A disposición adicional terceira da Lei 2/2006, do 14 de xuño, de dereito civil de Galicia, na redacción dada pola Lei 10/2007, do 28 de xuño, de reforma da disposición adicional terceira da Lei 2/2006, do 14 de xuño, de dereito civil de Galicia, sinala no seu número 2 que terán a condición de parellas de feito as unións de dúas persoas maiores de idade, capaces, que convivan coa intención ou vocación de permanencia nunha relación de afectividade análoga á conxugal e que a inscriban no Rexistro de Parellas de Feito de Galicia, expresando a súa vontade de equiparar os seus efectos aos do matrimonio.

Así mesmo, a disposición derradeira da Lei 10/2007, do 28 de xuño, establece que no prazo dun mes contado desde a publicación da lei no Diario Oficial de Galicia, a Xunta de Galicia aprobará un decreto mediante o cal se creará e se regulará a organización e a xestión do Rexistro de Parellas de Feito de Galicia.

En virtude do anterior mandato publicouse no Diario Oficial de Galicia número 5, do 8 de xaneiro de 2008, o Decreto 248/2007, do 20 de decembro, polo que se crea e se regula o Rexistro de Parellas de Feito de Galicia, no cal se establecen as normas básicas da súa organización e funcionamento.

O Decreto 248/2007, do 20 de decembro, leva en vigor desde hai 17 anos, modificouse no ano 2014 e é preciso seguir adecuándoo á realidade normativa vixente para que a Administración pública evolucione coa sociedade, aproveitando o uso xeneralizado das novas tecnoloxías da información e da comunicación e solucionando os problemas que se producen actualmente.

É por iso que a presente reforma nace con tres obxectivos: adaptar o procedemento actual ás novas tecnoloxías, dar resposta ás incidencias que afectan o desenvolvemento ordinario dos procedementos que se tramitan ante o Rexistro de Parellas de Feito de Galicia e adecuar o texto normativo á realidade normativa actual, coa supresión de referencias a disposicións que non estean en vigor.

De acordo coa Lei 39/2015, do 1 de outubro, do procedemento administrativo común das administracións públicas, e mais coa Lei 4/2019, do 17 de xullo, de administración dixital de Galicia, establécese a posibilidade de que as solicitudes se poidan presentar telematicamente.

Igualmente, dáse resposta ás situacións que máis conflitos xeran no momento da inscrición: o artigo 11 do Decreto 248/2007, do 20 de decembro, especifica a documentación acreditativa do cumprimento de todos os requisitos exixidos no artigo 5 e que as persoas que conforman a parella deben achegar ao rexistro. Prodúcese así a necesaria equivalencia entre os artigos 5 e 11 do Decreto 248/2007, do 20 de decembro, e harmonízanse os criterios de interpretación entre as catro delegacións provinciais do Rexistro de Parellas de Feito de Galicia.

Por último, coa presente reforma acométese a adecuación do texto normativo á Lei 39/2015, do 1 de outubro, suprimindo todas as referencias á derrogada Lei 30/1992, do 26 de novembro, do réxime xurídico das administracións públicas e do procedemento administrativo común, e deixando o texto normativo en consonancia co disposto na Lei 4/2019, do 17 de xullo.

A disposición estrutúrase nun artigo único, que modifica os artigos 5, 8, 9, 10, 11, 13, 14, 17, 19, 21, 23, 24 e 26, as disposicións adicionais primeira e segunda da norma en vigor e os anexos I a VI do decreto, e incorpora o artigo 16.bis, o anexo VII, a disposición adicional terceira, unha disposición transitoria, unha disposición derrogatoria e mais unha disposición derradeira única de entrada en vigor.

Este anteproxecto axústase aos principios legais de boa regulación, necesidade, eficacia e proporcionalidade e garante o principio de seguridade xurídica. En aplicación do principio de eficiencia, non introduce cargas administrativas.

