Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 27 de novembro de 2024, en relación co deslindamento parcial entre as comunidades de montes veciñais en man común de Guillade (concello de Ponteareas) e San Andrés de Uma (concello de Salvaterra de Miño), ao respecto da estrema común dos seus montes (expediente DC22028).

Feitos:

Primeiro. O 26.9.2022, o presidente da comunidade de montes veciñais en man común (en diante, CMVMC) de Guillade presenta no rexistro electrónico da Xunta de Galicia co núm. de entrada 2022/2358298 solicitude de deslindamento entre a CMVMC de Guillade (Ponteareas) e a CMVMC de San Andrés de Uma (Salvaterra de Miño).

Os montes veciñais en man común (en diante, MVMC) afectados por este deslindamento son:

– MVMC de Garamil, Mirón-Colleira, Alto da Costa e Hervenlla (ID 3013) da CMVMC de Guillade.

– MVMC de Coto Ladea, Pedreira, Calvario, Borraxeiros e Gendufe (ID 3123) da CMVMC de San Andrés de Uma da CMVMC de Uma.

Segundo. Consta no expediente a seguinte documentación do deslindamento consonte o artigo 53 da Lei 7/2012:

• Acta do apeo do deslindamento do 5.5.2022.

• Acta de conciliación núm. 06/2022 entre as comunidades no Xulgado de Paz de Salvaterra de Miño do 6.10.2022.

• Certificado do 14.6.2024 do secretario da CMVMC de Guillade coa conformidade do presidente da aprobación na asemblea xeral do 26.6.2022.

• Certificado do 14.6.2024 do secretario da CMVMC de San Andrés de Uma coa conformidade do presidente da aprobación na asemblea xeral do 26.6.2022.

• Memoria descritiva co plano de deslindamento e cartografía en formato dixital no datum ETRS89/UTM zona 29N EPSG: 25829. Asinada o 17.8.2022 pola enxeñeira técnica forestal colexiada núm. 482 do COETF de Galicia.

• Informe de validación gráfica catastral con CSV: Q3BQ8PR70HPQ6B8N, D3BFQ7X7PXA4PHH1 e S620MNK9J3PKQV09 (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial de Catastro.

Terceiro. A liña de deslindamento proposta ten unha lonxitude de 1.026 metros e está composta polos seguintes puntos:

Punto P.01: x: 548.217,49 y: 4.670.395,40

Punto P.02: x: 548.221,50 y: 4.670.288,60

Punto P.04: x: 548.260,28 y: 4.669.810,80

Punto P.05: x: 548.245,93 y: 4.669.714,76

Punto P.06: x: 548.220,15 y: 4.669.540,81

Punto P.07: x: 548.178,78 y: 4.669.304,16

Os puntos secundarios son puntos tomados en campo para respectar as propiedades particulares, segundo está reflectido na memoria técnica as ditas propiedades están delimitadas por muros. Se a liña de deslindamento cartograficamente invade as parcelas de titularidade catastral particular débese a un erro de precisión na cartografía catastral. Polo que, considérase que a liña de deslindamento non afecta terceiros propietarios.

Punto S.01: x: 548.256,23 y: 4.670.063,79

Punto S.02: x: 548.258,66 y: 4.669.975,38

Punto S.03: x: 548.210,02 y: 4.669.482,88

Punto S.04: x: 548.182,89 y: 4.669.327,66

Punto S.05: x: 548.149,81 y: 4.669.135,13

O punto P.03 (x: 548.257,89 y: 4.670.053,00) e o punto P08 (x: 548.138,30 y: 4.669.074,16) son considerados puntos de referencia.

Revisada a cartografía das resolucións de clasificación de ambos os MVMC detéctase que existe colindancia entre ambos, coa excepción dun tramo entre o punto P01 e o punto P05 en que non existe colindancia pola CMVMC de San Andrés de Uma. A colindancia neste tramo queda xustificada:

– Pola imprecisión que pode presentar a cartografía das resolucións de clasificación nesta franxa tan estreita.

– Polas comunidades recoñecendo a colindancia a través do deslindamento presentado.

– E pola titularidade catastral das parcelas implicadas.

O deslindamento está formado por tres tramos:

Tramo 1: punto P01-punto P02 e punto S01

Tramo 2: punto S02-punto P04-punto P05-punto P06 e o punto S3

Tramo 3: punto S04-punto P07 e o punto S.05

A liña do deslindamento non respecta a liña de concellos do Instituto Xeográfico Nacional entre os concellos de Salvaterra do Miño e Mondariz.

A liña do deslindamento produce modificacións na cartografía dos esbozos de clasificación das seguintes comunidades:

– CMVMC de Guillade: realiza un axuste desde o punto P.01 e o punto S.05 para que o deslindamento sexa coincidente no punto inicial e final coa planimetría existente.

Nos tramos entre o punto S.01 e o punto S.02 e no tramo entre o punto S.03 e o punto S.04 a comunidade realiza un axuste para pechar a liña de deslindamento coa planimetría existente.

– CMVMC de San Andrés de Uma: deberá proceder mediante algún dos expedientes previstos na lexislación para adaptar as superficies actualmente recollidas no Rexistro de MVMC de Pontevedra coa realmente pertencente á comunidade.

O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.

Consideracións legais e técnicas:

Primeira. Esta resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado por unanimidade dos seus membros,

ACORDA:

Aprobar o deslindamento parcial realizado entre a CMVMC de Guillade (Ponteareas) e a CMVMC de San Andrés de Uma (Salvaterra de Miño) respecto da súa estrema común nos termos indicados no feito terceiro.

Contra esta resolución, que pon fin á vía administrativa, poderase interpoñer recurso de reposición con carácter potestativo perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ao da presente notificación, de acordo co disposto no artigo 123 e 124 Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 13 de decembro de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra