Examinado o expediente instruído por solicitude de UFD Distribución Electricidad, S.A. sobre as autorizacións administrativas previa e de construción e a declaración, en concreto, de utilidade pública das instalacións eléctricas que se describen a seguir:

Solicitante: UFD Distribución Electricidad, S.A.

Domicilio social: avenida San Luís, 77, 28033 Madrid.

Denominación: LMT, CT e RBT Roma Piñor.

Situación: lugar de Piñor, concello de Barbadás.

Orzamento: 85.593,81 €.

Características principais do proxecto, que foi asinado polo enxeñeiro industrial David Núñez Fernández, colexiado núm. 1534 do ICOIIG, o 9.8.2024.

• Substitución na LMTA SCV806 dos apoios números 75-5 e 75-8, por novos apoios de celosía metálica, do tipo C-14/1000. Eliminación dos apoios existentes 75-6 e 75-7 e instalación dun novo apoio de celosía metálica, do tipo C-16/2000, no que se coloca o TC con matrícula 32HNN4. Substitución do condutor actual por 282 m de novo condutor do tipo LA-110, entre os apoios proxectados núm. 75-5 e núm. 75-8.

• Desmontaxe do transformador CT Roma Piñor-32C741 e instalación dun novo CT, do tipo compacto de manobra exterior, 2L1P, de 250 kVA e r/t 20.000/400 V.

• LMTS a 20 kV de 72 m de lonxitude en condutor RHZ1-3×(1×150), coa orixe no paso A/S para realizar no apoio existente número B8H6PWXO e final nos empalmes para realizar na LMTS SCV806 despois de realizar entrada/saída no CT proxectado.

A información pública do proxecto foi realizada mediante o Acordo deste departamento territorial do 11.9.2024, que foi inserido no DOG do 7.10.2024 e no xornal La Región de Ourense do 2.10.2024. O proxecto tamén estivo en exposición pública neste departamento territorial e no portal de transparencia desta consellería durante o prazo regulamentario. Dentro do prazo establecido para iso non foron presentadas alegacións.

En consecuencia, cumpridos os trámites ordenados na Lei 24/2013, do 26 de decembro, do sector eléctrico, e nos capítulos II e V do título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, así como na Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro), este departamento territorial

RESOLVE:

Conceder as autorizacións administrativas previa e de construción e declarar, en concreto, de utilidade pública ás devanditas instalacións, cuxas características se axustarán en todas as súas partes ás que figuran no proxecto de execución e ás condicións técnicas e de seguridade establecidas nos regulamentos de aplicación, e nos condicionados establecidos polos ministerios, organismos ou corporacións que constan no expediente.

Estas autorizacións outórganse sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

O prazo de posta en marcha das instalacións que se autorizan será de seis meses, contados a partir da data da última autorización administrativa necesaria para a súa execución.

A declaración de utilidade pública leva implícita a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa do 16 de decembro de 1954.

Que o representante da Administración, en cumprimento do disposto nos artigos 52 da Lei de expropiación forzosa, do 16 de decembro de 1954, e 149 do Real decreto 1955/2000, do 1 de decembro, dea comezo ao levantamento das actas previas á ocupación, nos días e nas horas que a cada interesado/a se lle notifique de xeito individual, daqueles predios que figuran no anexo do acordo de información pública do proxecto.

Contra a presente resolución, que non é definitiva na vía administrativa, cabe interpor recurso de alzada ante a conselleira de Economía e Industria no prazo dun mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Ourense, 7 de marzo de 2025

Alicia María López Míguez
Directora territorial de Ourense