A Xunta de Goberno Local, na sesión que tivo lugar o día 16 de xuño de 2025, adoptou o seguinte acordo:

a) Aprobar inicialmente a modificación puntual do Plan especial de protección e rehabilitación da cidade histórica (regulación de usos), segundo o documento formulado polos servizos técnicos municipais de planeamento en xuño de 2025.

b) En aplicación do procedemento de tramitación simplificada regulado no artigo 18 da Lei 1/2019, do 22 abril, de rehabilitación e de rexeneración e renovación urbanas de Galicia (LRRR), a modificación inicialmente aprobada someterase á información pública durante o prazo dun mes, mediante anuncios que para o efecto se publicarán no Diario Oficial de Galicia e nun xornal dos de maior difusión na provincia. Simultaneamente, efectuarase notificación persoal a todas as persoas que figuren no Catastro como titulares de predios incluídos no ámbito do plan especial.

Obxecto da modificación.

A modificación afecta a normativa de usos do vixente Plan especial de protección e rehabilitación da cidade histórica (PE-1) e supón unha nova redacción dos seguintes artigos:

– Artigos 130 a 143 (normas xerais de uso).

– Artigos 150 a 155 (normas particulares de zona).

– Artigo 172 (Ordenanza de equipamentos e dotacións).

Suspensión de licenzas e demais títulos habilitantes de natureza urbanística.

O acordo de aprobación inicial extingue os efectos da suspensión previa que foi publicada no Diario Oficial de Galicia os días 19 de xuño de 2024 e 16 de xaneiro de 2025. Así mesmo, determina automaticamente, por aplicación do que dispoñen os artigos 47.2 da LSG e 86 do RLSG, unha nova suspensión do procedemento de outorgamento de licenzas de edificación, parcelación e derruba que resulten incompatibles ou desconformes coas novas determinacións da modificación inicialmente aprobada.

De conformidade co disposto no artigo 86.3.d) do RLSG, a suspensión impide a obtención de calquera título habilitante de natureza urbanística que supoña a implantación ou a ampliación de usos, tipos de uso e actividades desconformes coa normativa inicialmente aprobada, isto é, cando incumpran as condicións de uso e/ou de implantación establecidas na citada normativa.

Actos non afectados pola suspensión.

Dado o contido e alcance da reforma, a suspensión non afectará:

– As obras de mantemento e conservación das edificacións e das instalacións existentes.

– As obras de reforma e de rehabilitación, agás cando comporten a implantación ou a ampliación de usos, tipos de uso ou actividades que sexan desconformes co novo plan.

– Os actos de primeira ocupación e de inicio de actividade cando xa se tivese obtido o preceptivo título habilitante das obras executadas para o uso pretendido.

– Os proxectos que cumpran simultaneamente as determinacións do planeamento vixente e as resultantes da modificación inicialmente aprobada.

Ámbito territorial e duración da suspensión:

O ámbito territorial da suspensión abrangue todo o ámbito delimitado no PXOM vixente como PE-1.

A suspensión terá a duración máxima de dous anos, contados a partir do día seguinte ao do acordo de aprobación inicial, e extinguirase en todo caso coa aprobación definitiva e a entrada en vigor do novo planeamento.

Presentación de alegacións.

As persoas interesadas poderán alegar por escrito durante o prazo dun (1) mes, contado a partir do día seguinte ao da última publicación do anuncio de información pública.

Para as persoas que figuren no Catastro como titulares de inmobles afectados, o prazo dun mes iniciarase o día seguinte a aquel en que reciban a respectiva notificación persoal ou, se non puidesen ser citadas no seu enderezo, o día seguinte de publicarse o edicto no Boletín Oficial del Estado.

As alegacións poderán presentarse na sede electrónica do Concello de Santiago de Compostela na epígrafe do Catálogo de trámites, a través do trámite de presentación de documentación e alegacións e da opción de achega libre. Deberase introducir o dato 2024/27192Y no campo da referencia e incorporar o documento das alegacións.

Tamén se poderán presentar as alegacións por calquera dos outros medios relacionados no artigo 16 da Lei 39/2015, do 1 de outubro, do procedemento administrativo común das administracións públicas.

Consulta do expediente.

O proxecto inicialmente aprobado e sometido á información pública poderase consultar na páxina web do Concello a través da seguinte ligazón:

https://santiagodecompostela.gal/gl/transparencia/urbanismo/planeamiento/modificacion-do-plan-especial-de-proteccion-e-rehabilitacion-da-cidade-historica

Tamén se poderá consultar de forma presencial no Servizo de Planeamento e Xestión Urbanística do Concello de Santiago (sito na rúa das Casas Reais, nº 8, 2º andar), de luns a venres, das 9.00 ás 14.00 horas.

Santiago de Compostela, 16 de xuño de 2025

A alcaldesa
P.D. (DEC/2023/8135, do 17 de xuño)
Iago Lestegás Tizón
Concelleiro delegado de Urbanismo, Vivenda e Cidade Histórica