Na elaboración desta norma cumpríronse as exixencias establecidas na Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e mais na Lei 1/2016, do 18 de xaneiro, de transparencia e bo goberno. Durante o período comprendido entre o 19.6.2023 e o 3.7.2023 foi exposta publicamente na fase «Consultas abertas» da sección «Consulta pública previa» do Portal de transparencia e Goberno aberto, sen que se recibisen achegas nin opinións ao respecto. Igualmente, foron solicitados, entre outros, informes preceptivos do Servizo Técnico-Normativo, da Asesoría Xurídica, da Dirección Xeral de Simplificación Administrativa e Axencia para a Modernización Tecnolóxica de Galicia, da Secretaría Xeral da Igualdade e mais da Dirección Xeral de Familia, Infancia e Dinamización Demográfica.

Na súa virtude, por proposta do conselleiro de Presidencia, Xustiza e Deportes, de acordo co ditame do Consello Consultivo de Galicia e logo de deliberación do Consello da Xunta de Galicia na súa reunión do día dez de marzo de dous mil vinte e cinco,

DISPOÑO:

Artigo único. Modificación do Decreto 248/2007, do 20 de decembro, polo que se crea e se regula o Rexistro de Parellas de Feito de Galicia

O Decreto 248/2007, do 20 de decembro, polo que se crea e se regula o Rexistro de Parellas de Feito de Galicia, queda modificado como segue:

Un. O artigo 5 queda redactado do seguinte xeito:

«Artigo 5. Requisitos para a inscrición no Rexistro de Parellas de Feito

As inscricións no Rexistro realizaranse tras solicitude dos membros da parella de feito, acompañada da documentación acreditativa do cumprimento dos seguintes requisitos:

a) Ser maiores de idade.

b) Non ter relación de parentesco en liña recta por consanguinidade ou adopción nin colateral por consanguinidade ou adopción ata o terceiro grao.

c) Manifestar a vontade de constitución da parella de feito.

d) Non estar ligados por matrimonio.

e) Non formar parella de feito debidamente formalizada con outra persoa.

f) Ter un dos membros da parella a veciñanza civil galega.

g) Acreditar o empadroamento dos membros da parella no mesmo domicilio dalgún municipio da Comunidade Autónoma de Galicia».

Dous. O artigo 8 queda redactado do seguinte xeito:

«Artigo 8. Publicidade e cesión de datos

1. A publicidade do Rexistro de Parellas de Feito de Galicia limitarase á expedición de certificacións dos seus asentos por instancia de calquera das persoas que conforman a parella, de quen acredite un interese lexítimo ou dos órganos xudiciais, nos termos previstos pola lexislación vixente en materia de protección de datos.

2. Os datos consignados no Rexistro de Parellas de Feito de Galicia relativos ao nome, apelidos, tipo e número de documento de identidade poderán ser compartidos con outras administracións públicas que, no exercicio das súas competencias, conten con outros rexistros análogos de parellas de feito, coa finalidade de evitar a dobre inscrición.

3. Así mesmo, de acordo coa Lei 9/1988, do 19 de xullo, de estatística de Galicia, e mais coa Lei 16/2021, do 20 de decembro, do Plan galego de estatística 2022-2026, os datos do Rexistro de Parellas de Feito de Galicia poderán ser compartidos co Instituto Galego de Estatística para elaborar as estatísticas recollidas nos plans e programas estatísticos da Comunidade Autónoma».

Tres. O artigo 9 queda redactado do seguinte xeito:

«Artigo 9. Requisitos das solicitudes, lugar e forma de presentación

1. As solicitudes de inscrición (PR212A-anexo I), cancelación conxunta (PR212B-anexo III), cancelación individual (PR212E-anexo VI), incorporación ou modificación de pacto (PR212C-anexo IV) e certificación (PR212D-anexo V) que se formulen ante o Rexistro de Parellas de Feito de Galicia deberán reunir os requisitos previstos especificamente neste capítulo, así como os xerais regulados no artigo 66 da Lei 39/2015, do 1 de outubro, do procedemento administrativo común das administracións públicas.

2. As solicitudes presentaranse preferentemente por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal

Para a presentación electrónica poderá empregarse calquera dos mecanismos de identificación e de sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Opcionalmente, poderanse presentar en calquera dos lugares e rexistros establecidos na normativa reguladora do procedemento administrativo común.

