Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 27 de novembro de 2024, respecto á revisión do esbozo e elaboración da cartografía actualizada do monte veciñal denominado Chan da Ribeira e outros da Comunidade de Montes Veciñais en man Común de Ribeira, no concello de Crecente (expediente RE22014).
O 23.9.2024 o Servizo de Montes deste departamento territorial emite o seguinte informe:
«Feitos:
Primeiro. O 6.9.2022 e número de rexistro de entrada 2022/2209012 o presidente da Comunidade de Montes Veciñais en Man Común (en diante, CMVMC) de Ribeira, parroquia de Santa Mariña de Ribeira, concello de Crecente, solicita a revisión total do esbozo do monte veciñal en man común (en diante, MVMC) Chan da Ribeira e outros (ID 2623). A dita solicitude deu lugar á apertura do expediente RE22014. Consta no expediente a seguinte documentación:
– Revisión total do esbozo do MVMC Chan da Ribeira e outros da CMVMC de Ribeira, parroquia de Ribeira, concello de Crecente. Asinada pola enxeñeira técnica forestal colexiada núm. 908 do COETF de Galicia o 7.5.2024.
– Certificado da secretaria coa conformidade do presidente da CMVMC de Ribeira do 19.4.2024 da aprobación en Asemblea xeral do 29.10.2023.
– Cartografía en formato dixital ETRS 89 UTM ZONE 29N EPSG 25829.
Estudada a memoria técnica achegada despréndese:
– O MVMC Chan da Ribeira e outros clasificouse nos anos 80 como 3 parcelas independentes, ben que, na proposta se distingue unha parcela principal denominada Chan da Ribeira e diversas parcelas de pequenas dimensións situadas na zona sur da parroquia.
– Existen varios enclavados como resultado de permutas levadas a cabo con particulares coa finalidade de regularizar a propiedade de diversas vivendas clasificadas coma MVMC.
– O límite co MVMC de Requiáns, Cernadas e Agüeiros pertencente á CMVMC de Crecente, parroquia de San Pedro de Crecente coincide co expediente de deslinde administrativo aprobado.
– O linde coa CMVMC de Quintela non se modifica.
– No límite cos propietarios particulares levouse a cabo un levantamento topográfico das parcela con GPS de precisión centimétrica.
Segundo. O MVMC de Chan da Ribeira e outros foi clasificado polo Xurado de MVMC de Pontevedra o 7.5.1979 cunha superficie inicial de 84 ha. Segundo os datos do Sistema Rexistral Forestal regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Ribeira dispón dun documento de ordenación forestal inscrito no Rexistro de montes ordenados de Galicia co núm. 3600414 e vixente ata 2033.
– O esbozo respecta o deslinde (expediente DC22022) coa CMVMC de San Pedro de Crecente consonte o artigo 53 da Lei 7/2012, do 28 de xuño, de montes de Galicia.
– Permutas que constan: PO-16-PER/08 con Mª Ana Rodríguez Gómez e Ignacio Álvarez Moure, PO-17-PER/08 con Mª Ana Rodríguez López, PO-15-PER/09 e PO-07-PER/19 ambas con Silvia Antonio Domínguez.
Terceiro. A superficie e perímetro da revisión do esbozo proposto da parcela Chan da Ribeira é de 62,78 ha (superficie sen proxección) e 11,36 km (descontados os metros do deslinde coa CMVMC de Crecente) e non se modifican os lindes establecidos na resolución do Xurado de MVMC de Pontevedra do 7.5.1979.
Cuarto. O 30.11.2022, o Xurado provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Ribeira (Crecente), expediente RE22014, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
Segunda. A revisión do esbozo do MVMC Chan da Ribeira e outros da CMVMC de Ribeira proposta polo Servizo de Montes é a presentada pola comunidade e queda definido consonte os datos reflectidos no feito terceiro, e a memoria técnica indicada no feito primeiro».
Vista a proposta de revisión presentada polo Servizo de Montes sobre a adaptación do esbozo do monte veciñal Chan da Ribeira e outros e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Chan da Ribeira e outros clasificado a prol da CMVMC de Ribeira (Crecente), segundo a proposta do Servizo de Montes e a planimetría elaborada polo mesmo.
Pontevedra, 15 de xaneiro de 2025
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra