Expediente: IN407A 2023/343-1.

Promotor: UFD Distribución Electricidad, S.A.

Proxecto: nova saída subestación Boiro: peche Cabo de Cruz-1ª fase.

Concello: Boiro.

Feitos:

1. O día 16.7.2023, a empresa promotora solicitou a autorización administrativa previa, a autorización administrativa de construción e a declaración de utilidade pública da instalación de distribución eléctrica mencionada. Co obxecto de mellorar a calidade da subministración de enerxía eléctrica na localidade de Cabo de Cruz e reducir os tempos de reposición da subministración eléctrica en caso de avarías.

Ao abeiro dos artigos 123 e 143 do Real decreto 1955/2000, presentan o proxecto de execución denominado «Nueva saída subestación Boiro: peche Cabo de Cruz-1ª fase», que comprende os seguintes documentos e a relación de bens e dereitos afectados de necesaria ocupación para a construción da instalación proxectada.

1º. Proxecto de execución denominado «Nova saída subestación Boiro: peche Cabo de Cruz-1ª fase», asinado o día 28.2.2023 por Victoriano González Lemos enxeñeiro técnico industrial eléctrico, nº colexiado 2.980 de Vigo.

2º. Anexo I, asinado o día 21.9.2023 por Victoriano González Lemos, enxeñeiro técnico industrial eléctrico, nº colexiado 2.980 de Vigo.

2. O proxecto someteuse ao trámite de información pública mediante un acordo publicado nos seguintes medios:

• Portal de transparencia e Goberno aberto da Consellería de Economía e Industria.

• DOG: 5.12.2023.

• BOP: 17.11.2023.

• Xornal La Voz de Galicia: 30.10.2023.

• Taboleiro de anuncios do concello: segundo certificado municipal do 11.10.2023.

3. Durante o período en que o proxecto se someteu ao trámite de información pública non se presentou ningunha alegación, reclamación nin suxestión relacionada coa documentación obxecto de publicación.

4. Consonte o artigo 127 do Real decreto 1955/2000, do 1 de decembro, solicitouse o informe preceptivo ás distintas entidades afectadas: Concello de Boiro, Consellería de Cultura, Educación e Universidade, Augas de Galicia e Deputación Provincial da Coruña.

No día desta resolución, non consta no expediente resposta dos ditos organismos á solicitude de informe.

5. O día 19.2.2025 emitiuse o informe técnico.

Consideracións legais e técnicas:

1. O director territorial é competente para resolver este expediente, ao abeiro do disposto no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG nº 22, do 1.2.2017), e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG nº 101, do 27.5.2024).

2. Lexislación de aplicación.

• Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

• Lei 40/2015, do 1 de outubro, de réxime xurídico do sector público (BOE núm. 236, do 2 de outubro).

• Lei 24/2013, do 26 de decembro, do sector eléctrico (BOE núm. 310, do 27 de decembro).

• Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).

• Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en instalación eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).

• Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).

• Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro).

• Lei do 16 de decembro de 1954, sobre expropiación forzosa (BOE núm. 351, do 17 de decembro).

• Decreto do 26 de abril de 1957, polo que se aproba o Regulamento da Lei de expropiación forzosa (BOE núm. 160, do 20 de xuño).

3. Características técnicas.

As instalacións obxecto deste expediente están situadas no concello de Boiro e as súas características técnicas son as seguintes:

Construción dunha nova liña de distribución, composta por:

Treito 1: liña de media tensión soterrada, a 20 kV, de 56 metros de lonxitude en condutor tipo RHZ1-2OL (S) 12/20 kV 3 (1×240 mm² Al), que transcorre por canalización existente autorizada no expediente IN407A 2007/172-1, coa orixe en cela de liña existente na subestación 66/20 kV Boiro e remate en arqueta existente á saída da subestación.

Treito 2: liña de media tensión soterrada, a 20 kV, de 5.846 metros de lonxitude en condutor tipo RHZ1-2OL 12/20 kV 3 (1×240 mm² Al), que transcorre por nova canalización e canalización existente autorizada nos expedientes IN407A 1998/218-1 e IN407A 2007/172-1, coa orixe na arqueta existente á saída da subestación e remate en paso aéreo-soterrado (PA/S) proxectado no apoio nº 29 existente (matrícula 9OD76B83) de formigón tipo HV-800/15 pertencente á arquitectura da LMT BOI-802, situado na pista que une os lugares de San e O Saltiño.

