A sociedade civil titular do centro de ensinanzas deportivas (CAD) Manuel Peleteiro, de Santiago de Compostela, denominada Herederos de Manuel Peleteiro, S.C., transfórmase en sociedade de responsabilidade limitada coa denominación de Herederos de M. Peleteiro, S.L., conforme consta na escritura pública notarial do 30 de decembro de 2024.

O expediente tramitouse de acordo co Decreto 410/2003, do 6 de novembro, que regula os requisitos e o procedemento para a autorización a centros privados e a centros públicos que non sexan de titularidade da Consellería de Educación e Ordenación Universitaria para impartir ensinanzas de técnicos deportivos na Comunidade Autónoma de Galicia, norma desenvolvida pola Orde desta consellería do 12 de abril de 2004 e do 23 de abril de 2004, en que se determina o procedemento de autorización e os requisitos mínimos dos espazos administrativos e docentes xenéricos con que deben contar os centros.

Por canto antecede, por proposta da Dirección Xeral de Centros e Recursos Humanos,

DISPOÑO:

Artigo 1. Modificación da autorización

Modificar a autorización do CAD Manuel Peleteiro, de Santiago de Compostela, pola transformación da súa titularidade en sociedade de responsabilidade limitada denominada Herederos de M. Peleteiro, S.L.

A modificación da titularidade non afectará o réxime de funcionamento do centro.

Artigo 2. Inscrición no Rexistro de Centros

Esta orde dará lugar á correspondente inscrición no Rexistro de Centros da Comunidade Autónoma de Galicia.

Disposición derradeira primeira. Recursos

Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Disposición derradeira segunda. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 21 de maio de 2025

Román Rodríguez González
Conselleiro de Educación, Ciencia, Universidades e Formación Profesional