Mediante a Resolución da Alcaldía do 4 de febreiro de 2025 aprobouse inicialmente o Plan parcial de iniciativa particular para a ampliación do parque empresarial de Begonte-fase 1, promovido pola mercantil Berina Patrimonios, S.L. e redactado pola arquitecta Carmen Viño Vila.

De conformidade co disposto nos artigos 47.1 da Lei 2/2016, do 10 de febreiro, do solo de Galicia, e 86 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, suspéndese o procedemento de outorgamento de licenzas de parcelación de terreos, edificación e demolición na totalidade do ámbito xeográfico ou área obxecto do plan parcial. Esta suspensión extinguirase coa aprobación definitiva do dito plan parcial e terá, en todo caso, a duración máxima dun ano.

O expediente aprobado sométese a información pública polo prazo de dous meses, mediante anuncios que se publicarán no Diario Oficial de Galicia, no xornal El Progreso de Lugo, no taboleiro de edictos do Concello e na páxina web, e así mesmo, en aplicación do disposto no artigo 44 da Lei 39/2015, do 1 de outubro, publicarase no BOE, que servirá de notificación para todas as persoas propietarias e interesadas directamente afectadas que por resultaren descoñecidas ou ignorarse o seu enderezo non poidan ser notificadas persoalmente ou, intentada a notificación, non se puidese efectuar.

Simultaneamente recadará das administracións públicas competentes os informes sectoriais e as consultas que resulten preceptivos.

O expediente completo estará á disposición das persoas interesadas no Departamento de Urbanismo do Concello, de luns a venres, das 9.00 ás 14.30 horas.

Begonte, 4 de febreiro de 2025

José Ulla Rocha
Alcalde