A Xunta de Goberno Local do Concello de Santiago de Compostela, na sesión que tivo lugar o día 17 de febreiro de 2025, adoptou o seguinte acordo:

Primeiro. Aprobar inicialmente o Plan especial de infraestruturas e dotacións (PEID) na parcela dotacional EU-2-Edificio de investigación para o IDIS-, presentado o 14 de febreiro de 2025, asinado pola arquitecta Isabel Castillo Lema (NUNstudio).

Segundo. En aplicación do procedemento regulado nos artigos 75.1 da Lei 2/2016 do solo de Galicia (LSG) e 186.1 do seu regulamento de desenvolvemento, o plan especial inicialmente aprobado someterase a información pública durante o prazo de dous meses, mediante anuncios que para o efecto se publicarán no Diario Oficial de Galicia e nun xornal dos de maior circulación na provincia. Simultaneamente, efectuarase notificación persoal ás persoas propietarias das parcelas afectadas, segundo figuren no Catastro.

Durante o trámite de información pública solicitaranse os informes das empresas subministradoras de servizos, así como os informes sectoriais que sexan preceptivos (Patrimonio Cultural e Telecomunicacións).

A aprobación definitiva do plan especial habilitará a expropiación dos terreos afectados ou, de ser o caso, a súa adquisición polos outros procedementos de obtención de dotacións públicas previstos no artigo 129.3 da LSG.

As persoas interesadas poderán consultar o expediente e alegar por escrito durante o prazo de dous (2) meses. Este prazo iniciarase o día seguinte ao da última publicación deste anuncio.

A documentación pode consultarse no Servizo de Planeamento e Xestión Urbanística do Concello de Santiago de Compostela (Pazo de Raxoi, 2º andar), de luns a venres, das 9.00 ás 14.00 horas; e na páxina web do Concello https://santiagodecompostela.gal/gl/transparencia/peid-parcela-dotacional-eu-2-edificio-investigacion-para-idis

As alegacións poderán presentarse na sede electrónica do Concello de Santiago de Compostela no apartado «Catálogo de trámites» a través do trámite «Presentación de documentación e alegacións» e da opción «Achega libre». Deberase introducir o dato 2024/12759V no campo «Referencia» e incorporar o documento das alegacións.

Tamén se poderán presentar as alegacións por calquera dos outros medios relacionados no artigo 16 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 25 de febreiro de 2025

A alcaldesa
P.D. (DEC/2023/8135, do 17 de xuño de 2023)
Iago Lestegás Tizón
Concelleiro delegado de Urbanismo, Vivenda e Cidade Histórica