O 2 de febreiro de 2024 publicouse no Diario Oficial de Galicia a Resolución do 29 de decembro de 2023 pola que se aproban as bases reguladoras para a concesión das subvencións para promover o autoemprego e a actividade emprendedora na Comunidade Autónoma galega das persoas emigrantes galegas retornadas, e se procede á súa convocatoria para o ano 2024 (código do procedemento PR937A).

O artigo 2 desta resolución establece que para o financiamento destas axudas se destinará un crédito dun millón de euros (1.000.000 €), con cargo á aplicación orzamentaria 04.30.312C.470.0 dos orzamentos xerais da Comunidade Autónoma de Galicia para o ano 2024, crédito que, logo da reestruturación administrativa dos decretos 48/2024 e 49/2024, do 22 de abril, foi traspasado á partida orzamentaria 44.05.312C.470.0.

Así mesmo, este artigo dispón que este crédito poderá ser ampliado nos casos establecidos no artigo 31.2 da Lei 9/2007, do 13 de xuño, de subvencións de Galicia, e no artigo 30.2 do Decreto 11/2009, do 8 de xaneiro, polo que se aproba o seu regulamento, en función das maiores dispoñibilidades orzamentarias que se poidan producir na devandita aplicación.

Tendo en conta que o crédito inicialmente destinado a esta convocatoria resulta insuficiente debido ao volume de solicitudes recibidas e que existe crédito dispoñible procedente de remanentes doutras convocatorias que se pode aplicar a incrementar o importe do crédito inicialmente previsto, considérase necesario realizar unha ampliación do importe establecido inicialmente.

En virtude do exposto, no exercicio das competencias atribuídas no Decreto 147/2024, do 20 de maio, e de conformidade co disposto na Lei 9/2007, do 13 de xuño, de subvencións de Galicia; no Decreto 11/2009, do 8 de xaneiro, polo que se aproba o regulamento da referida Lei 9/2007; nos preceptos básicos da Lei 38/2003, do 17 de novembro, xeral de subvencións; na Lei 1/2016, do 18 de xaneiro, de transparencia e bo goberno; na Lei 39/2015, do 1 de outubro, do procedemento administrativo común das administracións públicas; na Lei 4/2019, do 17 de xullo, de administración dixital de Galicia, e demais normativa de aplicación,

RESOLVO:

Artigo único. Ampliación da dotación orzamentaria

1. Ampliar a dotación orzamentaria prevista na Resolución do 29 de decembro de 2023 pola que se aproban as bases reguladoras para a concesión das subvencións para promover o autoemprego e a actividade emprendedora na Comunidade Autónoma galega das persoas emigrantes galegas retornadas, e se procede á súa convocatoria para o ano 2024, na contía de douscentos trinta mil euros (230.000,00 €), con cargo á aplicación orzamentaria 44.05.312C.470.0.

2. Esta ampliación orzamentaria non afecta o prazo de presentación de solicitudes establecido na resolución de convocatoria nin o resto do seu articulado.

Disposición derradeira única. Entrada en vigor

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 11 de decembro de 2024

Antonio Rodríguez Miranda
Secretario xeral da Emigración