A Lei 4/2023, do 6 de xullo, de ordenación e xestión integrada do litoral de Galicia, no seu artigo 4, establece que os usos do litoral declarados compatibles nesta lei e, polo tanto, suxeitos a un título de intervención administrativa previsto nos seus artigos 35, 41 e 46, non se poderán realizar sen o seu outorgamento previo por parte da Administración competente.
Os títulos de intervención administrativa que poden concorrer sobre os usos do litoral son, entre outros, os seguintes:
a) As autorizacións e as concesións para os usos especiais e privativos no dominio público marítimo-terrestre, que se regulan polo establecido na normativa de costas ou de portos e mais polo disposto no artigo 48 da dita lei.
b) A autorización autonómica ou, cando proceda, a declaración responsable para os usos, as actividades e as instalacións na zona de servidume de protección do dominio público marítimo-terrestre, nos termos establecidos no seu artigo 49.
Polo que se refire ao dominio público marítimo-terrestre, o artigo 48 da Lei 4/2023, do 6 de xullo, dispón que, respectando o réxime xeral establecido na normativa de costas, as autorizacións e as concesións do dominio público marítimo-terrestre serán outorgadas pola consellería competente no momento en que se produza o efectivo traspaso das funcións e dos servizos da Administración xeral do Estado á Comunidade Autónoma de Galicia en materia de ordenación do litoral.
Con data do 19 de maio de 2025 publicouse no Boletín Oficial del Estado o Real decreto 394/2025, do 13 de maio, de traspaso de funcións e servizos da Administración do Estado á Comunidade Autónoma de Galicia en materia de ordenación e xestión do litoral, en virtude do cal quedan traspasadas a esta comunidade as funcións e os servizos da Administración do Estado en materia de ordenación e xestión do litoral. Nomeadamente, a xestión e o outorgamento das autorizacións dos usos de tempada nas praias e no mar territorial.
De acordo co disposto no artigo 113 do Regulamento xeral de costas, aprobado polo Real decreto 876/2014, do 10 de outubro, os servizos de tempada son aqueles que non requiren máis instalacións que as desmontables, como terrazas, establecementos expendedores de comidas e bebidas e instalacións de alugamento de equipamentos de praia, tales como hamacas, antucas, hidropedais, canoas, entre outros, nas praias da Comunidade Autónoma de Galicia.
De acordo co anterior, e para os efectos de dar cumprimento ao disposto nos artigos 113 e 152 do Regulamento xeral de costas, aprobado polo Real decreto 876/2014, do 10 de outubro, con data do 30 de setembro publicouse o Anuncio do 24 de setembro de 2025, da Dirección Xeral de Enerxías Renovables e Cambio Climático, de información pública sobre os prazos relativos aos servizos de tempada na zona de dominio público marítimo-terrestre do litoral de Galicia correspondentes ao ano 2026 (código de procedemento MT701A).
No devandito anuncio establecíase o seguinte:
«As persoas físicas e xurídicas interesadas na explotación de servizos de tempada que pretendan prestarse en terreos de dominio público marítimo-terrestre da Comunidade Autónoma de Galicia poderán solicitar o outorgamento de autorización desde o 17 de novembro, ou no décimo quinto día natural seguinte ao do remate do prazo establecido no parágrafo anterior, de ser este posterior, ata o 31 de decembro de 2025.
Exceptúanse os servizos de tempada nos termos municipais cuxos concellos asumiron a xestión dos ditos servizos. Os devanditos concellos tramitarán o procedemento para a adxudicación a terceiros dos servizos, incluída a publicación dos correspondentes anuncios, con indicación neles dos prazos para a presentación de ofertas ou solicitudes de participación.
A Dirección Xeral de Enerxías Renovables e Cambio Climático da Consellería de Medio Ambiente e Cambio Climático, antes do inicio do prazo de presentación das solicitudes, publicará na páxina web https://www.xunta.gal/medio-ambiente/galicia-litoral a relación de concellos que optaron por asumir a xestión dos servizos de tempada para o ano 2026.
Calquera outro evento, actividade, xornadas, competicións ou campionatos de duración non superior a 15 días que se queiran desenvolver no dominio público marítimo-terrestre deberán solicitarse cunha antelación mínima dun mes respecto da data prevista para a súa celebración».
En virtude do anterior, procédese a publicar a relación de concellos que optaron por asumir a xestión dos servizos de tempada para o ano 2026, e que consta como anexo a esta resolución.
Nos restantes concellos costeiros de Galicia, as persoas físicas e xurídicas interesadas na explotación de servizos de tempada que pretendan prestarse en terreos de dominio público marítimo-terrestre da Comunidade Autónoma de Galicia poderán solicitar o outorgamento de autorización desde as 12.00 horas do día 17 de novembro ata o 31 de decembro de 2025.
As solicitudes deberán presentarse a través do procedemento MT701A, dispoñible na sede electrónica da Xunta de Galicia, e debe presentarse unha solicitude por cada instalación ou servizo para o cal se require autorización.
Para o caso de concorrencia de varias solicitudes para unha mesma zona, no outorgamento terase en conta a prioridade na súa presentación, agás outros criterios de maior interese e utilidade pública das propostas, con respecto aos principios de publicidade, imparcialidade e transparencia.
Considerarase data de presentación válida aquela en que o expediente sexa presentado completo e conste nel a solicitude e toda a documentación complementaria exixida no devandito procedemento.
Manterán a condición de validamente presentadas aquelas solicitudes respecto das cales a Administración requira unha aclaración en relación coa documentación presentada, sempre e cando a documentación achegada na solicitude sexa completa.
A información relativa a este anuncio, así como as guías informativas sobre os servizos da tempada de 2026, estará á disposición das persoas interesadas na seguinte páxina web: https://www.xunta.gal/medio-ambiente/galicia-litoral
Santiago de Compostela, 11 de novembro de 2025
Paula Uría Traba
Directora xeral de Enerxías Renovables e Cambio Climático
ANEXO
Relación de concellos que optaron por asumir a xestión
dos servizos de tempada para o ano 2026
Provincia da Coruña:
1. Concello de Cabanas
2. Concello de Dumbría
3. Concello de Miño
4. Concello de Oleiros
5. Concello de Porto do Son
6. Concello de Ribeira
7. Concello de Valdoviño
Provincia de Pontevedra:
1. Concello de Baiona
2. Concello de Cangas
3. Concello do Grove
4. Concello da Guarda
5. Concello de Marín
6. Concello de Nigrán
7. Concello de Sanxenxo
8. Concello de Vigo
9. Concello de Vilaboa
10. Concello de Vilagarcía de Arousa