3. Nos procedementos de inscrición (PR212A), cancelación conxunta (PR212B) e de solicitude de modificación da inscrición (PR212C) achegarase, xunto cos anexos correspondentes, o anexo VII, que contén a autorización para a presentación das solicitudes e comprobación de datos, así como a sinatura da outra persoa que conforma a parella.

4. Non será necesaria a achega dos documentos exixidos nos procedementos de inscrición da existencia, modificación ou extinción da parella de feito se as persoas que conforman a parella sinalasen os datos destes documentos, o órgano que os elaborou ou ante quen foron presentados con anterioridade. Se os documentos mencionados non puideren ser obtidos pola Administración, serán requiridos aos solicitantes».

Catro. O artigo 10 queda redactado do seguinte xeito:

«Artigo 10. Lexitimación para solicitar as inscricións

A solicitude deberá ser efectuada conxuntamente polas dúas persoas que conforman a parella, sen prexuízo do previsto sobre representación no artigo 5 da Lei 39/2015, do 1 de outubro».

Cinco. O artigo 11 queda redactado do seguinte xeito:

«Artigo 11. Requisitos comúns das solicitudes de inscrición

1. As solicitudes de inscrición como parella de feito presentaranse no formulario normalizado e deberán conter os seguintes datos:

a) Nome e apelidos de cada unha das persoas que conforman a parella.

b) Documento nacional de identidade (en diante, DNI), pasaporte ou tarxeta de identidade de estranxeiro de cada unha das persoas que conforman a parella.

c) Data de nacemento de cada unha das persoas que conforman a parella.

d) Nacionalidade de cada unha das persoas que conforman a parella.

e) Estado civil de cada unha das persoas que conforman a parella.

f) Fillos e fillas comúns.

g) Residencia da parella.

h) Lugar e data de presentación da solicitude.

2. A Administración consultará automaticamente os datos incluídos nos seguintes documentos en poder das administracións públicas ou elaborados por elas, agás que as persoas que conforman a parella se opoñan á súa consulta:

• Datos de identidade das persoas que conforman a parella (DNI/NIE).

• Certificado de residencia con data da última variación padroal das persoas que conforman a parella.

• Certificado histórico de municipios dunha das persoas que conforman a parella ou datos de nacemento dunha das persoas que conforman a parella, para comprobar a veciñanza civil galega.

• Certificados de nacemento e/ou de matrimonio para acreditar a emancipación, a nulidade, o divorcio ou a separación legal das persoas conviventes en parella estable que conforman a parella, ou, de ser o caso, sentenza xudicial firme de divorcio ou nulidade.

• Certificado de nacemento dos fillos e fillas comúns.

3. No caso de que as persoas que conforman a parella se opoñan á consulta, deberano indicar no recadro correspondente habilitado no formulario e achegar os documentos.

4. A documentación presentaranse preferentemente por vía electrónica na sede electrónica da Xunta de Galicia, https://sede.xunta.gal

Opcionalmente, as persoas que conforman a parella poderán presentar a documentación en calquera dos lugares e rexistros establecidos na normativa reguladora do procedemento administrativo común.

5. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas que conforman a parella que presenten os documentos correspondentes.

6. As persoas que conforman a parella serán responsables da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a persoa encargada do rexistro poderá solicitar de maneira motivada o cotexo das copias achegadas, para o cal poderá requirir a exhibición do documento ou da información orixinal.

7. Sempre que se realice a presentación de documentos separadamente da solicitude, deberase indicar o código e o órgano responsable do procedemento, o número de rexistro de entrada da solicitude e mais o número de expediente, se se dispón del.

8. No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e indicaranse os datos exixidos no número anterior. A información actualizada sobre o tamaño máximo e os formatos admitidos pódese consultar na sede electrónica da Xunta de Galicia.

9. Os documentos públicos estranxeiros deberán ser traducidos e previamente legalizados, salvo no caso de que fosen apostilados pola autoridade competente do país emisor segundo o Convenio da Haia, do 5 de outubro de 1961, ou de que outros convenios eximan do dito requisito».

Seis. Introdúcese o seguinte inciso final no artigo 13:

«Xunto coa solicitude de incorporación ou modificación de pacto (PR212C-anexo IV) que se formulen, ante o Rexistro de Parellas de Feito de Galicia, as persoas que conforman a parella achegarán:

• Anexo VII.

