Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 27 de novembro de 2024, en relación co deslindamento parcial entre as comunidades de montes veciñais en man común de Ribeira e Crecente (concello de Crecente), ao respecto da estrema común dos seus montes (expediente DC22022).

Feitos:

Primeiro. O 23.9.2022, o representante da comunidade de montes veciñais en man común (en diante CMVMC) de Ribeira presentou no rexistro electrónico da Xunta de Galicia, co núm. de entrada 2022/2341033, solicitude de deslindamento entre a CMVMC de Ribeira e a CMVMC de Crecente (Crecente).

Os montes veciñais en man común (en diante MVMC) afectados por este deslindamento son:

– MVMC de Chan da Ribeira e outros (ID: 2623) da CMVMC de Ribeira.

– MVMC de Requiáns, Cernadas e Agüeiros (ID: 2618) da CMVMC de Crecente.

Segundo. Consta no expediente a seguinte documentación do deslindamento consonte o artigo 53 da Lei 7/2012:

– Acta do apeo do deslindamento do 17.6.2019.

– Acta de conciliación núm. 02/2022, do Xulgado de Paz de Crecente, do 27.10.2022.

– Certificado do secretario da CMVMC de Crecente, coa conformidade do presidente do 10.8.2022, da aprobación na asemblea do 2.11.2019.

– Certificado da secretaria da CMVMC de Ribeira, coa conformidade do presidente do 5.9.2022, da aprobación en Asemblea do 4.9.2022.

– Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829, asinado o 12.4.2024 pola enxeñeira técnica forestal colexiada núm. 908 do COETF de Galicia, que modifica a memoria inicialmente presentada asinada o 21.9.2022. As emendas posteriores modifican esta.

– Informe de validación gráfica catastral con CSV: EMCA1YSS2E1KM6HF (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial do Catastro.

Terceiro. A liña de deslindamento proposta ten unha lonxitude de 167 metros e está composta polos seguintes puntos:

Punto 1 – x: 564.455,83 y: 4.666.894,73.

Punto 2 – x: 564.406,66 y: 4.666.866,10.

Punto 3 – x: 564.347,05 y: 4.666.839,34.

Punto 5 – x: 564.068,48 y: 4.666.687,97.

Punto 6 – x: 564.028,94 y: 4.666.666,54.

Na memoria presentada describe como puntos de deslindamento o punto 4 (564.177,26; 4.666.747,35) e o punto 5.1 (x: 563.837,09 y: 4.666.561,71); neses puntos non queda xustificada a estrema entre ambas as comunidades. Polo tanto, estes puntos non forman parte do deslindamento.

Revisada a cartografía das resolucións de clasificación de ambos os MVMC, detéctase que existe estrema entre ambos e considérase que non afecta terceiros propietarios.

O deslindamento está formado por dous tramos:

– Tramo 1: punto 1 – punto 2 – punto 3.

– Tramo 2: punto 5 – punto 6.

A liña do deslindamento produce modificacións na cartografía dos esbozos de clasificación das seguintes comunidades:

– CMVMC de Ribeira: o expediente de revisión de esbozo RE22014 xa recolle o deslindamento actual.

– CMVMC de Crecente: deberá proceder, mediante algún dos expedientes recollidos na lexislación, para adaptar as superficies actualmente recollidas no Rexistro de MVMC de Pontevedra coas realmente pertencentes á comunidade.

O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.

Consideracións legais e técnicas:

Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado, por unanimidade dos seus membros,

ACORDA:

Aprobar o deslindamento parcial realizado entre a CMVMC de Ribeira e a CMVMC de Crecente (Crecente), respecto da súa estrema común, nos termos indicados no feito terceiro.

Contra a presente resolución, que pon fin á vía administrativa, poderase interpoñer recurso de reposición con carácter potestativo perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ao da presente notificación, de acordo co disposto no artigo 123 e 124 Lei 39/2015, do 1 de outubro, do procedemento administrativo común das administracións públicas e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 13 de decembro de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra