O Decreto 37/2006, do 2 de marzo, polo que se regula o nomeamento de persoal interino para o desempeño con carácter transitorio de prazas reservadas a funcionarios e a contratación temporal de persoal laboral da Xunta de Galicia, modificado polo Decreto 60/2019, do 23 de maio, incorpora a disposición transitoria segunda, que contén unha habilitación para elaborar unha lista única como resultado da funcionarización e, no caso de ser necesario, establece que a Comisión Permanente elaborará unha única lista con anterioridade á finalización dos procesos de funcionarización.

Esta disposición foi obxecto de desenvolvemento pola Orde da Consellería de Facenda e Administración Pública do 20 de xullo de 2021 (DOG núm. 145, do 30 de xullo).

Mediante a Orde do 8 de agosto de 2024 (DOG núm. 164, do 27 de agosto) foi regulado o procedemento para o nomeamento como persoal funcionario de carreira do persoal laboral fixo de determinadas categorías profesionais do grupo III de persoal laboral que superou o proceso de funcionarización convocado pola Resolución do 26 de abril de 2021 (DOG núm. 81, do 30 de abril) e de determinadas categorías profesionais do grupo IV e V de persoal laboral que superou o proceso de funcionarización convocado pola Resolución do 12 de maio de 2021 (DOG núm. 94, do 21 de maio). Entre estas categorías de persoal laboral encontrábanse a categoría 90 (animador/a sociocultural) do grupo III de persoal laboral e as categorías 35 (auxiliar de arquivos e bibliotecas) e 36 (auxiliar de museos) do grupo IV de persoal laboral.

Por outra banda, mediante a Resolución do 8 de agosto de 2024 (DOG núm. 160, do 21 de agosto) foi publicado o Acordo do Consello da Xunta de Galicia, do 5 de agosto de 2024, polo que se aproba a modificación da relación de postos de traballo referente ao proceso de funcionarización de postos de traballo de persoal laboral da Xunta de Galicia e clasificación no corpo administrativo da Administración xeral (subgrupo C1), corpo de técnicos de carácter facultativo de Administración especial (grupo B) e no corpo de axudantes de carácter facultativo de Administración especial (subgrupo C1); no corpo auxiliar da Administración xeral (subgrupo C2) e no corpo de auxiliares de carácter técnico de Administración especial (subgrupo C2), da Administración xeral da Comunidade Autónoma de Galicia. Estes postos de persoal laboral modificados pertencían, entre outras, á categoría 90 (animador/a sociocultural) do grupo III de persoal laboral e ás categorías 35 (auxiliar de arquivos e bibliotecas) e 36 (auxiliar de museos), e tamén á categoría 4 (auxiliar fogar, coidador/a auxiliar, auxiliar coidador/a, auxiliar de internado) do grupo IV de persoal laboral.

Así mesmo, na Resolución do 27 de decembro de 2024 (DOG núm. 250, do 30 de decembro) ordénase a publicación do Acordo do Consello da Xunta de Galicia, do 27 de decembro de 2024, polo que se aproba a modificación da relación de postos de traballo referente ao proceso de funcionarización de postos de persoal laboral da Xunta de Galicia e clasificación no corpo de axudantes de carácter facultativo de Administración especial (subgrupo C1) e no corpo de auxiliares de carácter técnico de Administración especial (subgrupo C2) da Administración xeral da Comunidade Autónoma de Galicia. Estes postos de persoal laboral modificados pertencían á categoría 63 (oficial/a 1ª condutor/a, condutores/as 1ª, condutores/as altos cargos, condutor/a mecánico/a) do grupo III de persoal laboral e á categoría 16 (condutor/a) do grupo IV de persoal laboral.

De conformidade co artigo 4.2 da Orde do 20 de xullo de 2021, cando sexa necesario crear novas listas de natureza funcionarial para cuxa inclusión se requira a mesma titulación xenérica ou específica que a exixida para o acceso ás listas da categoría profesional laboral funcionarizada declarada equivalente, a Administración poderá transformar de oficio as listas da categoría laboral correspondente en listas de persoal funcionario do corpo, escala ou especialidade declarada equivalente.

Ao abeiro do establecido nos artigos 3 e 4.3 da Orde do 20 de xullo de 2021, as persoas integrantes das listas para a cobertura temporal de prazas de persoal laboral de categorías profesionais laborais equivalentes, de conformidade coas equivalencias establecidas no anexo do Decreto 165/2019, do 26 de decembro, serán admitidas nas listas únicas, sempre que cumpran os requisitos legais exixidos para o acceso ao correspondente corpo, escala ou especialidade de persoal funcionario en que se clasifica a categoría profesional laboral que se funcionariza, nos termos establecidos no artigo 8 do Decreto 37/2006, en concordancia coa súa disposición transitoria segunda. Deste xeito, a Administración comprobará que nas persoas integrantes das novas listas de natureza funcionarial concorren os requisitos legais exixidos para seren admitidas nelas.

Para realizar a transformación de oficio de determinadas listas de categorías profesionais laborais en listas de persoal funcionario do corpo, escala ou especialidade declaradas equivalentes, cómpre comprobar que nas persoas integrantes destas novas listas concorren os requisitos legais exixidos para seren admitidas nelas.

Mediante a Resolución do 11 de febreiro de 2025, da Dirección Xeral de Emprego Público e Administración de Persoal (DOG núm. 31, do 14 de febreiro), fíxose pública a relación de persoas excluídas con carácter provisional das listas únicas para a cobertura con carácter transitorio de prazas reservadas a persoal funcionario de determinados corpos, escalas ou especialidades, resultantes da transformación de oficio de listas das categorías profesionais laborais equivalentes, ao abeiro do establecido no artigo 4.2 da Orde do 20 de xullo de 2021.

Con data do 28 de febreiro de 2025 rematou o prazo establecido no punto terceiro da dita resolución para presentar reclamacións.

Unha vez examinadas e resoltas as reclamacións, a Comisión Permanente constituída ao abeiro do artigo 4 do Decreto 37/2006, acordou elevar á titular da Dirección Xeral de Emprego Público e Administración de Persoal a relación definitiva de persoas excluídas das listas únicas para a súa publicación no Diario Oficial de Galicia.

Consecuentemente con todo o anterior, informada a Comisión Permanente regulada no artigo 4 do Decreto 37/2006, do 2 de marzo, e de conformidade co establecido no artigo 10 da Orde do 20 de xullo de 2021, esta dirección xeral

RESOLVE:

Primeiro. Facer pública a relación definitiva de persoas excluídas nas listas únicas para o desempeño transitorio de prazas reservadas a persoal funcionario dos corpos, escalas e especialidades que se relacionan no anexo desta resolución, resultantes da transformación de oficio das listas das categorías profesionais laborais equivalentes.

Segundo. A relación definitiva de persoas excluídas poderá consultarse no portal web corporativo da Xunta de Galicia, https://funcionpublica.xunta.gal, epígrafe «Listas de contratación» e no Servizo de Atención e Información á Cidadanía a través do teléfono 012.

Na relación figura a seguinte información:

– Persoas excluídas, con expresión da causa de exclusión.

Nesta relación figuran exclusivamente as persoas admitidas nas listas de categorías profesionais laborais que non cumpren os requisitos legais exixidos para seren admitidas nas listas únicas para o desempeño transitorio de prazas reservadas a persoal funcionario dos corpos, escalas e especialidades declaradas equivalentes, que non resultasen penalizadas o 15 de xullo de 2014 ou con anterioridade a esta data.

Terceiro. As listas entrarán en vigor a partir do día seguinte ao da publicación desta resolución no Diario Oficial de Galicia.

Cuarto. Contra esta resolución, e de conformidade co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, as persoas interesadas poderán interpor recurso de alzada, ante o conselleiro de Facenda e Administración Pública, no prazo dun mes contado a partir do día seguinte ao da súa publicación no Diario Oficial de Galicia.

Santiago de Compostela, 17 de marzo de 2025

Nuria Aguilar Vázquez
Directora xeral de Emprego Público e Administración de Persoal

ANEXO

Corpos e escalas (persoal funcionario)

Subgrupo	Corpo/escala	Denominación
C1	20D5	Corpo de técnicos de carácter facultativo, escala de axentes técnicos facultativos, especialidade animación sociocultural
C1	209H	Corpo de axudantes de carácter facultativo, escala técnica de condución
C2	207Y	Corpo de auxiliares de carácter técnico, escala auxiliar de coidadores
C2	208Q	Corpo de auxiliares de carácter técnico, escala auxiliar de condución
C2	209M	Corpo de auxiliares de carácter técnico, escala auxiliar de arquivos, bibliotecas e museos, especialidade arquivos e bibliotecas
C2	209N	Corpo de auxiliares de carácter técnico, escala auxiliar de arquivos, bibliotecas e museos, especialidade museos