• Documentación acreditativa da modificación da inscrición solicitada.

Na tramitación destas solicitudes consultarase automaticamente o DNI ou o NIE, agás que as persoas que conforman a parella se opoñan á súa consulta.

O disposto nos números 4, 5, 6 e 7 do artigo 11 do decreto será igualmente aplicable neste caso».

Sete. Introdúcese o seguinte inciso final no artigo 14:

«Na tramitación destas solicitudes consultarase automaticamente o DNI ou o NIE, agás que as persoas que conforman a parella se opoñan á súa consulta.

O disposto nos números 4, 5, 6 e 7 do artigo 11 do decreto será igualmente aplicable neste caso».

Oito. Engádese un artigo 16.bis:

«Artigo 16.bis. Trámites administrativos posteriores á presentación da solicitude.

As persoas interesadas no procedemento poderán, con posterioridade ao inicio do expediente, realizar trámites na sede electrónica da Xunta de Galicia accedendo á súa carpeta cidadá, sen prexuízo da posibilidade de realizalos en calquera dos lugares e rexistros establecidos na normativa reguladora do procedemento administrativo común».

Nove. O artigo 17 queda redactado do seguinte xeito:

«Artigo 17. Tramitación da solicitude

1. Para tramitar este procedemento, as persoas que conforman a parella manifestarán a súa vontade de constituírse en parella de feito mediante a súa comparecencia persoal ante a persoa encargada do Rexistro (anexo II). Con todo, se por enfermidade, dificultade de desprazamento ou por calquera outra circunstancia de análogas características debidamente acreditada resulta imposible ou moi gravosa a súa comparecencia, a persoa encargada do Rexistro poderalles tomar declaración directamente no lugar en que se encontren.

De ser preciso, as persoas que conforman a parella achegarán igualmente:

Anexo VII.

Certificado acreditativo do estado civil, no caso de que algunha das persoas que conforma a parella sexa estranxeira.

Documentación acreditativa da viuvez, se for o caso.

Pacto regulador das relacións económicas e patrimoniais da parella, de existiren.

2. A tramitación das solicitudes presentadas ante o Rexistro de Parellas de Feito de Galicia rexerase polas determinacións contidas na Lei 39/2015, do 1 de outubro».

Dez. O artigo 19 queda redactado do seguinte xeito:

«Artigo 19. Resolución, prazo, motivación e notificación

1. A persoa titular da xefatura territorial da consellería competente en materia de xustiza resolverá de forma expresa, e acordará efectuar ou denegar a inscrición solicitada no prazo de tres meses, contados desde a data en que a solicitude teña entrada no Rexistro, sen prexuízo das interrupcións de prazo previstas nos artigos 22 e 23 da Lei 39/2015, do 1 de outubro».

2. A resolución será sempre motivada e notificarase preferentemente por medios electrónicos.

As persoas que conforman a parella poderán decidir e comunicar en calquera momento que as notificacións sucesivas se efectúen ou se deixen de efectuar por medios electrónicos, mediante os modelos normalizados dispoñibles. As persoas que conforman a parella deberán manifestar expresamente a modalidade de notificación escollida (electrónica ou en papel) no anexo I ou no anexo VII.

No caso de optar pola notificación en papel, realizarase segundo o establecido no artigo 41.1 da Lei 39/2015, do 1 de outubro.

3. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal. Este sistema remitiralles ás persoas que conforman a parella, á conta de correo e/ou teléfono móbil que consten na solicitude, avisos da posta á disposición das notificacións. Estes avisos non terán, en ningún caso, efectos de notificación realizada e a súa falta non impedirá que a notificación sexa considerada plenamente válida.

As notificacións por medios electrónicos entenderanse efectuadas no momento en que se produza o acceso ao seu contido, e, rexeitadas cando transcorran dez (10) días naturais desde a posta á disposición da notificación sen que se acceda ao seu contido.

Se o envío da notificación electrónica non for posible por problemas técnicos, efectuarase a notificación polos medios previstos na normativa reguladora do procedemento administrativo común».