Treito 3: liña de media tensión soterrada, a 20 kV, de 96 metros de lonxitude en condutor tipo RHZ1-2OL 12/20 kV 3 (1×240 mm² Al), que transcorre por nova canalización, coa orixe na nova arqueta que se vai instalar preto do apoio nº 29 anterior e remate nun dos dous (2) pasos soterrado-aéreos (PS/A) que se vai instalar no apoio nº 30 existente (matrícula 9OEQAPUR) metálico de celosía tipo C-3000/12 no cal se realizará o acoplamento coa rede MT existente.

4. Na visita de campo realizada para examinar o lugar da instalación non se apreciou, nos predios sometidos a expropiación, ningunha das limitacións á constitución da servidume que sinala o artigo 58.a) da Lei 24/2013, do 26 de decembro, do sector eléctrico.

5. No expediente consta un informe favorable dos servizos técnicos deste departamento territorial.

Consonte con todo o sinalado,

RESOLVO:

A) Conceder a autorización administrativa previa, a autorización administrativa de construción e a declaración de utilidade pública da dita instalación de distribución eléctrica.

A declaración de utilidade pública leva implícita a necesidade de ocupación dos bens e de adquisición dos dereitos afectados e implicará a urxente ocupación, para os efectos do artigo 52 da Lei de expropiación forzosa.

B) A instalación executarase no prazo de dous anos, contados a partir do día seguinte ao da publicación desta resolución no Diario Oficial de Galicia. En todo caso, deberán respectarse os prazos establecidos no artigo 13.9 do Regulamento (UE) 2024/573 do Parlamento Europeo e do Consello do 7 de febreiro de 2024, sobre os gases fluorados de efecto invernadoiro, polo que se modifica a Directiva (UE) 2019/1937, e se derroga o Regulamento (UE) nº 517/2014 (DOUE nº 573, do 20 de febreiro de 2024), sobre prohibicións para a posta en funcionamento de aparellaxe eléctrica que empregue gases fluorados de efecto invernadoiro, ou cuxo funcionamento dependa deles, nun medio illante ou de rotura.

C) Para a posta en funcionamento da instalación autorizada, deberá achegar ante este departamento territorial unha solicitude á cal xuntará a seguinte documentación:

• As declaracións de conformidade relativas ao material ou equipamento e as certificacións ou homologacións, se procede.

• Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas axeitadas para a montaxe da instalación e posta a punto.

• Planimetría as built da instalación eléctrica en formato shape.

D) Esta autorización outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

O incumprimento das condicións e requisitos establecidos nesta resolución ou a variación substancial dos presupostos que determinaron o seu outorgamento poderán dar lugar á súa revogación, logo de audiencia ao interesado, segundo o establecido no artigo 53.10 da Lei 24/2013, do 26 de decembro, do sector eléctrico.

Contra esta resolución, que non é definitiva en vía administrativa, poderá interporse recurso de alzada perante a conselleira de Economía e Industria, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da dita Lei 39/2015, sen prexuízo de que as persoas interesadas poidan interpor calquera outro recurso que consideren axeitado.

Mediante este documento notifícaselles aos interesados esta resolución, segundo o exixido no artigo 40.1 da Lei 39/2015.

A Coruña, 23 de xullo de 2025

Isidoro Martínez Arca
Director territorial da Coruña

ANEXO

Nova saída subestación Boiro: peche Cabo de Cruz-1ª fase

Relación de bens e dereitos afectados-termo municipal de Boiro

Parcela proxecto	Propietario/titular	Referencia catastral	Lugar	Afección pleno dominio (LMT, CT e/ou apoios)		LMT soterrada (servidume de paso de enerxía eléctrica)		Natureza do terreo
				CT/Nº do apoio	Superficie (m2)	Lonxitude (m)	Superficie (m2)
1	Herdeiros de José Dieste	15011A015003470000XQ	Bico de Rato			2	7	Rústico. Agrario. Labor ou labradío de secaño