Primeiro. A Orde do 3 de xaneiro de 2025 pola que se establecen as bases reguladoras polas que se rexerá a concesión das axudas económicas a través do Bono Emancípate, no ano 2025, e se procede á súa convocatoria (código de procedemento CT501B), publicada no Diario Oficial de Galicia número 18, do 28 de xaneiro de 2025, establece no seu artigo 3, número 1, que o procedemento de concesión se tramitará en réxime de concorrencia non competitiva, de acordo co sinalado no artigo 19.2 da Lei 9/2007, do 13 de xuño, de subvencións de Galicia, ao non ser necesario realizar a comparación e prelación das solicitudes presentadas, e se concederán a todas aquelas persoas solicitantes que reúnan os requisitos exixidos no artigo 5. Se o orzamento previsto na orde non é suficiente para proceder ao pagamento de todas as axudas solicitadas, aplicarase como criterio de prioridade a data de presentación.
O número 2 do mesmo artigo 3 establece que, no momento en que se esgote o crédito orzamentario, a Consellería de Cultura, Lingua e Xuventude o publicará no Diario Oficial de Galicia e na páxina web: http://xuventude.xunta.es
Segundo. A dita Orde do 3 de xaneiro de 2025 destina no seu artigo 4 un orzamento de 1.940.000,00 euros, con cargo á aplicación orzamentaria 13.05.313A.780.0, de acordo co proxecto de Lei de orzamentos xerais da Comunidade Autónoma de Galicia para o ano 2025.
Este crédito foi ampliado por un importe de 250.000,00 euros mediante a Orde do 22 de outubro de 2025 pola que se publica o incremento do crédito previsto na Orde do 3 de xaneiro de 2025 pola que se establecen as bases reguladoras polas que se rexerá a concesión das axudas económicas a través do Bono Emancípate, no ano 2025, e se procede á súa convocatoria (código de procedemento CT501B), publicada no Diario Oficial de Galicia número 208, do 28 de outubro de 2025.
Unha vez efectuada esta ampliación, o orzamento total ascende a 2.190.000,00 euros.
Terceiro. De conformidade co exposto, unha vez resoltas parte das solicitudes presentadas ao abeiro da referida Orde do 3 de xaneiro de 2025, aplicando como criterio de prioridade a data de presentación, constátase que se esgotou o orzamento dispoñible para a concesión das axudas.
A derradeira solicitude que se puido conceder antes do esgotamento de crédito foi a correspondente ao expediente CT501B-2025-00002413-00, presentada na sede electrónica, nos termos recollidos no artigo 8 da convocatoria, o día 18 de febreiro de 2025, ás 21.28.30 horas.
En virtude do anterior, unha vez esgotados os recursos económicos destinados ás axudas previstas na Orde do 3 de xaneiro de 2025, a persoa titular da Dirección Xeral de Xuventude, por delegación do conselleiro de Cultura, Lingua e Xuventude, de acordo co establecido na disposición derradeira primeira da citada orde,
RESOLVE:
Ordenar a publicación no Diario Oficial de Galicia do esgotamento do crédito dispoñible con cargo á aplicación orzamentaria 13.05.313A.780.0 para as axudas convocadas ao abeiro da Orde do 3 de xaneiro de 2025 pola que se establecen as bases reguladoras polas que se rexerá a concesión das axudas económicas a través do Bono Emancípate, no ano 2025, e se procede á súa convocatoria (código de procedemento CT501B).
Santiago de Compostela, 3 de decembro de 2025
O conselleiro de Cultura, Lingua e Xuventude
P.D. (Orde do 3.1.2025; DOG núm. 18, do 28 de xaneiro)
Lara del Carmen Meneses Álvarez
Directora xeral de Xuventude