Once. O número 2 do artigo 21 queda redactado do seguinte xeito:

«A inscrición expresará:

a) O lugar e a data de presentación da solicitude.

b) O nome completo dos dous compoñentes da parella.

c) O DNI, pasaporte ou tarxeta de identidade.

d) A data de nacemento de ambos.

e) O enderezo de cada un dos membros da parella.

f) O domicilio da parella de feito que indiquen.

g) O estado civil de cada membro da parella.

h) Os fillos e fillas comúns.

i) A existencia ou inexistencia de convenio que regule as relacións económicas e patrimoniais e, se é o caso, a data do convenio e unha breve recensión do modelo de convenio.

j) A data da resolución que acorda a inscrición da constitución da parella.

k) A data de notificación da resolución.

l) A data de resolución da cancelación e, se é o caso, con indicación da súa causa.

m) A data e o contido da achega dun novo convenio que modifique ou substitúa o anterior.

n) E calquera outra mención que afecte o contido da relación de feito con relevancia para os efectos da Lei 2/2006, do 14 de xuño, e deste decreto».

Doce. Modifícase o número 2 do artigo 23, que queda redactado da seguinte forma:

«A cancelación terá lugar:

a) Por pedimento das dúas persoas que conforman a parella (PR212B). A petición deberase facer por escrito, con indicación do lugar e mais da data e coa sinatura das dúas persoas que conforman a parella (anexo III e anexo VII).

b) Por pedimento dunha das persoas que conforma a parella (PR212E). A petición deberá constar por escrito, con indicación do lugar e mais da data e coa sinatura da persoa que solicita a cancelación (anexo VI). A solicitude deberá ir acompañada do documento que acredite suficientemente a notificación á outra persoa da vontade de extinguir a parella.

c) Pola morte ou declaración de falecemento dunha das persoas que conforman a parella; neste suposto a Administración consultará automaticamente os datos incluídos na certificación de defunción en poder das administracións públicas ou elaborada por elas, agás que as persoas que conforman a parella se opoñan á súa consulta, caso en que deberán indicalo no recadro correspondente habilitado no formulario (anexo VI) e achegar o certificado de defunción ou a declaración xudicial de falecemento.

d) Polo matrimonio entre as persoas que conforman a parella. A Administración consultará automaticamente os datos incluídos na certificación de matrimonio en poder das administracións públicas ou elaborada por elas, agás que as persoas que conforman a parella se opoñan á súa consulta, caso en que deberán indicalo no recadro correspondente habilitado no formulario (anexo III) e achegar o correspondente certificado do Rexistro Civil. A data de extinción da parella que constará neste caso no Rexistro de Parellas de Feito de Galicia será a do día inmediatamente anterior á do matrimonio contida na certificación matrimonial.

e) Polo matrimonio de calquera das persoas que conforman a parella; neste suposto, a persoa que contraia matrimonio deberá instar a cancelación da súa inscrición como parella de feito (anexo VI), acreditando a comunicación fidedigna á outra persoa que conforma a parella. A Administración consultará automaticamente os datos incluídos na certificación de matrimonio en poder das administracións públicas ou elaborada por elas, agás que as persoas que conforman a parella se opoñan á súa consulta, caso en que deberán indicalo no recadro correspondente habilitado no formulario (anexo VI) e achegar o correspondente certificado do Rexistro Civil. A data de extinción da parella que constará neste caso no Rexistro de Parellas de Feito de Galicia será a do día inmediatamente anterior á data do matrimonio contida na certificación matrimonial.

f) En todos os supostos, a Administración consultará automaticamente os datos incluídos nos seguintes documentos en poder das administracións públicas ou elaborados por elas, agás que as persoas que conforman a parella se opoñan á súa consulta:

• Datos de identidade das persoas que conforman a parella (DNI, NIE, pasaporte ou tarxeta de identidade).

• Certificado de matrimonio das persoas que conforman a parella.

g) O disposto nas letras 4, 5, 6, 7 e 8 do artigo 11 do decreto será igualmente aplicable ás letras c), d), e) e f) deste artigo».

Trece. O artigo 24 queda redactado do seguinte xeito:

«Artigo 24. Corrección de erros

O Rexistro de Parellas de Feito de Galicia poderá rectificar en calquera momento, de oficio ou por instancia das persoas interesadas, os erros materiais existentes nos seus actos, de conformidade co disposto no artigo 109 da Lei 39/2015, do 1 de outubro».

