En sesión que tivo lugar o día 20 de maio de 2025, o tribunal nomeado pola Resolución do 14 de marzo de 2025 (DOG núm. 54, do 19 de marzo), encargado de cualificar o proceso selectivo para o ingreso, pola quenda de acceso libre e de promoción interna, polo sistema de oposición, no corpo facultativo superior de Administración especial da Administración xeral da Comunidade Autónoma de Galicia, subgrupo A1, escala de veterinarios, convocado pola Resolución do 22 de xaneiro de 2024 (DOG núm. 20, do 29 de xaneiro),

ACORDOU:

Primeiro. Anular, de conformidade co disposto na base II.1.2.7 da convocatoria e logo de revisar as reclamacións presentadas, as preguntas número 90, 97, 118, 139, 161, 165, 166, 168 e 179 do primeiro exercicio deste proceso selectivo realizado o 26 de abril de 2025. O seu lugar pasa a ser ocupado polas preguntas de reserva número 183, 184, 185, 186, 191 e 192. Desestímanse na súa totalidade as restantes reclamacións presentadas. O exame valorarase sobre un total de 177 preguntas, 140 preguntas da primeira parte e 37 preguntas da segunda parte.

Segundo. De conformidade co disposto na base II.1.1.1 da convocatoria, o exercicio cualificarase de 0 a 50 puntos e para superalo será necesario obter un mínimo de vinte e cinco (25) puntos. Para estes efectos, de acordo co disposto na citada base, mediante a Resolución deste tribunal, do 15 de abril de 2025, establecéronse os criterios de corrección, valoración e superación deste primeiro exercicio:

No acceso libre, superarán este exercicio as persoas aspirantes que teñan as mellores puntuacións ata completar o número máximo de persoas aspirantes determinado polo resultado de multiplicar por catro (4) o número de prazas convocadas por esta quenda sempre que acaden, en cada unha das partes, o mínimo do 50 %, das respostas correctas, unha vez feitos os descontos correspondentes.

Non obstante, de darse o caso de que o número de aspirantes que acaden, en cada unha das partes, o mínimo do 50 % das respostas netas sexa inferior ao resultado de multiplicar por catro o número de prazas convocadas, superarán o exercicio as persoas aspirantes que teñan as mellores puntuacións, ata acadar a devandita cifra, sempre que obtiveran, en cada unha das partes, o mínimo do 40 % das respostas correctas, unha vez feitos os descontos correspondentes.

Para os efectos do previsto nos dous parágrafos anteriores, e de acordo coa cláusula II.1.1.1 da convocatoria, o número total de prazas convocadas ascende a cincuenta e cinco (55), tendo en conta que non hai aspirantes admitidos pola quenda de promoción interna.

Superarán o proceso selectivo aquelas persoas aspirantes que acaden as mellores puntuacións ata completar o número máximo de prazas convocadas, sempre que cumpran as condicións previstas nos parágrafos anteriores.

Todas as persoas aspirantes con idéntica puntuación a aquela que marque a nota de corte establecida de acordo cos criterios anteriores se considerarán igualmente aprobadas.

O exercicio cualificarase de 0 a 50 puntos e para superalo será necesario obter un mínimo de vinte e cinco (25) puntos.

Asignarase unha valoración de 25 puntos no exercicio ás persoas aspirantes que obteñan unha nota equivalente á nota de corte. O resto das persoas declaradas aptas terán unha cualificación distribuída entre os 25 e os 50 puntos proporcional ao número de respostas acertadas. Do mesmo xeito, asignarase a puntuación proporcional que corresponda ás persoas aspirantes declaradas non aptas.

Feita a corrección en sesión do 27 de maio de 2025, acadaron a puntuación mínima de 25 puntos un total de cento corenta e seis (146) aspirantes, fixándose en setenta con oito (70,8) o número de respostas correctas para acadar a dita puntuación, unha vez reducido ao 40 % o mínimo de respostas correctas en cada unha das partes para superar o exercicio, logo de realizar os descontos correspondentes, segundo o establecido na base II.1.1.1 da convocatoria.

Terceiro. Publicar as puntuacións obtidas polas persoas aspirantes presentadas ao primeiro exercicio deste proceso selectivo no portal web corporativo da Xunta de Galicia, funcionpublica.xunta.gal

Cuarto. De acordo co disposto na base II.1.2.8 da convocatoria, as persoas aspirantes poderán presentar as alegacións que consideren oportunas con relación ás puntuacións, no prazo de dez (10) días hábiles contados desde o seguinte ao de publicación desta resolución no Diario Oficial de Galicia.

Quinto. Segundo o disposto na base III.13 da orde de convocatoria, contra este acordo poderase interpoñer recurso de alzada ante o conselleiro de Facenda e Administración Pública nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 28 de maio de 2025

José Antonio Varela Señarís
Presidente do tribunal