Mediante a Orde do 25 de febreiro de 2025 (DOG núm. 44, do 5 de marzo) a Consellería do Medio Rural regulou a aplicación dos pagamentos directos á agricultura e á gandaría e das axudas ao desenvolvemento rural suxeitas ao sistema integrado de xestión e control.
O artigo 27 da citada orde dispón que as notificacións das resolucións se farán conforme o establecido no artigo 45 da Lei 39/2015, do 1 de outubro, mediante a publicación no Diario Oficial de Galicia, cunha ligazón á páxina web do Fogga. As persoas interesadas propostas como beneficiarias disporán dun prazo de dez días para a aceptación da resolución. Transcorrido o dito prazo sen que se produza manifestación expresa, entenderase tacitamente aceptada e non será admisible a renuncia posterior.
Por outra banda, de conformidade cos artigos 15 e 25.2 da Orde do 25 de febreiro de 2025 e co Decreto 7/2014, do 16 de xaneiro, polo que se aprobaron os estatutos do organismo autónomo Fondo Galego de Garantía Agraria (en diante, Fogga), atribuíuse á Dirección do Fogga a competencia de resolver os procedementos de concesión destas axudas.
De acordo co anterior,
RESOLVO:
Primeiro. Facer pública na web do Fogga a relación de solicitudes aprobadas e denegadas das axudas relativas ás intervencións agroambientais e climáticas do plan estratéxico da PAC, ao abeiro da Orde do 25 de febreiro de 2025.
As persoas interesadas poden acceder á dita web na seguinte ligazón:
https://fogga.xunta.gal/es/pac/resoluciones-de-ayudas
Segundo. Poñer á disposición das persoas interesadas as resolucións completas das solicitudes indicadas no punto primeiro mediante a aplicación para teléfonos móbiles Sga@pp dispoñible en Google Play ou en App Store e no portal de axudas PAC a través da seguinte ligazón:
https://fogga.xunta.gal/gl/pac/consultas_pac/portal_de_axudas_pac
Neste portal, cada persoa interesada poderá acceder ao contido da súa resolución mediante certificado dixital, DNI-e (DNI electrónico) ou empregando Chave365. A información sobre a forma de alta en Chave365 está na ligazón que se indica a seguir:
https://sede.xunta.gal/tramites-e-servizos/chave365
Terceiro. Contra as citadas resolucións, que non poñen fin á vía administrativa, as persoas interesadas poderán interpoñer recurso de alzada ante a persoa titular da presidencia do Fogga no prazo dun mes contado desde o día seguinte ao desta publicación, consonte o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas. O prazo de interposición concluirá o mesmo día desta publicación no mes de vencemento, de conformidade co artigo 30.4 da Lei 39/2015, do 1 de outubro.
Santiago de Compostela, 23 de decembro de 2025
Juan José Cerviño Varela
Director do Fondo Galego de Garantía Agraria