Mediante a Resolución do 9 de decembro de 2024 publicouse a resolución pola que se dá publicidade ao acordo do Consello de Dirección do Igape que aproba as bases reguladoras das axudas á transformación dixital das pemes para o ano 2025, cofinanciadas no marco do programa Galicia Feder 2021-2027, e pola que se convocan en réxime de concorrencia competitiva (DOG núm. 7, do 13 de xaneiro de 2025).

No punto quinto do resolvo da dita resolución establécese que o prazo máximo de execución dos proxectos de transformación dixital das pemes rematará o 30 de xuño de 2026. Así mesmo, indícase que as persoas beneficiarias das axudas deberán presentar a solicitude de cobramento como máis tarde o 31 de outubro de 2025 para os proxectos cuxo prazo máximo de execución sexa o 31 de outubro de 2025 ou anterior, e como máis tarde o 30 de xuño de 2026 no resto dos proxectos.

A experiencia na tramitación desta convocatoria amosa que a combinación de varios factores –entre eles, a necesidade de realizar unha avaliación rigorosa en concorrencia competitiva, a propia carga administrativa asociada á xestión de fondos Feder, así como procesos de adaptación e mellora dos procedementos e sistemas de xestión, propios da modernización administrativa– está a alongar os prazos efectivos de resolución dos expedientes.

Como consecuencia diso, existe un risco apreciable de que unha parte das pemes beneficiarias non dispoña dun prazo suficiente para desenvolver e implantar na súa totalidade os proxectos de dixitalización antes do 30 de xuño de 2026, o que podería comprometer o grao de execución dos proxectos aprobados e dos fondos asignados á convocatoria.

Tendo en conta que a ampliación proposta non supón incremento de crédito nin modificación das anualidades previstas, e que non existen terceiros afectados, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas,

RESOLVO:

Artigo 1. Ampliación do prazo máximo de execución dos proxectos

Ampliar ata o 30 de setembro de 2026 o prazo máximo de execución e xustificación dos proxectos previsto no punto quinto do resolvo da Resolución do 9 de decembro de 2024 pola que se lle dá publicidade ao acordo do Consello de Dirección que aproba as bases reguladoras das axudas á transformación dixital das pemes para o ano 2025, cofinanciadas no marco do programa Galicia Feder 2021-2027, e pola que se convocan en réxime de concorrencia competitiva (código de procedemento IG300C).

Artigo 2. Eficacia

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 19 de decembro de 2025

Covadonga Toca Carús
Directora xeral do Instituto Galego de Promoción Económica