A disposición transitoria segunda do Decreto 81/2016, do 23 de xuño, polo que se crea no ámbito do Servizo Galego de Saúde a categoría estatutaria de persoal enfermeiro especialista (Diario Oficial de Galicia núm. 133, do 14 de xullo), estableceu un procedemento específico de acceso, mediante a convocatoria diferenciada, polo sistema de concurso, á categoría e prazas de enfermeiro/a especialista.

Mediante a Resolución do 21 de marzo de 2018, da Dirección Xeral de Recursos Humanos (DOG núm. 63, do 2 de abril), aprobáronse, co apoio das organizacións sindicais CIG, CESM-O`Mega, CC.OO., UGT, CSIF e SATSE, as bases do procedemento do concurso específico para o ingreso na categoría estatutaria de persoal enfermeiro especialista.

En execución destas bases, con carácter transitorio e excepcional, realízase unha convocatoria diferenciada para o acceso, polo sistema de concurso, á categoría e prazas de enfermeiro/a especialista na especialidade de enfermaría xeriátrica, no seo da implantación da nova categoría de enfermeiro/a especialista e nos termos previstos no artigo 34 da Lei 55/2003, do 16 de decembro, do Estatuto marco do persoal estatutario dos servizos de saúde, e do artigo 25.3 do Decreto 206/2005, do 22 de xullo, de provisión de prazas de persoal estatutario do Servizo Galego de Saúde.

De conformidade co que establece a disposición transitoria segunda do referido Decreto 81/2016, do 23 de xuño, e no uso das competencias que lle atribúen o artigo 19 do Decreto 145/2024, do 20 de maio, polo que se establece a estrutura orgánica do Servizo Galego de Saúde (DOG núm. 101, do 27 de maio), e o artigo 7 da Orde do 22 de abril de 2020 de delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde (DOG núm. 82, do 29 de abril), este centro directivo

RESOLVE:

Primeiro. Convocar un concurso específico para o ingreso na categoría e praza de persoal enfermeiro especialista do Servizo Galego de Saúde, na especialidade de Enfermaría Xeriátrica.

A convocatoria está aberta ao persoal diplomado ou graduado universitario de Enfermaría con vínculo de fixeza que desempeñase no Servizo Galego de Saúde na data da entrada en vigor do Decreto 81/2016, do 23 de xuño, ou nun momento anterior, as funcións propias da especialidade e acredite o título da especialidade de Enfermaría Xeriátrica.

Segundo. O número de prazas que se convocan neste proceso especifícase no seguinte cadro:

Especialidade	Centro	Nº de prazas	Titulación
Enfermeiro/a especialista en Enfermaría Xeriátrica	A.S. de Lugo, A Mariña e Monforte de Lemos	7	Título universitario oficial de grao/diplomatura en Enfermaría e o título de enfermeiro/a especialista en Enfermaría Xeriátrica.
	A.S. de Vigo	7

Terceiro. Serán de aplicación a este proceso as bases aprobadas pola Resolución da Dirección Xeral de Recursos Humanos, do 21 de marzo de 2018 (DOG núm. 63, do 2 de abril), adaptándose os seus anexos II, III e IV ás actualizacións que se recollen na Resolución do 2 de xullo de 2025, da Dirección Xeral de Recursos Humanos, pola que se convoca concurso-oposición para o ingreso en diversas especialidades da categoría de enfermeiro/a especialista (DOG núm. 63, do 2 de abril), en relación co procedemento de acreditación de méritos, coas instrucións de acceso ao expediente electrónico (Fides) e coas revistas incluídas no catálogo CUIDEN.

Contra esta resolución, que pon fin á vía administrativa, poderase interpor recurso potestativo de reposición, ante esta dirección, no prazo dun mes contados desde o día seguinte ao da súa publicación no Diario Oficial de Galicia, de conformidade co establecido nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou poderase impugnar directamente, na xurisdición contencioso-administrativa, nos termos da Lei 29/1998, do 13 de xullo.

Santiago de Compostela, 22 de decembro de 2025

María del Mar Pousa Cobas
Directora xeral de Recursos Humanos