostela.

* O NIF amósase cifrado coa finalidade de protexer os datos de carácter persoal.