A Orde da Consellería de Infraestruturas e Mobilidade, do 13 de decembro de 2023 (DOG núm. 242, do 22 de decembro), regulou a tarifa específica +65, aplicable nos servizos públicos de transporte interurbano de uso xeral de competencia da Xunta de Galicia.

A aplicación desta tarifa permitiu que as persoas usuarias maiores de 65 anos poidan efectuar ata 60 viaxes mensuais en servizos públicos colectivos de transporte sen que lles supoñan custo económico, facilitando así que este significativo grupo de poboación manteña unha vida activa e poida acceder con maior facilidade a múltiples servizos e actividades.

Dada a aceptación e as vantaxes que para as persoas usuarias de máis de 65 anos representa esta tarifa +65, considerouse conveniente o seu mantemento máis alá da data inicialmente establecida, polo que ampliou o seu prazo de vixencia no exercicio 2025 a través da Resolución do 19 de novembro de 2024, da Dirección Xeral de Mobilidade, pola que se amplía o prazo de vixencia da tarifa específica +65 no transporte público interurbano de competencia da Xunta de Galicia, para o ano 2025 (DOG núm. 232, do 2 de decembro).

E, á vista das viaxes efectuadas polas persoas usuarias ao abeiro desta tarifa, e a súa tendencia incremental ao longo do período temporal en que xa estivo funcionando, considérase xustificada a súa continuidade máis alá do tempo inicialmente establecido, razón pola que procede a prórroga do prazo da súa vixencia para o ano 2026.

De acordo co que establece a Orde da Consellería de Economía e Facenda, do 11 de febreiro de 1998, pola que se regula a tramitación anticipada de expedientes de gasto, modificada polas ordes do 27 de novembro de 2000 e do 25 de outubro de 2001, esta resolución tramítase como expediente anticipado de gasto, polo que o gasto que se proxecta queda condicionado á existencia de crédito adecuado e suficiente nos orzamentos xerais da Comunidade Autónoma de Galicia para o ano 2026.

De conformidade co exposto, considérase conveniente realizar a ampliación da tarifa +65 para o ano 2026, polo que, cumpridos os trámites administrativos e contables oportunos,

RESOLVO:

Ampliar o prazo de vixencia da tarifa +65 desde o 1 de xaneiro ata o 31 de decembro de 2026.

Santiago de Compostela, 14 de novembro de 2025

Judit Fontela Baró
Directora xeral de Mobilidade