Tras ser examinada a solicitude de deslindamento formulada polos representantes do monte veciñal en man común (MVMC) Monte Medo de Vilardecás, pertencente á Comunidade de Montes Veciñais en Man Común (CMVMC) de Vilardecás e Lamelas, e mais o MVMC Barxela-Medo, pertencente á CMVMC de Barxela, no concello de Maceda, resultan os seguintes

Feitos:

Primeiro. O 30.1.2024 a CMVMC de Vilardecás e Lamelas presentou un escrito (Rexel 2024/279675) en que solicitan a aprobación dun deslindamento coa CMVMC de Barxela.

Coa solicitude achegou a seguinte documentación:

– Acta de deslindamento.

– Acta de conciliación levantada no Xulgado de Paz de Maceda.

– Certificacións dos acordos das respectivas asembleas xerais.

– Levantamento topográfico.

Segundo. O Informe do Servizo de Montes do Departamento Territorial de Ourense do 14 de febreiro de 2024 fai constar que a documentación achegada corresponde ao deslindamento do perímetro estremeiro entre o MVMC Monte Medo de Vilardecás, pertencente á CMVMC de Vilardecás e Lamelas, e mais o MVMC Barxela-Medo, pertencente á CMVMC de Barxela, desde o vértice 1 (o situado máis ao SO) ata o vértice 8 (o situado máis ao NE).

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que lle propón ao Xurado Provincial a súa aprobación.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará unha resolución, que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de febreiro de 2024, o Xurado Provincial de Montes Veciñais en Man Común acordou, por unanimidade, o día 4 de novembro de 2024:

Aprobar o acto de conciliación acadado polas xuntas reitoras dos MVMC Monte Medo de Vilardecás, pertencente á CMVMC de Vilardecás e Lamelas, e mais o MVMC Barxela-Medo, pertencente á CMVMC de Barxela, no concello de Maceda.

Contra esta resolución, que pon fin á vía administrativa, poderase interpor recurso potestativo de reposición ante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Ourense no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 26 de novembro de 2024

José Antonio Armada Pérez
Presidente do Xurado Provincial de Clasificación de Montes Veciñais
en Man Común de Ourense