De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade á encomenda a Galaria, Empresa Pública de Servizos Sanitarios, S.A., da realización das actuacións necesarias para a planificación, coordinación e xestión do Plan de dotación do Novo Montecelo.

1. Actividades: a realización das actuacións necesarias para a planificación das necesidades, coordinación e xestión do Plan de investimentos do Novo Montecelo.

O obxecto abrangue a coordinación das actividades asociadas á planificación das licitacións necesarias para executar o Plan de investimentos do Novo Montecelo, segundo a previsión da finalización das obras e de ocupación dos espazos coa finalidade da posta en marcha do Novo Montecelo, así como o control de prazos dos expedientes de contratación e a xestión dos equipos de traballo constituídos para as diferentes fases da licitación e execución do Plan de investimentos, en coordinación coa Dirección Xeral de Recursos Económicos do Servizo Galego de Saúde.

A xestión que realizará Galaria, Empresa Pública de Servizos Sanitarios, S.A., abranguerá as actuacións materiais ou xurídicas necesarias, dentro dos límites contidos na normativa que disciplina a súa actividade, aínda que poderá, de conformidade co artigo 2 dos seus estatutos, contratar con terceiros as actuacións encomendadas. Neste último caso, a actuación axustarase ao disposto no artigo 32.7 da Lei 9/2017, do 8 de novembro, de contratos do sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro de 2014.

A encomenda de xestión non supón cesión da titularidade de competencias, nin dos elementos substantivos do seu exercicio, e é responsabilidade do órgano encomendante ditar cantos actos ou resolucións de carácter xurídico dean soporte ou en que se integren as concretas actividades materiais obxecto da encomenda.

2. Natureza e alcance da xestión encomendada: o artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, regula as encomendas de xestión intersubxectivas entre administracións públicas e entidades públicas, e recolle entre os seus supostos habilitantes o de que a entidade que vaia desenvolver a actividade encomendada poida ser considerada como medio propio ou servizo técnico da entidade encomendante (artigo 9.1.b) da Lei 16/2010). Neste caso, a encomenda instrumentarase por medio de resolución da consellería de adscrición da entidade (artigo 9.2 da Lei 16/2010).

O artigo 6.3 da Lei 9/2017, do 8 de novembro, de contratos do sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro de 2014, sinala que quedan excluídas do seu ámbito as encomendas de xestión reguladas na lexislación vixente en materia de réxime xurídico do sector público.

Ademais, prevese que para a efectividade da encomenda, o instrumento en que se formalice deberá ser publicado no Diario Oficial de Galicia (artigo 9.3 da Lei 16/2010).

3. Prazo de vixencia: esta encomenda terá unha duración de 18 meses, prorrogables ata un máximo de 18 meses adicionais, en función das necesidades derivadas da aprobación do Plan de investimentos e dos prazos do traslado, ocupación e posta en funcionamento dos diferentes servizos no novo hospital.

Santiago de Compostela, 10 de xullo de 2025

Antonio Gómez Caamaño
Conselleiro de Sanidade