Catorce. O número 1 do artigo 26 queda redactado do seguinte xeito:

«O acceso á información contida no Rexistro de Parellas de Feito de Galicia só poderá ser efectuado, ademais de polas persoas que conforman a parella, por terceiras persoas que acrediten a existencia dun interese lexítimo e polos órganos xudiciais».

Quince. Modifícase a disposición adicional primeira, que queda redactada da seguinte forma:

«Disposición adicional primeira. Formularios dos procedementos administrativos

De conformidade coa disposición adicional sexta da Lei 4/2019, do 17 de xullo, de administración dixital de Galicia, os modelos normalizados aplicables na tramitación do procedemento regulado nesta disposición poderán ser actualizados co fin de mantelos adaptados á normativa vixente. Para estes efectos, será suficiente a publicación dos modelos actualizados na sede electrónica da Xunta de Galicia, onde estarán permanentemente accesibles para as persoas interesadas, sen que sexa necesaria unha nova publicación no Diario Oficial de Galicia».

Dezaseis. Modifícase a disposición adicional segunda, que queda redactada da seguinte forma:

«Disposición adicional segunda. Datos de carácter persoal

De conformidade coa Lei orgánica 3/2018, do 5 decembro, de protección de datos persoais e garantía dos dereitos dixitais, os datos persoais recollidos nos procedementos regulados no presente decreto, cuxo tratamento e publicación autorizan as persoas que conforman a parella interesadas mediante a presentación das solicitudes, serán incluídos nun aplicativo informático denominado «Rexistro de Parellas de Feito de Galicia», cuxo obxecto é tramitar este procedemento, verificar os datos e documentos que as persoas interesadas acheguen nas súas solicitudes para comprobar a exactitude destes, levar a cabo as actuacións administrativas que deriven e informar sobre o estado de tramitación. Así mesmo, os datos persoais incluiranse na Carpeta cidadá de cada persoa para facilitar o acceso á información, tanto persoal coma de carácter administrativo. O órgano responsable deste ficheiro é a Xunta de Galicia, Consellería de Presidencia, Xustiza e Deportes. As persoas interesadas poderán solicitar o acceso, rectificación, oposición, limitación, portabilidade e supresión dos seus datos ou retirar, se for o caso, o consentimento outorgado a través da sede electrónica da Xunta de Galicia ou nos lugares e rexistros establecidos na normativa reguladora do procedemento administrativo común, segundo se recolle en https://www.xunta.gal/exercicio-de-dereitos».

Dezasete. Engádese a disposición adicional terceira:

«Disposición adicional terceira. Referencias aos departamentos territoriais e aos/ás directores/as territoriais

Os artigos 2.2, 3, 4, parágrafo primeiro, 3, 20 e 25.3, do Decreto 248/2007, do 20 de decembro, quedan modificados no sentido de substituír as denominacións «delegacións provinciais» por «departamentos territoriais da consellería competente».

Dezaoito. Modifícanse os anexos I a VI do Decreto 248/2007, do 20 de decembro, os cales figuran como anexos do presente decreto.

Dezanove. Engádese o anexo VII ao Decreto 248/2007, do 20 de decembro, o cal figura como anexo do presente decreto.

Disposición transitoria única. Réxime transitorio dos procedementos

Aos procedementos iniciados antes da entrada en vigor do presente decreto non lles será de aplicación este, polo que se rexerán pola normativa anterior.

Disposición derrogatoria única. Derrogación normativa

Quedan derrogadas todas aquelas normas de igual ou inferior rango que se opoñan ao previsto neste decreto.

Disposición derradeira única. Entrada en vigor

Este decreto entrará en vigor aos vinte (20) días da súa publicación no Diario Oficial de Galicia.

Santiago de Compostela, dez de marzo de dous mil vinte e cinco

O presidente
P.S. (Artigo 26.7 da Lei 1/1983, do 22 de febreiro)
Diego Calvo Pouso
Conselleiro de Presidencia, Xustiza e Deportes

Diego Calvo Pouso
Conselleiro de Presidencia, Xustiza e Deportes