Os programas de incentivos ligados á mobilidade eléctrica (Moves III) no marco do Plan de recuperación, transformación e resiliencia europeo están regulados polo Real decreto 266/2021, do 13 de abril, e foron convocados en Galicia mediante a Resolución do Inega do 26 de xullo de 2021, publicada no DOG número 149, do 5 de agosto.

A Resolución do Inega do 26 de xullo de 2021 pola que se convoca o Programa estatal de incentivos á mobilidade eléctrica (Moves III) foi modificada pola Resolución do 21 de outubro de 2021 (DOG número 207, do 27 de outubro); pola Resolución do 23 de decembro de 2021 (DOG número 8, do 13 de xaneiro de 2022); pola Resolución do 13 de outubro de 2022 (DOG número 201, do 21 de outubro); pola Resolución do 12 de xuño de 2023 (DOG número 116, do 20 de xuño); pola Resolución do 15 de decembro de 2023 (DOG número 243, do 26 de decembro); pola Resolución do 6 de xuño de 2024 (DOG número 115, do 14 de xuño); pola Resolución do 16 de xullo de 2024 (DOG número 142, do 23 de xullo); pola Resolución do 18 de xullo de 2024 (DOG número 146, do 30 de xullo); pola Resolución do 6 de setembro de 2024 (DOG número 176, do 12 de setembro) e pola Resolución do 25 de outubro de 2024 (DOG número 212, do 4 de novembro). Conforme a Resolución do 18 de xullo de 2024, o prazo de presentación de solicitudes ampliouse ata o 31 de decembro de 2024. Neste sentido, cabe citar que a vixencia se ampliou novamente ata o 30 de xuño de 2025 mediante a Resolución do 26 de decembro de 2024 (DOG número 250, do 30 de decembro), segundo o establecido na disposición derradeira décima do Real decreto lei 9/2025, pero este real decreto lei foi derrogado mediante o Acordo do Congreso dos Deputados publicado no BOE do 23 de xaneiro.

En canto á posibilidade de ampliar e redistribuír o orzamento, o artigo 10.13 do Real decreto 266/2021, do 13 de abril, establece que, durante os dous meses seguintes a finalización da vixencia da correspondente convocatoria, poderá redistribuírse o orzamento entre programas a criterio da Comunidade Autónoma e poderán incorporarse, de ser o caso, os remanentes correspondentes ao orzamento que non se puidesen destinar aos investimentos directos. De acordo con isto, a Xunta de Galicia notificou con carácter previo a redistribución ao IDAE, organismo responsable da coordinación e seguimento do Moves III, conforme o artigo 9 do citado real decreto.

O artigo 4.1 da convocatoria establece que as subvencións previstas nesta convocatoria se financiarán con cargo aos orzamentos do Inega (...).

O importe total asignado a esta convocatoria ascende a 43.888.930,71 euros, conforme a redacción recollida na Resolución do 6 de xuño de 2024.

O artigo 4.3 da convocatoria prevé a posibilidade de ampliar o crédito como consecuencia da existencia dunha maior dispoñibilidade orzamentaria derivada dalgunha das circunstancias previstas no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, e, se for o caso, logo da aprobación da modificación orzamentaria que proceda. Isto podería dar lugar á concesión de máis subvencións, de acordo coa orde de prelación de solicitantes que resulte da aplicación dos criterios fixados nas bases que rexen esta convocatoria.

Conforme o disposto no artigo 4.3, de producirse a ampliación de crédito, publicarase no Diario Oficial de Galicia e na páxina web do Inega (www.inega.gal), sen que tal publicidade implique a apertura de prazo para presentar novas solicitudes nin o inicio de novo cómputo para resolver.

Por todo o anterior, sobre a base dos requisitos e das condicións previstos na normativa anteriormente citada,

RESOLVO:

Primeiro. Ampliar e redistribuír os fondos destinados ao Moves III modificando os puntos 1 e 2 do artigo 4 da Resolución do 26 de xullo de 2021, que queda redactado do seguinte xeito:

«1. As subvencións previstas nesta convocatoria financiaranse con cargo aos orzamentos do Inega, coa repartición plurianual recollida na táboa seguinte. O importe total asignado a esta convocatoria ascende a 45.988.930,71 euros.

Importe de 2022 (€)	Importe de 2023 (€)	Importe de 2024 (€)	Importe de 2025 (€)	Total
3.911.047,61	8.443.686,65	9.696.298,98	23.937.897,47	45.988.930,71

O orzamento por partida e anualidade redistribuírase tendo en conta as solicitudes rexistradas conforme o establecido no artigo 31 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, entre as seguintes partidas: 09.A3.733A.703.1, 09.A3.733A.744.2, 09.A3.733A.745.4, 09.A3.733A.762.1, 09.A3.733A.772.1 e 09.A3.733A.782.1.

2. O crédito máximo segundo a tipoloxía de proxecto será o seguinte:

Tipo de actuación	Orzamento total
Programa de incentivos 1: adquisición de vehículos eléctricos	34.488.930,71
Programa de incentivos 2: implantación de infraestrutura de recarga de vehículos eléctricos	11.500.000,00
Total	45.988.930,71

O crédito máximo recollido na táboa anterior poderá ser redistribuído pasados tres meses desde a apertura do prazo de solicitudes para adaptarse á evolución da axuda solicitada en cada unha das epígrafes. Esta redistribución, de producirse, respectará en todo caso as porcentaxes establecidas no artigo 10.10 do Real decreto 266/2021 ata que finalice a vixencia da convocatoria. Finalizada esta vixencia, poderá redistribuírse o orzamento nos termos recollidos no artigo 10.13 das bases reguladoras, polo que poderán tamén incorporarse, de ser o caso, os remanentes correspondentes ao orzamento que non se puidese destinar ao financiamento de investimentos directos pola Comunidade Autónoma».

Segundo. Esta modificación, unha vez publicada no Diario Oficial de Galicia, non implicará a modificación do prazo establecido para presentar as solicitudes.

Terceiro. Esta modificación producirá efectos desde o día da súa publicación no Diario Oficial de Galicia.

Santiago de Compostela, 26 de febreiro de 2025

Pablo Fernández Vila
Director da Axencia Instituto Enerxético de Galicia