Antecedentes:
Mediante a Resolución da Secretaría Xeral Técnica da Consellería de Infraestruturas e Mobilidade, do 7 de outubro de 2021, e a súa posterior modificación do 28 de outubro de 2022, encoméndaselle á Axencia Galega de Infraestruturas a xestión técnica dos proxectos referidos a actuacións de fomento da mobilidade sostible en contornas urbanas e metropolitanas.
O 3 de xaneiro de 2023 publicouse no Diario Oficial de Galicia número 2, o Anuncio do 21 de decembro de 2022, da Dirección Xeral de Mobilidade, polo que se someteu ao trámite de información pública o proxecto de trazado do eixe de mobilidade sostible en Santiago de Compostela, treito O Milladoiro-Estación Intermodal, de clave AC/22/085.06, así como a relación individual de bens, dereitos e propietarios afectados polo proxecto referido.
O 31 de marzo de 2023 publicouse no Diario Oficial de Galicia número 64 a Resolución do 24 de marzo de 2023, da Dirección Xeral de Mobilidade, pola que se ordena a publicación do Acordo do Consello da Xunta de Galicia, do 23 de marzo de 2023, polo que se aproba definitivamente o dito proxecto de trazado, coas seguintes modificacións respecto do sometido a información pública:
• Na contorna do lugar do Reiro reducirase a superficie que se deberá expropiar á metade, coa finalidade de minimizar as afeccións.
• Dado que non existe outro trazado viable que sexa funcional, manterase o paso pola contorna do río Sar e do recinto do atigo mosteiro de Conxo, pero reducirase ao máximo a súa implantación e configuración, coas seguintes actuacións para minimizar a afección na contorna:
– Elimínanse as pasarelas sobre o río Sar, e empregaranse para o cruzamento as pontellas existentes. A continuidade na contorna da fonte da Virxe da Cuncha será mediante unha conexión exenta de movemento de terras, e regularizarase o terreo para a pavimentación, co fin de afastar o itinerario deste elemento.
– No contorno do antigo Mosteiro de Conxo utilizarase a plataforma do camiño existente, sen ampliar a explanación. O pavimento será o máis natural posible, sempre que se manteña a súa funcionalidade mediante as correspondentes tarefas de mantemento e limpeza que permitan a circulación de vehículos de mobilidade persoal (VMP).
– No paso por baixo da estrada de Deputación, darase continuidade ao itinerario, acondicionando e limpando o contorno coa finalidade de mellorar o degradado aspecto que presenta na actualidade.
– Elimínase a conexión co barrio de Conxo, que quedará pendente de desenvolvemento en consenso e coordinación co Plan especial de protección e rehabilitación da igrexa, hospital psiquiátrico e mosteiro de Conxo, cos seus xardíns e hortas, zonas de acceso e núcleos de contorno, que actualmente se atopa en fase de tramitación ambiental.
Respecto desta nova información pública complementaria, e aínda que sobre o trazado emitira informe previamente a corporación municipal de Santiago de Compostela, a nova corporación transmitiu a preocupación pola oposición veciñal no paso próximo ao Banquete de Conxo, a pesar de que a parte limítrofe co predio do mosteiro discorre por unha pista executada hai pouco tempo polo concello, sen practicamente ningunha modificación con respecto á actual configuración.
Non obstante, a vontade desta actuación é a de acadar o máximo consenso, polo que se propón un novo trazado con características xeométricas menos favorables que o trazado inicial, e que precisa dunha reordenación do aparcadoiro do hospital de Conxo para non reducir o número de prazas, pero que permite afastarse da zona do Banquete de Conxo.
Así mesmo, modifícase o trazado na zona das hortas urbanas na contorna da Estación Intermodal, que atende unha petición municipal.
Mediante o Decreto 49/2024, do 22 de abril, que fixa a estructura orgánica das consellerías da Xunta de Galicia, a Dirección Xeral de Mobilidade pasa a depender da Consellería de Presidencia, Xusticia e Deportes, pero mantense a encomenda á Axencia Galega de Infraestruturas da xestión técnica das actuacións.
Polo exposto, mediante a Resolución do director da Axencia Galega de Infraestruturas do 15 de novembro de 2024 realizouse a aprobación técnica previa do anexo de información pública do documento referido, que se tramitará segundo o disposto nos artigos 19 e seguintes da Lei 18/2021, do 27 de decembro, de medidas fiscais e administrativas.
Considerando o exposto e o establecido na normativa vixente,
ACORDO:
Primeiro. Someter ao trámite de información pública o documento denominado Anexo para información pública complementaria do eixe de mobilidade sostible en Santiago de Compostela, treito Milladoiro-Estación Intermodal, actuación financiada polo Plan de recuperación, transformación e resiliencia, financiado pola Unión Europea-Next Generation EU, de clave AC/22/085.06, nos concellos de Ames e Santiago de Compostela (A Coruña), para que as persoas que o consideren oportuno poidan formular, mediante escrito dirixido á Axencia Galega de Infraestruturas, as alegacións que crean convenientes relativas á concepción global da actuación e das distintas alternativas analizadas, de ser o caso, de acordo co disposto no artigo 21 da Lei 18/2021.
Segundo. Someter ao trámite de información publica a relación individual de bens, dereitos e propietarios afectados polo proxecto, descritos na relación anexa, para que calquera persoa poida achegar, por escrito dirixido á Axencia Galega de Infraestruturas, a rectificación dos posibles erros da relación publicada ou oporse á necesidade da ocupación. Neste caso, indicará os motivos polos que deba considerarse preferente a ocupación doutros bens ou a adquisición doutros dereitos distintos aos da relación para o fin que se persegue, de acordo co disposto nos artigos 17, 18 e 19 da Lei do 16 de decembro de 1954 sobre expropiación forzosa.
Terceiro. Do mesmo xeito, sométese o presente proxecto á información pública para os efectos do establecido no Real decreto 849/1986, do 11 de abril, polo que se aproba o Regulamento do dominio público hidráulico, en relación coa protección do dominio público hidráulico e coas actuacións neste ou na súa zona de policía.
Cuarto. O prazo para presentar alegacións será de trinta (30) días hábiles, contados desde o seguinte ao da publicación deste anuncio no Diario Oficial de Galicia.
A documentación do proxecto estará á disposición da cidadanía nas sedes centrais da Dirección Xeral de Mobilidade e da Axencia Galega de Infraestruturas, nas casas dos concellos de Ames e Santiago de Compostela e na páxina web da Consellería de Vivenda e Planificación de Infraestruturas, onde tamén se atopa un extracto do documento cos obxectivos, localización e descrición da actuación:
https://vivendaeinfraestruturas.xunta.gal/informacion-publica/estudos
Así mesmo, o documento publicarase na páxina web da Consellería de Presidencia, Xustiza e Deportes:
https://conselleriadepresidencia.xunta.gal/transparencia/procedementos-informacion-publica/mobilidade
Santiago de Compostela, 18 de novembro de 2024
Judit Fontela Baró
Directora xeral de Mobilidade